1 Shakapanu mfalumi Selemani kalonga,

"Mtuwa Mlungu, kalongiti kuwera

hakalikali muluwindu totolu.

2 Nakaka nikunyawira numba Nanagala,

pahala pakulikala gwenga mashaka goseri."

3 Shakapanu mfalumi kawagalambukiriti wantu woseri wa Israeli pawawera wagoloka, kawatekelera. 4 Kalongiti, "Kakwiswi Mtuwa Mlungu, Mlungu gwa Israeli, toziya kwa likakala lyakuyi katenda shakamgambiriti tati gwangu Dawudi. 5 Pakalonga, kwanjira mashaka galii niwawusiyi wantu waneni kulawa muisi ya Misri, nsyagulitindiri mji goseri mumakabila ga Israeli su wanyawiri numba ya kunguwira neni na syagulitindiri muntu yoseri kaweri mkulu gwa wantu waneni Israeli. 6 Kumbiti nigusyagula mji gwa Yerusalemu guweri mji gweni hanguwirwi na nimsyagula Dawudi kawakolimlima wantu waneni Israeli."

7 "Hangu, tati gwangu Dawudi kafiliti kunyawa numba ya kuguwirwa Mtuwa Mlungu, Mlungu gwa Israeli. 8 Kumbiti Mtuwa Mlungu kamgambiriti tati gwangu Dawudi, toziya mlandu gwa kunyawira neni Numba Nkulu ya Mlungu guweriti mumoyu mwaku ndo iherepa kufira kutenda hangu. 9 Kumbiti gwengandiri hagunyawi numba ayi, ila gwakuinyawa numba ayi ndo mwana gwaku yagumwiwula gamweni."

10 "Vinu Mtuwa Mlungu katenda shilii shakatakuliti, toziya neni wera mfalumi pahala pa tati gwangu Dawudi na nishikalira shiti sha ufalumi sha Israeli ntambu yakalongiti Mtuwa Mlungu, shakapanu hanyawi numba yakumguwira Mtuwa Mlungu, Mlungu gwa Israeli. 11 Munumba Nkulu ya Mlungu amu ntula Lisanduku lya Lipatanu, lyeni mngati mwakuyi kwana lipatanu lya Mtuwa Mlungu lyakalitenditi na wantu wa Israeli."

12 Shakapanu, Selemani kagolokiti kulongolu kushitalawanda sha Mtuwa Mlungu na kulongolu kushipinga shoseri sha wantu wa Israeli, kanyasuliti mawoku gakuyi pampindi na kuluwa. 13 Selemani kaweriti kanyawa shintambi sha shaba. Utali na upana wakuyi uweriti mita mbili na robu na kugenda kumpindi uweriti mita yimu na robu. Kashituliti shintambi ashi pakati pa shiwanja. Kakweniti kushintambi na kusuntamala kulongolu kushipinga shoseri sha Israeli, kanyasuliti mawoku gakuyi pampindi. 14 Kalonga, "Mtuwa Mlungu, Mlungu gwa Israeli, kwahera Mlungu yumonga handa gwenga kumpindi ama pasipanu. Gwenga ndo Mlungu gwaminika toziya kutenda lipatanu lyaku na guwalanguziya mafiliru gaku wantumintumi waku yawalikala pawakujimira kwa moyu gwawu goseri. 15 Nakaka gutenda shagutakuliti kwa ntumintumi gwaku tati gwangu Dawudi, kwa mlomu gwaku gwagutakuliti na kwa liwoku lyaku gutenda ntambu yayiwera leru."

16 Vinu, gwee Mtuwa Mlungu, Mlungu gwa Israeli, "Nikuluwa viraa gutendi shilii shagumgambiriti ntumintumi gwakuyi Dawudi tati gwangu, palii pagulongiti, mashaka goseri haguweri na mwiwuka gwa kulikala mshiti sha ufulumi sha Israeli, payiwera shiyiwuku shaku pawafata kwa waminika mukila shintu shawashitenditi handa gwenga ntambu yagutenditi. 17 Vinu, gwee Mtuwa Mlungu, Mlungu gwa Israeli, nikuluwa gutendi goseri gagumgambiriti ntumintumi gwaku Dawudi."

18 "Kumbiti, gwee Mlungu, hashi nakaka hagulikali na wantu pasipanu? Ata mpindi zyeni, pota mpindi za kumpindi nentu zikutosheyandiri, hayiweri hashi Numba Nkulu ya Mlungu ayi yanikunyawira hayikutosiyi? 19 Ata hangu, gwee Mtuwa Mlungu, Mlungu gwangu, neni ntumintumi gwaku. Nikuluwa gumpikiniri na gutendi ganikuluwa leru. 20 Guyiloleri Numba Nkulu ya Mlungu ayi paluwala na pashiru, pahala peni gusyagula wantu waku hawakuguwili. Gumpikaniri neni ntumintumi gwaku paniza panu kukuguwira. 21 Gupikanili shanikuluwa neni ntumintumi gwaku na shawakuluwa wantu waku Israeli pawaluwa agawu pawalola pahala panu. Gupikanili gatuluwa kulawa kumpindi na pagupikanirakala gutulekeziyi vidoda vyetu."

