1 Malikiya gwa Sheba pakapikaniliti zyuma za Selemani, kagenditi Yerusalemu su kumjela Selemani kwa makosiwu makamala. Kalilongoziyiti na wantumintumi wakuyi, pamuhela na ngamiya yawapapiti utuli, zahabu zivuwa nentu na mabuwi ga beyi nkulu. Na pakasokiti kwa Selemani, Kamkosiya makosiyu ga mirandu yoseri yayiweliti mumoyu mwakuyi. 2 Selemani kagankula makosiyu goseri, pakaweritindiri na mlandu goseri gwakasinditi kumgambira. 3 Malikiya gwa Sheba pakawoniti luhala lwa Selemani na Numba zyakakaweliti kazinyawa, 4 kayi pakaloliti shiboga shashitanditwi pameza pakuyi na kuwona wakulu yawaweriti pasi pa Selemani ntambu yawakaliti pameza na wantumintumi wakuyi ntambu yawamtenderiti na ntambu yawavaliti na ntambu yawampananiti vyakulanda ntambu yawalaviyiti tambiku za kulunguziya torosu zyakazilaviyiti Selemani Munumba Nkulu ya Mtuwa Mlungu, pakawoniti goseri kalikangasha nentu.

5 Su, kamgambira mfalumi, "Goseri gampikiniliti muisi mwangu kwajili ya mahengu gaku na luhala lwaku vyoseri ndo vya nakaka! 6 Kumbiti nsinditi kujimira visoweru vyawu mpaka pansokiti na kuliwonera namweni na vinu ng'ambilitwi shididini hera, luhala lyaku na ukulu waku ndo nentu ya galii gampikiniriti. 7 Mbaka wantu waku! Mbaka wakulu wa mashonta waku weni wagoloka kulongolu kwaku na kupikanira luhala lwaku! 8 Kazyumwi Mtuwa Mlungu, Mlungu waku, mweni kafiliziwa na gwenga, kakutula pashiti shakuyi sha ufalumi, guweli mfalumi gukoli pahala pa Mtuwa Mlungu, Mlungu gwaku. Toziya ya Mlungu gwaku kawafira Waisraeli na kuwagangamaziya mashaka goseri, kakutula gwenga guweri mfalumi gwawu su gwenderezi yagafiruwa na yagawera maheri."

9 Shakapanu kampananiti mfalumi nentu ya kilu elufu msheshi za zahabu na sha utuli uvuwa nentu na mabuwi ga beyi nkulu. Hakweni lawili utuli handa awu malikiya gwa Sheba kampananiti mfalumi Selemani.

10 Ntambu iraa, wantumintumi wa Huramu pamuhela na wantumintumi wa Selemani yawajegiti zahabu kulawa Ofiri, wajegiti viraa mbawu ziherepa na mabuwi ga beyi nkulu. 11 Selemani katenderiti mbawu ziherepa azi kunyawara nkweneru za numba ya Mtuwa Mlungu na liboma na viraavirii kanyawiti vinubi na malimba ga wimba. Vintu handa avi havyeniwoneka nakamu muisi ya Yuda.

12 Mfalumi Selemani kampananiti malikiya gwa Sheba kila shintu shakafiliti na kampananiti nentu kutali na vintu vyakamjegeliti mfalumi. Shakapanu malikiya kawukiti kawuya muisi yakuyi pakawera pamuhela na wantumintumi wakuyi.

13 Kila shinja, Selemani kajegeritwi zahabu handa kilu elufu ishilini na tatu, 14 paguleka vintu vimonga na zahabu yakajegiti kulawa kwa yawatenda biyashala na washuwuzi. Villavirii wafalumi woseri wa Arabiya na wakulu wa wakolamlima wamjegeliti Selemani feza na zahabu. 15 Mfalumi Selemani kanyawiti ngawu nkulu miya mbili za zahabu yayiponditwi, kila ngawu iweriti imatikwa zahabu handa kilu saba. 16 Viraa kanyawiti ngawu ndidikandidika miya tatu, kila yimu ityeremikitwi zahabu yayiwera handa kilu ntatu, shakapanu mfalumi kazitula muliboma lyaliweriti kulidowi lya Lebanoni.

17 Viraavirii mfalumi kanyawiti shiti sha ukulu kwa kutendera kumelemetiziwa magoli ga ndembu na kashimatikira kwa zahabu ihelepa nentu. 18 Shiti ashi shiweriti na gweneru sita na shiti sha zahabu sha kutulira magulu, vyoseri avi viweriti vikolaniziwa pamuhela na shiti ashi sha ufalumi na kila uwega kuweriti na pahala pa kutulira mawoku, shakapanu shiweriti na vinyagu viwili vya simba pakwegera na pahala pa kutulira mawoku. 19 Paweliti na vinyagu lilongu na mbili vya simba yawagolokiti pa upeleru pa kila gweneru. Shiti handa ashi hasheni nyawiwi na mfalumi yoseri.

20 Vikombi vyoseri vya mfalumi Selemani viweliti vya zahabu na vyombu vyoseri vyaviweliti muliboma lya kulidowi lya Lebanoni viweliti vya zahabu iherepa. Kuweriti kwahera shintu shashinyawitwi kwa madini ga feza toziya madini ga feza gawoneka kuwera shintundiri mushaka sha mfalumi Selemani. 21 Selemani kaweliti na meli zyaziweriti zyangugenda mpaka Tarishishi na wantumintumi wa Huramu na kila pavipita vinja vitatu, meli azi ziwuyiti pazimjegera zahabu na feza na magoli ga ndembu, wamayani na mpongu yawawashema tawusi.

22 Mfalumi Selemani kawapititi wafalumi woseri wa pasipanu kwa ulunda na kwa luhala. 23 Wafalumi wa isi zoseri waweriti wafiriti kumgendera Selemani su kupikanira luhala lyakuyi lwakapananitwi na Mlungu. 24 Kila shinja yumu gwawu kamjegela mafupu aga mfalumi: vyombu vya madini ga feza na vya zahabu, nguwu na vintu vya kulikomangira nkondu na utuli na farasi na punda farasi.

25 Mfalumi Selemani kaweliti na visasa elufu msheshi vya kutulira farasi na mbutuka na mashonta yawakwena farasi elufi lilongu na mbili, weni kawatuliti mumiji yana pahala pa kutulira mbutuka za kukwegwa na farasi aku Yerusaremu. 26 Selemani kawakolitimlima wafalumi woseri yawaweliti kwanjira lushemba Eufarati, mpaka isi ya Wafiristi na Mpaka mumbaka na Misri 27 Su Selemani katenditi madini ga feza gawonekani handa shintundiri handa mabuwi aku Yerusalemu, mitera ya miyerezi kayitenditi kuwera ivuwa handa mikuyu yayiwera aku pasi pa lugongu lwa Yuda. 28 Selemani kajegelitwi farasi yawahemelitwi kulawa Misri na isi zimonga.

29 Mirandu imonga yakatenditi mfalumi Selemani, kulawa lyanjiru mpaka upeleru, ilembitwi muvitabu vya visoweru vya mbuyi gwa Mlungu Natani, na mu umbuyi wa Ahiya gwa Shilu, na mu malola ga Ido mbuyi gwa Mlungu, viraavirii kana visoweru vya Yeroboamu mwana gwa Nebati. 30 Selemani kakolitimlima isi yoseri ya Israeli kwa vinja arobaini pakawera Yerusalemu. 31 Shakapanu Selemani kahowiti na kufintirwa mumji gwa Dawudi, tati gwakuyi. Rehoboamu, mwana gwakuyi, kakolitimlima pahala pakuyi.