1 Mfalumi Selemani kanyawiti shitalawanda sha shaba, shiweriti na utali wa mita tisa na upana mita tisa na kugenda pampindi mita msheshi na nusu. 2 Shakapanu kanyawiti vulu, yana upana wa mita msheshi na nusu kulawa uwega umu mpaka uwega umonga na kwa kugenda pasi mita mbili na robu na upana wa mzyengetu mita kumi na tatu na nusu. 3 Pasi pa ukingu kuzyengeta vulu ayi, wapondangiti vinyagu vya wang'ombi shipalu waweriti migenderanu, mgenderanu gumu pa gumonga. Mahepeziya aga gatenditwi pamuhera na seemu zimonga za vulu ayi. 4 Na vulu ayi ituritwi pampindi pa vinyagu vya wang'ombi shipalu lilongu na mbili wa shaba, watatu walola kushana na watatu kusika walola kwaguzyeta mshenji, watatu kwagulawa mashenji. 5 Unenepa wa ukingu wakuyi uweriti sentimeta saba na nusu. Ukingu wakuyi uweriti gambira ukingu wa shikombi na gambira uluwa wa ungalangala. Vulu azi zingira mashi lita elufu sitini. 6 Viraavirii kanyawiti mabeseni lilongu ga kugululira vinofu vya nyama yavitenderitwi mutambiku za kulunguziwa. Mabeseni aga, mhanu kagatuliti kusika mwa Numba Nkulu ya Mlungu na mhanu kagatula kushana mwa Numba Nkulu ya Mlungu. Vulu nkulu ilii iweriti wankunawira watambika.

7 Shakapanu kanyawiti vintambi lilongu vya zahabu ntambu yakalagaliritwi, kavituli palijeleri lya Numba Nkulu ya Mlungu, mhanu kazituliti uwega wa kusika mwa Numba Nkulu ya Mlungu na muhanu zimonga kazituliti uwega wa kushana. 8 Shakapanu kanyawiti viraa meza lilongu, kazituliti palijeleri lya Numba Nkulu ya Mlungu mhanu uwega wa kumliwu na mhanu uwega wa kumshigi. Shakapanu kanyawiti mabeseni miya ga zahabu.

9 Kanyawiti lijeleri lya mngati lya watambika na lijenjeri limonga likulu lya kunja na migomi ya ligeleri lyeni kayimatika kwa shaba, 10 na vulu ilii kayituliti pashisoku sha kusika kwagulawa mshenji mwa Numba Nkulu ya Mlungu ayi.

11 Huramu viraavirii kanyawiti viwiga na visomeru na mabeseni. Hangu ndo ntambu yakamaliriti lihengu lyakapananitwi na mfalumi Selemani kalitendi Munumba Nkulu ya Mlungu, 12 mpanda mbili na mabeseni mawili gawera pampindi pa mpanda, nyavu mbili za kuherepiziya mituwi miwili ayi yayiweriti pampindi pa mpanda, 13 viraa kuweriti na mishoru ya uluwa ga mabwajubwaju yagashemwa mikomamanga miya msheshi kwajili ya nyavu mbili azi, mishoru ya uluwa wa mabwajubwaju yagashemwa makomamanga aga gaweriti mumisitari miwili mukila wavu, su kuherepiziya mabeseni galii mawili ga majenjeri yagaweriti pampindi pakila mpanda, 14 viraavirii kanyawiti matololi lilongu ga kupapila mabeseni gakuyi lilongu, 15 na mabeseni galii yashemitwi baali na vinyagu vya wang'ombi shipalu lilongu na mbili pasi pa mabeseni aga, 16 shakapanu kanyawa viwiga na mabeseni na visomeru na vyombu vimonga vyoseri vya Numba Nkulu ya Mlungu. Huramu Abi kamyawiriti mfalumi Selemani vintu vyaviweriti vya shaba yayikuwitwi.

17 Vintu vyoseri avi mfalumi kavinyawiti kululanda lwa Yoridani, pahala pa litapaka lya ukaka lyaliweriti pakati pa Sukoti na Sereda. 18 Selemani kavinyawiti vyombu vivuwa nentu, hangu uzotopa wa shaba yayitendiritwi kunyawira vintu vyoseri avi imanikandiri.

19 Viraavirii Selemani kanyawiti vintu vyoseri vyaviweriti Munumba Nkulu ya Mlungu, shitawanda sha zahabu na meza ya zahabu yakutulira mabumunda mananagala, 20 vintambi vya vikoloboyi vya zahabu iherepa za kulangalira palongolu pa pahala Pananagala nentu ntambu yayilagaliritwi, 21 mishoru ya uluwa na vikoloboyi na kolewu, vilavilii viweriti vya zahabu iherepa nentu, 22 mikasi na mabeseni na masiniya ga kutumiziya ubani na vipalira motu na migomi ya pahala Pananagala nentu na ligomi lyakwingilira Kunumba Nkulu ya Mlungu. Vyoseri avi vinyawitwi kwa zahabu iherepa nentu.