1 Wantu wa Yuda wamtoriti Yehoahazi mwana gwa Yosia, wamtenda kaweri mfalumi pahala pa tati gwakuyi aku Yerusalemu. 2 Yehowahazi kaweriti na vinja ishilini na vitatu pakanjiti kukolamlima, kakolitimlima kwa miyezi mitatu aku Yerusalemu. 3 Shakapanu mfalumi gwa Misri kamwusiyiti muukolamlima wakuyi aku Yerusalemu na kuyitoza isi Yuda kodi ya kilu elufu tatu na miya msheshi za feza na kilu selasini na msheshi za zahabu. 4 Su mfalumi gwa Misri kamtula Eliyakimu, mlongu gwakuyi Yehoahazi kuwera mfalumi gwa Yuda na Yerusalemu, shakapanu kamgalambula litawu kamshema Yehoyakimu, kumbiti Neko kamtola Yehowahazi mlongu gwakuyi Eliyakimu mpaka Misri.

5 Yehoyakimu kaweriti na vinja ishilini na mhanu kapanjiti kukolamlima, kakolitimlima kwa vinja lilongu na limu kulawa Yerusalemu. Katenda makontola kulongolu kwa Mtuwa Mlungu, Mlungu gwakuyi. 6 Nebukadineza mfalumi gwa Babuloni, kamkomangiti, kamtawa kwa nyoloru za shaba su kumjega lopola Babuloni 7 Nebukadineza viraa akatoliti vimu vya vyombu vya Numba Nkulu ya Mtuwa Mlungu kavijega Babuloni na kuvitula muliboma lyakuyi aku Babuloni. 8 Mirandu imonga ya Yehoyakimu, pamuhera na makaliziwu gakatenditi na gamonga yagawonikiti kwakuyi galembwa mushitabu sha Wafalumi wa Israeli na Yuda. Yehoyakini mwana gwakuyi kakolitimlima pahala pakuyi.

9 Yehoyakini kaweriti na vinja vinani pakanjiti kukolamlima. Kakolitimlima kulawa Yerusalemu kwa miyezi mitatu na mashaka lilongu. Katenditi makontola kulongolu kwa Mtuwa Mlungu. 10 Shinja pashanjiti, mfalumi Nebukadineza katumiti ulagilagi, wamtoliti Yehoyakini wamjega mpaka Babuloni, pamuhera na vyombu vya beyi nkulu vya numba nkulu ya Mtuwa Mlungu. Mfalumi Nebukadineza kamtula Sedekia mlongu gwakuyi kuweri mfalumi gwa Yuda na Yerusalemu.

11 Sedekia kaweriti na vinja ishilini na yimu pakanjiti kukolamlima, kakolitimlima kulawa Yerusalemu kwa vinja lilongu na yimu. 12 Katenditi makontola kulongolu kwa Mtuwa Mlungu, Mlungu gwakuyi, pota kulinanagaziya kulongolu kwa Yeremia, mbuyi gwa Mlungu mweni kalonga visoweru vyavilawiti kwa Mtuwa Mlungu.

13 Sedekia kamgalambuka kayi mfalumi Nebukadineza yakaweliti kamtenda kalirapi kwa litawu lya Mtuwa Mlungu handa hapenikamgalambuki. Sedekia kaweriti kana mtiti na moyu gukamala kalemiti kumgalambukira Mtuwa Mlungu, Mlungu gwa Israeli. 14 Nentu ya aga watambika na walonguziya wa Yuda pamuhera na wantu weritindiri waminika nakamu wajera kutenda ga kukaliziya ga wantu wa isi imonga, wapatenditi napajimirwa munumba ya Mtuwa Mlungu mweni yomberi kaweriti kayitakasiya aku Yerusalemu. 15 Mtuwa Mlungu, Mlungu gwa wambuyi wawu, katumiti kwa womberi walagilagi wakuyi kayi na kayi toziya kaweriti na lusungu kwa wantu wakuyi na pahala pakuyi pakalikala. 16 Kumbiti womberi wendereya kuwajongera walagilagi wa Mlungu na wavibeziya visoweru vyakuyi na kuwaseka wambuyi wakuyi mpaka maya ga Mtuwa Mlungu gawizira wantu wakuyi mpaka wawezitindiri kuganyamaziya.

17 Hangu, Mtuwa Mlungu kamjega mfalumi gwa Babuloni weni kawalagiti wantemba wawu kwa ligumba mpaka mu Numba Nkulu ya Mtuwa Mlungu, pota kumwonela lusungu muntu yoseri yakawera mpalu ama mdala ama mzewi ama yakahera makakala. Woseri Mtuwa Mlungu kawatenda wabatwi na Nebukadineza. 18 Kavitoliti vyombu vyoseri vya Numba Nkulu ya Mlungu vikulu na vididini na luhanja lwa numba wa Mtuwa Mlungu na lwa mfalumi na wakulu. Kavijegiti vyoseri mpaka Babuloni. 19 Kayipambiriti motu numba ya Mlungu na kashibomola shibambaza sha Yerusalemu na kazipambira motu numba zoseri za liboma na kuhalibisiya vyombu vyoseri vya beyi nkulu. 20 Wantu yawaponikiti munkondu wajegitwi Babuloni. Na womberi wawera wamanda wa Nebukadineza na wiwuka wakuyi wawera wamanda mpaka mwanjiru gwa ufalumi wa Uajemi. 21 Hangu shakalongiti Mtuwa Mlungu kupitira mbuyi gwakuyi Yeremia, shitendeka isi hayisigali hera pota kulimwa kwa vinja sabini, kulipa mashaka goseri isi payikaliti pota kutenda msambu gwa shaka sha kwoyela.

22 Mushinja sha kwanja sha ukolamlima wa Koreshi, mfalumi wa Uajemi, su shitendikiti shisoweri sha Mtuwa Mlungu yashitakulitwi kupitira mbuyi gwakuyi Yeremia, Mtuwa Mlungu kamtenditi Koreshi, mfalumi gwa Uajemi, kabweri lagiru ayi muufalumi wakuyi woseri na kuyilemba hangu:

23 "Ali ndo lyakatakula Koreshi mfalumi gwa Uajemi. Mtuwa Mlungu, Mlungu gwa kumpindi, kampanana falumi zoseri za pasipanu na kandagalira nimnyawili numba mu Yerusalemu, muisi ya Yuda. Vinu kila muntu muwamu mwenu mwenga yamuwera wantu wakuyi Mtuwa Mlungu, Mlungu gwakuyi na kaweri pamuhera na yomberi na kagendi."