1 Amaziya kaweriti na vinja ishilini na mhanu pakanjiti kukolamlima, kakolitimlima kwa shaka sha vinja ishilini na tisa kumji gwa Yerusalemu. Mawu gwakuyi kashemitwi Yehoadani yakalawira Yerusalemu. 2 Katenditi yagawera maheri kulongolu kwa Mtuwa Mlungu kumbiti katendandiri kwa moyu gwakuyi goseri. 3 Ufalumi wa Amaziya pawanjiti kuligangamaziya muukulu kawalagiti wantumintumi yawamlagiti mfalumi Yowashi, tati gwakuyi. 4 Kumbiti kawalagitindiri wana walii yawamlagiti tati gwakuyi, ntambu yagalembitwi mushitabu sha lagiru lya Musa, palii Mtuwa Mlungu pakalagaliriti, "Walera wakuyi hapeniwalaguwi kwavidoda vyawatenditi wana wawu na mwana hapenikalaguwi kwa vidoda vyawavitenditi walera wawu ila kila muntu hakalagwi kwa vidoda vyakuyi vyakatenditi."

5 Mfalumi Amaziya kawajojonira wapalu wa makabila ga Yuda na Benjamini, kawatuliti muvipinga gwekagweka kulinganira na nkolu zawu na aku kawatula pasi pa wakulu wa mashonta yawalonguziyi wantu elufu yimuyimu na wakulu wamonga yawalonguziya wantu miyamiya. Kulinganira na nkolu zawu. Shakapanu kawalanga wantu walii wana vinja ishilini na kwendeleya, kapatiti walanga ya wantu laki tatu. Woseri waweriti wantu wayaweriti kala kugenda kunkondu, waweriti wagangamala wa kutendera migowa na ngawu. 6 Kayi kakodishiti wamashonta wamonga makambaku elufu yimu kulawa Israeli, kwa shiyasi sha handa kilu elufu tatu za feza. 7 Kumbiti muntu gwa Mlungu kamgenderiti kamgambira, "Gwee mfalumi, nagugenda munkondu pamuhera na awa wamashonta wa Israeli, toziya Mtuwa Mlungu kapamuherandiri na twenga na wantu wa Israeli, na kapamuherandiri na wantu woseri awa wa Efraimu. 8 Hangu, ata paguwera mgangamala munkondu, Mlungu hakakutendi gusindi kulongolu kwa wankondu waku, toziya Mlungu kanaga makakala ga kukutanga ama kukugusiya."

9 Amazia kamkosiyiti muntu ayu gwa Mlungu, "Vinu tutendi hashi na mpiya zoseri zyeni tuwalipiti kala wamashonta wa Israeli?"

Muntu gwa Mlungu kamwankula, "Mtuwa Mlungu kaweza kukupanana mpiya nentu ya azi." 10 Su Amazia kawalekera wamashonta yakawakoditi kulawa Efraimu wawuyi ukaya kwawu. Su wawuya ukaya kwawu agawu pawawakalalira nentu wantu wa Yuda.

11 Amazia kalipananiti moyu kalilongoziya lishonta lyakuyi mpaka lulalanda lwa Munu. Aku kalikomangiti na kuwalaga wamashonta elufu lilongu wa Edomu. 12 Wawabatiti wamashonta elifu lilongu wawakweniziya pampindi pa unenemu na wawagumira pasi mumatalawu,womberi wapantika vipandivipandi.

13 Shaka shilaashi, wamashonta wali wa Waisraeli weni Amazia kawaleka wawuyi ukaya kwawu yakawaleweleriti nakagenda nawu kunkondu, wagenditi na kuyikomanga miji ya Yuda, kulawa Samaria mpaka Beti Horoni, wawalagiti wantu miya tatu na walopoliti vintu vivuwa ng'anji.

