1 Yehoshafati mwana gwa Asa kakolitimlima pahala pa tati gwakuyi, kaligangamaziyiti pakalikomangiti na Israeli. 2 Kawatuliti mashonta gakuyi mukila miji yoseri ya Yuda yayizyengetwa na liboma na mumiji imonga ya Yuda na mumiji ya Efraimu yeni Asa tati gwakuyi kayilopoliti. 3 Mtuwa Mlungu kaweriti pamuhera na Yehoshafati toziya muvinja vyakuyi vya kwanja katenditi gakatenditi Dawudi mbuyi gwakuyi pota kuwaguwira wamlungu Baali. 4 Yomberi kamsakuliti Mlungu gwa Tati gwakuyi na kuzijimira lagiru zakuyi, pota kafatandiri matendu makontola gawatenditi wantu wa Israeli. 5 Mtuwa Mlungu, kawugangamaziyiti ufalumi gwa Yuda mumawoku mwa Yehoshafati na wantu woseri wamjegeliti lifupu, hangu kaweliti mlunda nentu na yakapananitwi ligoya nentu. 6 Moyu gwakuyi gufiriti nentu kumtendera Mtuwa Mlungu na nentu ya aga, kapahalibisiyiti pahala pampindi pawupeleru pakuguwira wamlungu wamonga na vinyagu vya Ashera, mlungu gwa shidala muisi ya Yuda.

7 Mushinja sha tatu sha ukolamlima wakuyi, Yehoshafati kawatumiti wakulu awa: Beni Haili na Obadiya na Zekaria na Netaneli na Mikaya. Wawafundi wantu yawalikala mumiji ya Yuda. 8 Viraavirii walilonguziyiti na Walawi tisa na watambika wawili. Walawi awa waweliti Shemaya na Netania na Zebadia na Asaheli na Shemiramoti na Yehonatani na Adoniya na Tobia na Tobi Adoniya na viraavirii Watambika Elishama na Yehoramu waweriti pamuhera nawa. 9 Washitoliti Shitabu sha lagiru sha Mtuwa Mlungu, watyanga nashi mumiji yoseri ya Yuda agawu pawawafunda wantu.

10 Mtuwa Mlungu kawatula lyoga wafalumi woseri yawaweriti pakwegera na Yuda, womberi watiriti kulikomanga nkondu na mfalumi Yehoshafati. 11 Wafilisti wamu wamjegeriti mfalumi Yehoshafati lifupu pamuhera na feza zivuwa, na Waarabu wamonga naweni wamjegera wakondowu shipalu elufu saba na miya saba na mbuzipongu. 12 Mfalumi Yehoshafati kendereyiti kuwera mkulu ng'anji. Kanyawiti liboma na miji yana hanja, 13 hangu kaweriti na hanja nkulu mumiji ya Yuda.

Aku Yerusalemu, katuliti wanjagira wa mashonta makambaku, 14 aga ndo matawu kulinganira na nkolu za watati wawu: Adina kaweriti mkulu gwa likabira lya Yuda. Pasi pakuyi, kuweriti na wamashonta laki tatu. 15 Gwapili muukulu kaweriti Yehohanani, pakawera na wanjagira laki mbili na semanini elufu, 16 na gwa tatu kaweliti Amasiya mwana gwa Zikiri kaweriti na wanjagira makambaku laki mbili. Amasiya kalilaviya mweni kumtendera Mtuwa Mlungu. 17 Mkulu gwa shipinga sha wamashonta, yawalawiti mulikabila lya Benjamini kaweriti Eliyada, lishonta kagangamala pakawera na wamashonta laki mbili, wana mbindi na ngawu. 18 Yakafatiti kaweriti Yehozabadi, yakaweliti na wamashonta laki yimu na semanini elufu yawalitanditi kala kwa nkondu. 19 Wamashonta woseri awa waweriti wankumtendera mfalumi aku Yerusalemu na viraavirii mfalumi katuliti wamashonta wamonga mumiji imonga ilii yana liboma poseri muisi ya Yuda.