1 Wenikaya wa Yerusalemu wamtenditi Ahazia, neperu gwa shipalu gwa Yehoramu, kaweri mfalumi, kakolimlima pahala pa tati gwakuyi toziya ya wakulu wakuyi woseri walagitwi na wantu tunga yawingiriti kungonjeru pamuhera na Waarabu. Hangu, Ahazia mwana gwa Yehoramu, mfalumi gwa Yuda, kawera mkolamlima. 2 Ahazia, kanjiti kukolamlima pakawera na vinja ishilini na mbili, kakolitimlima kulawa Yerusalemu kwa shinja shimu. Mawu gwakuyi kashemitwi Atalia, mzukulu mdala gwa mfalumi Omiri. 3 Toziya mawu gwakuyi kaweriti mgambiziya gwakuyi mukutenda makontola na yomberi viraa kafatiti mgenderanu gwa wiwuka wa Ahabu. 4 Katenditi makontola kulongolu kwa Mtuwa Mlungu ntambu yawatenditi wenikaya wa mfalumi Ahabu, toziya womberi waweriti wagambiziya wakuyi pakahowiti tati gwakuyi, wamlongoziya katendi makontola. 5 Viraavirii kafata litakulu lyawu, kagenda pamuhera na mfalumi Yehoramu mwana gwa Ahabu mfalumi gwa Israeli kulikomanga na Hazaeli mfalumi gwa Sria aku Ramoti Gileyadi. Na Washamu wamtenditi Yoramu. 6 Shakapanu mfalumi Yoramu kawuya Yezireeli su kalwaziyi vironda vyakuyi vyakapatiti aku Rama, shaka shakaweriti kankulikomanga na Hazaeli mfalumi gwa Sria. Ahazia mwana gwa Yehoramu mfalumi gwa Yuda kagenda kumtyangira Yoramu mwana gwa Ahabu aku Yezireeli toziya kaweriti na malonda.

7 Mlungu kapangiti Ahazia kalaguwi palii pakamtyangiriti Yoramu. Toziya pakasokiti aku, kalawiti pamuhera na Yoramu kagenda kuliwona na Yehu mwana gwa Nimshi yakasyagulitwi na Mtuwa Mlungu kawalagi wantu wa kaya ya Ahabu. 8 Yehu pakaweriti kawatoza kaya ya Ahabu, kaliwoniti na wakulu wa Yuda pamuhera na wana wa walongu wakuyi Ahazia, yawawera wankumtendera Ahazia na Yehu kawalaga. 9 Shakapanu Yehu kamsakuliti Ahazia na yomberi kabatitwi pakawera kalififa aku Samaria. Womberi wamjegiti kwa Yehu na Yehu kamlaga. Wamfintiriti nshimba yakuyi toziya walongiti, "Yomberi ni mzukulu gwa Yehoshafati, mweni kamsakuliti Mtuwa Mlungu kwa moyu gwakuyi goseri."

Hangu kasigalitindiri ata muntu yumu gwa kaya ya Ahazia mweni yakaweziti kuwera mfalumi.

10 Atalia mawu gwakuyi Ahazia pakawoniti kuwera mwana gwakuyi kalaguwa, kalagalira kaya yoseri ya ufalumi wa Yuda walaguwi. 11 Kumbiti Yehosheba, mhinga gwa mfalumi Yehoramu kamtoriti kwa bada Yoashi mwana gwa Ahazia kulawa muwamu mwa wana wa mfalumi yawafilitwi kulaguwa. Kamfifiti yomberi pamuhera na yaya gwakuyi mushumba sha kutula vintu vya kugonjera Munumba Nkulu ya Mlungu. Hangu Yehosheba mhinga gwa mfalumi Yehoramu viravilii kaweriti mdala gwa mtambika Yehoyadani na viraa kaweriti dada gwakuyi Ahazia, kamfifiti mwana ayu nakalaguwa na Atania. 12 Yohashi kalikaliti na Yehosheba kwa vinja sita agawu pakawera kafifwa mngati mushumba ashi, shaka Atalia pakaweriti kakolamlima isi handa malikiya gwa Yuda.