14 Amazia pakawuyiti kuwakanka wantu wa Edomu, kawajegiti wamlungu wa wantu wa aku Seiri kayitenditi kuwera wamlungu wakuyi, kayisuntamalira na kuyitumizilira ubani. 15 Aga gamkaliziya ng'anji Mtuwa Mlungu, katumiti mbuyi kwa Amazia. Mbuyi ayu kamkosiyiti Amazia, "Ntambugaa gwankuwaguwira wamlungu wa wantu wamonga, weni wawezandiri kuwalopola wantu wakuyi kulawa mumawoku mwaku?"

16 Kumbiti ata kenimaliliri kuyowera, Amazia kamdumula, kamgambira, "Gunyamalili! Tukutendandii mtakuziya gwa mfalumi?

Hashi gufira kulaguwa?"

Mbuyi ayu kalonga, "Nivimana kuwera Mlungu kafira Kukulaga toziya gutenda goseri aga na gubeziya shantakuliti neni, shakapanu kanyamala."

17 Su, Amazia mfalumi gwa Yuda kalongiti na wantu wakuyi, shakapanu kawutumiti ulagilagi kwa Yehoashi, mwana gwa Yehoahazi mwana gwa Yehu mfalumi gwa Israeli, kamgambira, "Gwizi tulikomangi." 18 Kumbiti Yehoashi mfalumi gwa Israeli kamjegeriti ulagilagi Amazia pakalonga, "Shaka shimu, misontu ya mbigili ya Lebanoni iyigambiriti Mwerezi gwa aku Lebanoni, gumyugiziyi mhinga gwaku mwana gwangu!’ Kumbiti shigongolu gwa kuntuntu kapititi palii na katimbanga misontu ayi. 19 Gwenga Amazia gulonga guwakanka Waedomu na gulidumba. Kumbiti nikugambira gulikali pakaya paku! Ntambu gaa gulisakulila ntabiku zyakukwagamiziya gwenga gamweni pamuhera na wantu waku wa Yuda?"

20 Kumbiti Amazia kapikiniritindiri ashi na Mtuwa Mlungu katenditi hangu su kalaguwi mumawoku mwa Yehoashi, toziya Amazia kawaguwiriti wamlungu wa Edomu. 21 Hangu Yehoashi, mfalumi gwa Israeli kakweniti kalikomanga na Amazia, mfalumi gwa Yuda. Yehoashi na Amazia mfalumi gwa Yuda waliwoniti sheni kwa sheni aku Beti Shemeshi, muisi ya Yuda. 22 Waisraeli wawakomiti wantu wa Yuda na kila yumu katugiriti ukaya kwakuyi. 23 Hangu Yehoashi mfalumi gwa Israeli kambatiti Amazia mfalumi wa Yuda, mwana gwa Yehoashi, mwana gwa Ahazia aku Beti Shemeshi, kamjegiti mpaka Yerusalemu. Aku, kashibomoliti shibambaza sha Yerusalemu, kwanjira ligomi la Efraimu mpaka ligomi la pambwega, utali wakuyi uweriti mita miya mbili. 24 Katoliti zahabu yoseri na feza ata na vitu vyoseri vyaviweriti mu Numba Nkulu ya Mtuwa Mlungu pasi pa ulolera wa Obedi Edomu, kayi katoliti ulunda woseri wa kuliboma. Viraa katola wantu yawabatitwi, shakapanu kawuya Samaria.

25 Amazia mfalumi gwa Yuda kakaliti vinja lilongu na mhanu pa kahowiti kala mfalumi Yehoashi mwana gwa Yehoahazi mfalumi gwa Israeli. 26 Mirandu imonga yoseri ya Amazia kulawa lyanjiru mpaka upeleru ilembitwi mu shitabu sha visoweru za Wafalumi wa Yuda na Israeli. 27 Shitendu sha kumlaga Amazia shitenditwi aku Yerusalemu kwanjira pakamlekiti Mtuwa Mlungu, su katugira Lakishi. Kumbiti wankondu wakuyi wawatumiti wantu Lakishi na wamlagira aku. 28 Mauti gakuyi gajegitwi pampindi pa farasi na wamfintiriti Yerusalemu kumji gwa Dawudi, kwawafindilitwi wambuyi wakuyi.