1 Mfalumi Selemani pakamaliliti kuluwa kwakuyi, motu gusulukiti kulawa kumpindi na gulunguziyiti nakamu vintu vyavilaviwitwi na tambiku za kulunguziwa, shakapanu uweru wa Mtuwa Mlungu umemiziya Numba Nkulu ya Mlungu. 2 Toziya uweru wa Mlungu umemiti Munumba Nkulu ya Mlungu ayi, watambika wasinditi kwingira amu. 3 "Wantu woseri wa Israeli pawawoniti motu gusuluka kulawa kumpindi na uweru wa Mtuwa Mlungu umemiziya Numba Nkulu ya Mlungu ayi, wasuntamaliti makukama, wamguwira na kulonga mayagashii Mtuwa Mlungu, pawalonga,

toziya yomberi ndo muheri

na Ufiru wakuyi ulikala mashaka goseri." 4 Shakapanu mfalumi Selemani na wantu woseri wamlaviliriti Mlungu tambiku. 5 Na Selemani kamlaviliriti Mtuwa Mlungu, wang'ombi elufu ishilini na mbili na wakondolu laki yimu na elufu ishilini. Hangu ndo Selemani na wantu wakuyi ntambu yawailumikiti Numba Nkulu ya Mlungu. 6 Watambika wagolokiti pahala peni pawalagaliritwi kugoloka na Walawi wagolokiti pawawera na vyombu vya msambu vya Mtuwa Mlungu vyakanyawiti mfalumi Dawudi kwajili ya kulonga mayagashi Mtuwa Mlungu. Shakapanu wimbiti, "Toziya ufiru wakuyi wa mashaka goseri!" Ntambu yakawalagaliriti Dawudi. Watambika wagombiti mapenga aku Waisraeli woseri pawaweri wagoloka.

7 Mfalumi Selemani kalulumika luwaga lwaliweriti kulongolu Kunumba Nkulu ya Mtuwa Mlungu, toziya peni ndo pakalaviyiti tambiku za kulunguziwa ya mabenangu na lipaki na tambiku za ponga toziya pashitalawanda sha shaba patoshayandiri kwa tambiku zoseri azi.

8 Hangu Selemani kwa shaka sha mashaka saba katenditi msambu gwa mabenangu pamuhera na lijojoniku likulu lya wantu woseri wa Israeli wantu walawiti Lebo Hamati uwega wa kushana mpaka lushemba lwa Misri. 9 Mulishaka lya nani, wajojonikiti kutenda guwira ya gweka pamashaka saba zyawatenderiti kutakasiya meza ya malaviwu na shakapanu waweriti na mashaka saba gamonga ga msambu, 10 Mulishaka lya ishilini na tatu lya mwezi gwa saba, mfalumi Selemani kawagambiriti kwaheri wantu wagendi ukaya kwawu, pawanemelera na kukalamuka mumoyu mwawu toziya ya maheri geni Mtuwa Mlungu kawapananiti Dawudi na wantu wakuyi Israeli.

11 Su, mfalumi Selemani kamaliliti kunyawa Numba Nkulu ya Mtuwa Mlungu na liboma, kafanikiwiti kutenda goseri galii gakafiriti kuyitendera Numba Nkulu ya Mtuwa Mlungu na liboma. 12 Shakapanu Mtuwa Mlungu kamlawiliti Selemani pashiru, kamgambira "Mpikanira luwa yaku na nipasyagula pahala panu paweli Numba Nkulu ya Mlungu ya kundavilira tambiku. 13 Paniwima mvula ama paniwajegera wanjombi walii vimeru vyawu ama pawagapata malweri makulu, 14 handa wantu waneni yawashemwa kwa litawu lyangu pawalinanagaziya na pawaluwa na pawansakula na kuleka njila zawu zidoda, su, neni haniwapikanili kulawa kumpindi, haniwalekezi vidoda zawu na kuyinemeziya isi yawu. 15 Vinu haniyiloleli Numba Nkulu ya Mlungu ayi na kupikanira maluwa yagatendeka pahala panu, 16 niyisyagula na kuyitakasiya Numba Nkulu ya Mlungu ayi su wantu waneni wanguwiri neni panu mashaka goseli. Haniyiloleli na kuyifira mashaka goseli. 17 Na gwenga, handa paguntendera kwa uwaminika ntambu yakatenditi tati gwaku Dawudi, pagutenda goseli ganikugambiriti na kugajimira, 18 na neni hanishigangamiziyi shiti shaku sha ufalumi ntambu yantenditi lipatanu na tati gwaku Dawudi, palii panimugambiriti, hapeni gukosi muntu gwa kukolamlima israeli. 19 Kumbiti pamleka kunfanta, na kuleka lagiru zyangu zyaniwapananiti na amuri zyaniwapananiti na kugenda kuwatendera wamlungu wamonga na kuwaguwira, 20 toziya ayi neni haniwalaviyi kulawa isi ayi yaniwapananiti. Viraavirii na Numba Nkulu ya Mlungu yeni ayi niyilumika kwajili yangu haniyilemi na kuyitenda shintu sha kujongelwa na kubeziwa na wantu wa isi zoseri."

21 "Na kwa Numba Nkulu ya Mlungu ayi nkwisuwa, kila yakapita pakwegera hakalilimuki na kukosiya, ntambugaa Mtuwa Mlungu katenda hangu kwa wantu awa na kwa numba ayi? 22 Wantu wamonga hawankuli, toziya wamlekiti Mtuwa Mlungu, Mlungu gwa wambuyi wawu yakawalaviyiti muisi ya Misri, walikolelana na wamlungu wamonga, wayiguwira na kuyitendera. Hangu Mtuwa Mlungu kawajegela matenduwa goseri aga."