1 Mivinja ishilini, yeni Selemani kanyawiti Numba Nkulu ya Mtuwa Mlungu na liboma payipititikala, 2 Selemani kayinyawiti syayi miji yakapananitwi na Huramu, shakapanu kawapanana Waisraeli miji ayi walikali amu. 3 Shakapanu Selemani kagenditi Hamati Zoba na kugulopola mji agu, 4 na kagunyawa mji gwa Tadimori aku kushiwala. Kainyawiti syayi miji ya Hamati yayiweriti hanja. 5 Viraavirii Selemani kanyawiti miji ayi: Beteli Horoni ya uwega wa pampindi na Beti Horoni ya uwega wa pasi, miji yana maboma, vibambaza na migomi mikulu yayiwera na ngwiniliziwu, 6 mji gwa Baalati na miji yakuyi yoseri ya hanja, mbutuka zakuyi za kukwegwa na farasi wakuyi na shoseri shakafiliti kunyawa mu Yerusalemu, Lebanoni ama kumonga mu ufalumi wakuyi. 7 Wantu wamonga woseri yawawera ndiri Waisraeli yawasigaliti muwamu mwa Wahiti na Waamoni na Waperizi na Wahivi na Wayebusi, 8 Viraavirii wiwuka wawu weni Waisraeli wawaagamiziyandiri, Selemani kawatendiziyiti mahengu ga kukakaniziya na hangu ndo ntambu yawatenda mpaka vinu. 9 Kumbiti muwamu mwa wantu wa israeli, Selemani kamtendandiri muntu yoseri kuwela mmanda kwaajili ya lihengu lyakuyi, Waisraeli waweliti mashonta na kawatenda kuwera wakulu wa mashonta wakuyi na wakulu wa mbutuka zakuyi za kukwega na farasi na wakwena farasi wakuyi. 10 Ayi ndo walanga ya wagolekera wakulu yakawatuliti mfalumi Selemani: Waweliti miya mbili na hamsini, yawaweliti wankuwalonguziya wantu.

11 Selemani kamwamisiya mhinga Farao mfalumi gwa Misri, kulawa mji gwa Dawudi, kamjega kunumba yakamnyawiliti. Kalongiti, "Mdala gwangu hapeni kalikali munumba ya Dawudi mfalumi gwa Israeli toziya pahala poseri lisanduku lya Mtuwa Mlungu liweliti pahala panu ndo pananagala."

12 Selemani kamlavilira Mtuwa Mlungu tambiku ya kulunguziya torosu pampindi pa shitalawanda shakamnyawiriti Mtuwa Mlungu kulongolu kumdamu gwa numba nkulu ya Mlungu. 13 Kalaviyiti tambiku azi ntambu yakalagaliritwi na Musa kila lishaka nanagala zyeni ndo, msambu gwa lyezi kulawa na misambu mitatu ya kila shinja yeni ndo msambu gwa mabumunda yagalekerwandiri simika, msambu gwa majuma na msambu gwa visasa. 14 Kafata malagalira ga Dawudi tati gwakuyi, kapangiti zamu za kila lishaka za watambika na za Walawi pawalitanga watambika kukwisa na kugatenda mahengu gawu. Viraa kawatula walolela kumigomi yoseri, toziya ndo ntambu yakalagaliriti Dawudi, muntu gwa Mlungu. 15 Womberi wagalekandiri malagaliru ga mfalumi Dawudi gakawagambiliti watambika na Walawi kuusu mlandu goseri na kuusu luhanja.

16 Mahengu goseri ga Selemani gakatenditi gapera kwanjira libuwi lya liyanjiru lya numba ya Mtuwa Mlungu mpaka payimalilikiti kunyawiwa. Hangu numba ya Mtuwa Mlungu imalilikiti.

17 Shakapanu Selemani kagenditi Esioni Geberi na Eloti yayiweriti kumpwani mwa isi ya Edomu. 18 Huramu kamjegeliti meri yazilongoziwitwi na wakulu wa meri wakuyi na wantu yawamana mirandu ya bahari. Womberi pamuhera na wamashonta wa Selemani, wagenditi mpaka Ofiri na kulawa aku watoliti zahabu, wamjegela mfalumi Selemani kilu elufu lilongu na mhanu.