1 Mfalumi Yehoshafati gwa Yuda pakaweriti kala muntu mlunda na kana ligoya, katenditi lipatanu na Ahabu, kafiliti mwana gwakuyi kamyugi mhinga gwa Ahabu mfalumi gwa Israeli. 2 Vinja vivuwa pavipititi Yehoshafati kagenditi Samaria kumtyangira mfalumi Ahabu. Ahabu kamshinjiriti Yehoshafati kondowu na ng'ombi wavuwa, kwa ligoya lyakuyi pamuhera na wantu yawaweriti pamuhera na yomberi, shakapanu Ahabu kamzyangazyanga kagendi nayu kugukomanga mji gwa Ramoti Gileyadi. 3 Ahabu mfalumi gwa Israeli kamkosiya Yehoshafati mfalumi gwa Yuda, "Hashi, hagugendi na neni kugukomanga mji gwa Ramoti Gileyadi?"

Yehoshafati kankula, "Yina, neni na pamuhera na gwenga, viraa wamashonta waneni ndo handa wamashonta waku. Hatuweri pamuhera na gwenga munkondu." 4 Viraavirii mfalumi Yehoshafati kamgambira mfalumi gwa Israeli, "Kumbiti gumkosiyi uti Mtuwa Mlungu shakutenda."

5 Shakapanu, Ahabu kawashemiti wambuyi wa Mlungu yawaweriti miya msheshi kawakosiya, "Hashi, tugendi twakagukomangi mji gwa Ramoti Gileyadi, ama ng'endindiri?"

Womberi wamwankula, "Gugendi! Mlungu hakakupanani ukanka!"

6 Kumbiti Yehoshafati kakosiya, "Hashi, panu kwahera mbuyi yumonga gwa Mtuwa Mlungu mweni tuweza kumkosiya shakutenda?"

7 Mfalumi Ahabu gwa Israeli kamwankula Yehoshafati, "Kankali yumu, Mikaya mwana gwa Imla. Tuweza kumkosiya Mtuwa Mlungu shintu shakutenda kupitira yomberi. Kumbiti nimkalalira toziya yomberi katungandiri mlandu mheri."

Yehoshafati kamgambira, "Iherepandiri mfalumi kulonga hangu."

8 Su, Ahabu mfalumi gwa Israeli kamshemiti mkulu yumu na kumgambira, "Gunjegeri Mikaya mwana gwa Imla ulaavinu."

9 Shaka ashi, mfalumi gwa Israeli pamuhera na Yehoshafati, mfalumi gwa Yuda, waweriti walikaliti muviti vyawu vya ufalumi pawakala kuluwaga lwa kukomera viboga muligomi lya kwingira kumjini Samalia, shaka ashi wambuyi woseri waweliti wankulaviya umbuyi wawu kulongolu kwawu. 10 Shakapanu yumu gwa Wambuyi awa, Sedekia mwana gwa Kenaana, kalinyawira magoli ga shuma, kalonga, "Mtuwa Mlungu kalonga hangu. Kwa magoli aga, hakawawuziyi kumbeli Wasiria mpaka kuwagamiziya." 11 Wambuyi wamonga woseri waweriti wankulaviya umbuyi ulaawu walonga, "Gugendi gwakagukomangi Ramoti Gileyadi, Mtuwa Mlungu hakakutendi gumkanki mfalumi ayu."

12 Shaka ashi, mlagilagi ulii yakagenditi kumshema Mikaya kamgambiriti, "Guloli wambuyi woseri wankulonga mfalumi hakakanki na gwenga gutendi handa womberi, gumtungiri maheri."

13 Kumbiti Mikaya kamwankula, "Nililapa kwa Mtuwa Mlungu yakawera mkomu, hanimgambili shili hera shakang'ambiriti Mtuwa Mlungu."

14 Su, Mikaya pakasokiti kulongolu kwa mfalumi, mfalumi kamkosiya, "Hashi, tugendi kulikomanga nkondu aku Ramoti Gileadi ama ng'endindiri?"

Mikaya kamwankula, "Gugendi gwakakanki, Mtuwa Mlungu hakagutuli mji agu mumawoku mwaku."

15 Kumbiti mfalumi kamkosiya, "Hanikulapiri mala ninga handa kila pagulonga naneni kwa litawu lya Mtuwa Mlungu, gutakuli ganakaka?"

16 Shakapanu Mikaya kamwankula, "Niwawoniti wantu woseri wa Israeli walipalasiya mumigongu handa wakondolu yawahera mlolera. Na Mtuwa Mlungu kalonga, wantu awa wahera mlongoziya, guwareki wawuyi kila muntu ukaya kwakuyi kwa ponga."

