1 Shakapanu wantu woseri wa Yuda wamtoliti Uzia mwana gwakuyi Amazia yakaweriti kana vinja lilongu na sita, wamtenda kuwera mfalumi pahala pa Amazia tati gwakuyi. 2 Pakahowiti tati gwakuyi kagulopuliti mji gwa Eloti na kugunyawa kayi.

3 Uzia kanjiti kukolamlima pakawera na vinja lilongu na sita, kakolitimlima kwa vinja hamsini na mbili aku Yerusalemu. Mawu gwakuyi kashemitwi Yekolia yakalawiti Yerusalemu. 4 Katenditi maheri kulongolu kwa Mtuwa Mlungu ntambu yakatenditi tati gwakuyi Amazia. 5 Kamsakula Mlungu mumashaka ga Zekaria, yakaweriti kamfunda mfalumi ntambu ya kumguwira Mlungu. Shaka shoseri pakamsakuliti Mtuwa Mlungu, Mlungu kamtendera.

6 Uzia kagenditi kulikomanga nkondu na Wafiristi, kavibomola vibambaza vya mji gwa Gati na Yabine na Ashidodi. Kanyawa kayi miji yayiweriti pakwegera na Ashidodi na imonga muisi ya Filisti. 7 Mlungu kamtangiti kuwakanka Wafilisiti na Waarabu yawalikaliti Guribaali na Wamewuni. 8 Waamoni wampananiti kodi na zyuma zakuyi zigenditi mpaka Misri, toziya ufalumi wakuyi uweriti na makakala.

9 Shakapanu Uzia kanyawiti kayi vindwalingu mu Yerusalemu paligomi lya pabwega na ligomi lya lulalanda na pabwega pa shibambaza na kuyigangamiziya. 10 Viraavirii kanyawiti vindwalingu aku kushiwala, shakapanu kabawa matanda gavuwa, toziya kaweriti na wankanyama wavuwa yawaweriti kuvidunda na kululalanda. Kaweriti na walimi yawalolera mizabibu mumigongu na mulitapaka lyana mbotu toziya kafiliti nentu kulima.

11 Nentu ya aga, Uzia kaweriti na lishonta lyaliweriti kala kwa nkondu. Liweriti libagulwa muvipinga gwekagweka na walanga yawu itulitwi na mlemba Yeieli na mkulu gwawu Maaseya waweriti walonguziwa na Hanania, yumu gwa wakulu wa mashonta wakuyi mfalumi. 12 Wakulu woseri wa mashonta waweriti elufu mbili na miya sita. 13 Pasi pawu, kuweriti na lishonta lya wanjagira laki tatu na elufu saba miya mhanu, wana uwezu mkulu wa kumgendera mnkondu yoseri gwa mfalumi. 14 Uzia kawapananiti wamashonta awa ngawu na mikuki na kofia za shuma na nguwu ya shuma na upindi na nkulungu za luhembelu. 15 Aku Yerusalemu wantu wakuyi wamnyawiriti mashini yagatendiritwi muvindwalingu na kulawa muvisoku vya mji su kugumira misali na mabuwi makulumakulu. Zyuma zakuyi zigenditi kila pahala na makakala gakuyi gongelekiti ng'anji toziya ya utanga uvuwa wakapatiti kulawa kwa Mlungu.

16 Mfalumi Uzia pakaweriti na makakala, kaweriti kalidumba na kudumba aku kumjegeriti kwagamira kwakuyi. Kamgalambuka Mtuwa Mlungu, Mlungu gwakuyi kwa kwingira Munumba Nkulu ya Mlungu, su kutumiziya ubani mushitalawanda sha kutumiziya ubani. 17 Kumbiti mtambika Azaria, pamuhela na watambika wamonga wagangamala semanini, wamfata mfalumi, 18 mngati amu wamlewelera, wamgambira, "Uzia ali lihengu lyakundiri lya kumtumizilira ubani Mtuwa Mlungu. Ndo watambika hera wa wiwuka wa Aruni weni walumikwa kutumiziya ubani. Gulawi pahala panu Pananagala, toziya gumtendera vidoda Mtuwa Mlungu na hapagupati ligoya lyoseri kulawa kwakuyi."

19 Shaka ashi, Uzia kaweriti kagoloka Munumba Nkulu ya Mlungu pakwegera na shitalawanda, kabata shetezu sha kutumiziya ubani mumawoku mwakuyi. Kawakalaziya watambika na panu pakawakalaziyiti kabatitwi na ungumbula pasheni pakuyi palongolu pa watambika awa. 20 Azaria, mtambika mkulu na walii watambika wamonga, pawamloliti wamwona kana ungumbula pasheni pakuyi, Shakapanu watenditi kalongola kumlaviya kunja. Na mweni katenda kalongola kulawa kunja, toziya Mtuwa Mlungu kaweriti kamkomanga.

21 Su, mfalumi Uzia kaweriti na ungumbula mpaka lishaka lya kuhowa kwakuyi. Kakaliti munumba gweka yakuyi na kabelitwi kwingira Munumba Nkulu ya Mtuwa Mlungu. Na Yotamu mwana gwakuyi, kaweriti kagolokera liboma lya mfalumi na kawalonguziya wenikaya wa isi ya Yuda.

22 Mirandu imonga yoseri ya mfalumi Uzia kulawa lyanjiru mpaka upeleru, ilembitwi na mbuyi gwa Mlungu Isaya mwana gwa Amozi. 23 Uzia kahowiti na kufintirwa pakwegera na pawawafintiritwi wafalumi, toziya walonga, "Mweni kana ungumbula". Na Yotamu mwana gwakuyi, kakolitimlima pahala pakuyi kuwera mfalumi.