1 Rehoboamu pakasokiti Yerusalemu, kawajojonira na kuwatanda wamashonta yawamana kulikoma nkondu laki yimu na semanini kulawa makabila ga Yuda na Benjamini, walikomangi na Waisraeli, su kagawuziyi makabila ga kushana muwukolamlima wakuyi. 2 Kumbiti ulagilagi wa Mlungu umwiziliti Shemaya muntu gwa Mlungu, ulonga, 3 "Mmugambili Rehoboamu mwana gwa Selemani, mfalumi gwa Yuda na Waisraeli woseri mu Yuda na Benjamini kuwera, 4 Neni Mtuwa nonga, namgenda kulikomanga na walongu wenu. Kila muntu kawuyi ukaya kwakuyi, toziya mlandu agu gulawa kwa neni." Su wajimiliti ulagilagi wa Mtuwa Mlungu, wawuyiti ukaya na wagendandiri kulikomanga na Yeroboamu.

5 Rehoboamu kalikaliti Yerusalemu na kanyawiti shibambaza na kuyizyengeta miji ayi yayiweriti muisi ya Yuda. 6 Miji yayinyawitwi ndo, Beterehemu na Etamu na Tekoya, 7 Beti Suri na Soko na Adulamu, 8 Gati na Maresha na Zifu, 9 Adoraimu na Lakishi na Azeka, 10 Sora na Ayaloni na Hebroni. Miji ayi ndo yayizengetiziwa shibambaza mumji gwa Yuda na Benjamini. 11 Kayizyengetiriti shibambaza miji ayi na mngati amu kawatula wakulu wa mashonta na hanja za viboga na lipaki lya mizeyituni na divayi. 12 Mungati mwa kila mji, katuliti ngawu na migowa na kuyitenda miji ayi kuwera igangamala nentu. Hangu wantu wa Yuda na Benjamini walonguziwitwi na yomberi.

13 Watambika na Walawi woseri kulawa makabila goseri ga kushana wahamiriti Yuda na waweriti pamuhera na Yeroboamu. 14 Walawi wagalekiti malambu gawu ga kulolelera na vintu vyawu vimonga, wagenda Yuda na Yerusalemu, toziya Yeroboamu na wana wakuyi wawaberiti kumtendera Mtuwa Mlungu handa watambika wa Mtuwa Mlungu. 15 Yeroboamu kalisyagulira watambika wakuyi mweni watendi lihengu kushitalawanda sha kuguwira sha pampindi pakutambikira wamlungu na vinyagu vya mbuzi na ng'ombi vyakalinyawiriti. 16 Wantu woseri yawana moyu gwa kumguwira Mtuwa Mlungu, Mlungu gwa Israeli, kulawa makabila goseri ga kushana, walilonguziyiti na Walawi mpaka Yerusalemu wamlaviliri tambiku Mtuwa Mlungu, Mlungu gwa wambuyi wawu. 17 Wawugangamaziyiti ufalumi wa Yuda na kwa shaka sha vinja vitatu, wawera pamuhera muukolamlima wa Yeroboamu mwana Selemani, weni uwera ugangamala na walikala ntambu yawalikaliti mashaka ga mfalumi Dawudi na mashaka ga mfalumi Selemani.

18 Rehoboamu kayugiti mdala yawamshemiti Mahalati, mhinga gwa Yeremoti, Yeremoti ayu kaweriti mwana gwa Dawudi. Mawu gwakuyi Yeremoti wamshemiti Abihaili mhinga gwa Eliyabu, mwana mpalu gwa Yese. 19 Mahalati kamwiwuliriti Yeroboamu wana watatu wapalu, Yeushi na Shemaria na Zahamu. 20 Shakapanu, Rehoboamu kamyugiti Maaka mhinga gwa Abisalomu na yomberi kamwiwuliriti wana wapalu msheshi, Abiya na Atai na Ziza na Shelomiti. 21 Rehoboamu kayugiti wadala lilongu na nani na wadala wa kunja sitini, kalela wana wapalu ishilini na nani na wana wahinga sitini. Muwamu mwa wadala wakuyi woseri na wadala wa kunja, kamfiliti nentu Maaka mhinga gwa Abisalomu. 22 Rehoboamu kamsyagula Abiya, mwana gwa Maaka, kawalonguziya walongu wakuyi, toziya kafiliti kumtenda kaweli mfalumi. 23 Rehoboamu katenditi mlandu gwa luhala, pakawapalasiya wamu wa wana wakuyi muisi yoseri ya Yuda na Benjamini kawatula mumiji yoseri yayizengekitwi liboma. Kawapananiti viboga vivuwa na viraavirii kawayugiziya wadala wavuwa.