17 Panu mfalumi gwa Israeli kamkosiya Yehoshafati, "Nikugambirandiri, nakaka hapeni katungi maheri kwaneni, ila madoda hera?"

18 Shakapanu Mikaya kalonga. "Vinu gupikanili shisoweru sha Mtuwa Mlungu. Nimwona Mtuwa Mlungu kalivaga mushiti shakuyi sha ufalumi na agawu lishonta lya wantumintumi wa kumpindi ligoloka wamzyengeta uwega wa kumliwu na kumshigi. 19 Mtuwa Mlungu kakosiya, ndo gaa hakamzyangizyangi Ahabu mfalumi gwa Israeli kagendi kakagamili aku Ramoti Gileyadi? Kila yumu kankula ntambu yakaliholiti. 20 Shakapanu, shamshera yumu kagoloka kulongolu kwa Mtuwa Mlungu, kalonga, neni hanimzyangizayangi.’ Mtuwa Mlungu kamkosiya, kwa ntambu gaa? 21 Nayomberi kankula, hang'endi na kuwatenda wambuyi wakuyi woseri walongi mpayu. Mtuwa Mlungu kamgambira, gwenga guweza kumzyangazyanga, gugendi gwakatendi hangu."

22 "Hangu Mtuwa Mlungu kawatenda wambuyi waku woseri watakuli mpayu. Su madoda gakupati gwenga!"

23 Panu mbuyi Sedekia mwana gwa Kenaana kamsegelera Mikaya, kamlapula likofi lyamulisaya shakapanu kamkosiya, "Kwanjira ndii Rohu gwa Mtuwa Mlungu kandeki hashi neni na kiza kuyowera na gwenga?"

24 Mikaya kamwankula, "Lishaka pagwingiraku mushumba sha mng'anti kulififa panu ndo haguvimani."

25 Mfalumi Ahabu kalagalira, "Mmubati Mikaya mmuwuziyi kwa Amoni, mkulu gwa mji na kwa Yoashi, mwana gwa mfalumi. 26 Guwagambiri wamtatiri muligereza na kumliyiziya mabumunda shididni na mashi, mpaka pambuya poneka"

27 Mikaya kalonga, "Paguwuya mkomu, Mtuwa Mlungu kayowerandiri naneni." Shakapanu kendereya kulonga, "Mwawoseri mwenga hamgaholi aga!"

28 Shakapunu, mfalumi Ahabu kagenditi pamuhera na Yehoshafati mfalumi gwa Yuda kugukomanga mji gwa Ramoti Gileyadi. 29 Mfalumi Ahabu kamgambira Yehoshafati, "Pang'enda mnkondu hanvali nguwu za ntambu iraayi, kumbiti gwenga haguvuli nguwu zaku za shifalumi." Hangu mfalumi gwa Israeli kagenda munkondu pota kuvala nguwu za shifalumi.

30 Mfalumi gwa Sria kaweriti kawalagalira wakulu wa mashonta wakuyi yawagolokeriti mbutuka zakuyi za kukwegwa, kawagambira, "Namlikomanga na muntu yoseri ulii kaweri shonta gwa ntambu iraa ama mkulu gwawu, mwenga mmukomangi mfalumi gwa Israeli hera." 31 Wakulu wa mashonta walonguziya mbutuka za nkondu pawamwoniti Yehoshafati, walonga' "Nakaka ayu ndo mfalumi gwa Israeli." Hangu, wagalambuka wamkomangi, kumbiti Yehoshafati kamlilira Mtuwa Mlungu na Mtuwa Mlungu kamtanga. Mlungu kawajega kutali nawawera pakwegera na yomberi. 32 Wakulu wa mashonta yawalonguziya mbutuka za nkondu pawavimaniti handa kaweritindiri mfalumi gwa Israeli, wamlekiti kumfata, wawuya. 33 Kumbiti shonta yumu gwa Sria kawunika upindi wakuyi pota kuvimana kamguma msali mfalumi gwa Israeli palii kushiwungiru sha nguwu ya shuma. Panu Ahabu kamgambira dereva gwa Mbutuka yakuyi, "Gugalambuli mbutuka gumbusiyi munkondu, nyagu ntenduwa nentu." 34 Makomangu gendereyiti paluwala poseri, na mfalumi gwa Israeli kaweriti kaliyegeka mumbutuka agawu pakawalola wamashonta wa Wasiria mpaka pashimihi. Shakapanu mushaka sha pashimihi pamberi pa mshenji kuzyeta, kahowiti.