22 "Muntu pakamtendera vidoda muyaguyi na pakajegwa kapati kulirapa palongolu pa shitalawanda shaku Mnumba Nkulu ya Mlungu ayi na pakalirapa kahera likosa, 23 su gupikanili kulawa kumpindi aku, nakuwatoza wantumintumi waku. Muntu yakawera na likosa gumtozi kwa likosa lyakuyi, muntu yakahera likosa gumleki na gumpanani lifupu kulawirana na waminika wakuyi."

24 "Wantu waku Israeli pawakomangwa na wankondu wawu, toziya ya vidoda vyawatendiriti na womberi pawalonga woya vidoda kwa gwenga na kukuyira gwenga na pawaluwa kulekiziwa na gwenga guwalekeziyi vidoda vyawu Munumba Nkulu ya Mlungu ayi, 25 su, gupikanili kulawa kumpindi aku. Gulegiziyi vidoda vyawu na guwawuziyi muisi yaguwapananiti womberi na wambuyi wawu."

26 "Mvula payitowandiri toziya watenda vidoda na pawaluwa agawu pawalola pahala panu na kulijimira litawu lyaku, shakapanu pawaleka vidoda vyawu, pawaluwa, 27 guwapikaniri kulawa kumpindi aku na guwalekeziyi vidoda vyawu wantumintumi waku wantu waku wa Israeli, agawu paguwafunda kufata njira yaku iherepa na gutowi mvula muisi yaku ayi yeni guwapanana wantu waku iweri lunda yawu."

28 "Handa pasipanu kwana njala ama ulweri wa tawuni ama kuyuma ama ulweli wa vimeru, ama wanjombi ama vikwitakwita ama payiwera wantu waku wazyengetwa na wankondu wawu mumji gwawu goseri gulii, payiwera kwana likomangu lyoseri ama ulweli woseri, 29 shondi gupikinili maluwa ga muntu yoseri ama wantu waku woseri wa Israeli, kila muntu pakavimana ntabika yakuyi na hinginika yakuyi pakakuluwa agawu pakatalipiyiti mawoku gakuyi kulola Numba Nkulu ya Mlungu ayi. 30 Su, gupikanili kulawa kumpindi kwaku. Guwalekeziyi vidoda, viraa gumtenderi kila muntu ntambu yakafiruwa kutenderwa, toziya ndo gwenga hera yagugamana maholu gamumoyu mwa wantu woseri. 31 Hangu hawakujimili na kuzigendera njira zaku shaka shoseri pawalikala muisi yaguwapananiti wambuyi wetu."

32 "Ntambu iraayi shaka muntu mhenga yakalawira muwamu mwa wantu waku Israeli hakizi kuluwa munumba ayi kulawa isi ya kutali toziya kapikanira ukulu waku na likakala lyaku, shakapanu kizi na kuluwa Kunumba Nkulu ya Mlungu ayi, 33 nikuluwa gumupikaniri kulawa kumpindi na gumpanani mhenga ayu shoseri shakakuluwa su wantu woseri pasipanu wakumani na kukujimira ntambu yawatenda wantu waku wa Israeli na viraavirii wavimana handa Numba Nkulu ya Mlungu ayi yanyawiti ndo yakumguwira."

34 "Wantu waku pawagenda munkondu kulikomanga na wankondu wawu, poseri paguwajega munkondu na womberi pawakuluwa agawu pawalola mji agu yagusyaguliti na Numba Nkulu ya Mlungu yanyawiti kwajili ya litawu lyaku, 35 nikuluwa gupikinili galii gawakuluwa paguwera kumpindi aku na guwapanani ukanka nkondu aku."

36 "Shaka wantu pawakutendera vidoda, toziya kwahera muntu yakatendandiri vidoda na paguwakalalira na kuwaleka wakomangwi na wankondu wawu, mpaka wajegwi lopola mpaka isi ya kutali ama ya pakwegera: 37 handa pawawera aku kuluhamira hawaliwuyi kwa rohu yawu yoseri na kuleka vidoda na kuluwa walekiziwi vidoda vyawu, pawalonga, tutendera vidoda na twenga twagamira nakamu tutenda makontola, 38 handa pawaleka vidoda kwa moyu gwawu goseri na kwa rohu yawu yoseri pawawera muluhamira na handa hawakuluwi pawalola isi yawu, isi yaguwapananiti wambuyi wawu, mji agu yagugusyaguliti na Numba Nkulu ya Mlungu yaniyinyawiti kwajili yaku: 39 shondi gupikanili kumpindi aku kwaguwera gupikinili galii gawaluwa na guwapanani teratera ntambu yagufira, guwalekeziyi wantu waku weni wakutendera vidoda."

40 "Vinu gwee Mlungu gwangu, gutuloli na gwanki maluwa gatuluwa pahala panu. 41 Vinu gugoloki gwee Mtuwa Mlungu, gwingili pahala paku pa koyera gwenga pamuhela na lisanduku lya lipatanu lya makakala gaku. Watambika waku gwee Mtuwa Mlungu, wapati ulopola na wananagala waku wanemeleri uheri waku. 42 Gwee Mtuwa Mlungu, nagumlema mswagwa lipaki gwaku. Guholi ufiru waku kwa ntumintumi gwaku Dawudi."