1 Shakapanu Yehoshafati kahowiti na kufintirwa pamuhera na mbuyi wakuyi mumasembi ga shifalumi mumji gwa Dawudi na Yehoramu mwana gwakuyi kakolamlima pahala pakuyi.

2 Walongu wakuyi Yehoramu, wana wa Yehoshafati waweriti: Azaria na Yehieli na Zakaria na Azariahu na Mikaeli na Shefatia. 3 Tati gwawu kawapananiti lifupu likulu lya feza na zahabu na vintu vimonga vya beyi nkulu na viraa kawapananiti miji ya Yuda yana liboma. Toziya Yehoramu kaweriti shipantanjira, Yehoshafati kampananiti ufalumi kakolimlima pahala pa yomberi. 4 Yehoramu pakalivagiti mushiti sha ufalumi na ufalumi wakuyi pawuweriti ugangamala, kawalagiti walongu wakuyi woseri kwa ligumba na viraavirii wamu wa wakulu wa Israeli.

5 Yehoramu kanjiti kukolamlima pakaweriti na vinja selasini na mbili. Kakolitimlima pakawera aku Yerusalemu kwa vinja vinani. 6 Kazifatiti njira zidoda za wafalumi wamonga wa Israeli ntambu yatenditi mfalumi Ahabu, toziya kaweriti kamyuga mhinga gwa Ahabu. Katenditi makontola kulongolu kwa Mtuwa Mlungu, 7 kumbiti Mtuwa Mlungu kafilitindiri kulwagamiziya lukolu lwa Dawudi toziya ya lipatanu lyakalitendi na Dawudi na viraavirii toziya Mtuwa Mlungu katakuliti kuwera wiwuka wa Dawudi haukolimlima mashaka goseri.

8 Shaka sha ukulu wa Yehoramu, wantu wa Edomu walemiti kukolwamlima na isi ya Yuda, walitulira mfalumi gwawu weni. 9 Su, Yehoramu pamuhera na wakulu wa mashonta na mbutuka zakuyi zyakukwega na farasi walokiti kugenda kwa Waedomu, Kumbiti Waedomu wawazyengeta na kuwakomanga na kuwankaka. 10 Hangu wantu wa Edomu walema kukolwamlima na Yuda mpaka vinu. Shaka shiraashi, wenikaya wa Libina naweni walemiti kukolwamlima na yomberi, toziya Yehoramu kamlemiti Mtuwa Mlungu, Mlungu gwa wambuyi wakuyi. 11 Kayi, kanyawiti pahala pa kuguwira wamlungu wamonga mu vigongu vya Yuda na kuwatenda wenikaya wa Yerusalemu kukosa waminika na kuwapotuziya wantu wa Yuda.

12 Mfalumi Yehoramu kankiti luhamba kulawa kwa mbuyi gwa Mlungu Elia yalulonga hangu, "Mtuwa Mlungu, Mlungu gwa mbuyi gwaku Dawudi, kalonga gwenga gutendandiri ntambu yakatenditi tati gwaku Yehoshafati, ama Asa mfalumi gwa Yuda, 13 kumbiti gufata njira ya wafalumi wa Israeli. Guwalongoziya wantu wa Yuda na Yerusaremu nawawera waminika kwa Mlungu handa wafalumi wa lukolu lwa Ahabu ntambu yalutenditi aku Israeli. Viraa guwalagiti walongu wakuyi na walongu wa tati gwaku weni waweriti wantu waheri nentu kuliku gwenga. 14 Toziya ayi, Mtuwa Mlungu hakawakomangi wantu waku, wana waku na wadala waku na kuzihalibisiya lunda zaku zoseri. 15 Gamwenigwenga hagulwali malweri madoda ga mtima, ulweri awu hawuwutendi utumbu waku ulawi kunja.’ "

16 Kuweriti na Wafilisti na waarabu wavuwa yawaweriti walikala pakwegera na Waisiyopia. Mtuwa Mlungu kawasongiziyiti awa su walikomangi na Yehoramu. 17 Su, wayikomangiti isi ya Yuda, watola vintu vyoseri vyaviweriti munumbu ya mfalumi na kuwatola lopola wana wakuyi woseri na wadala wakuyi, ira Ahazia, mwana mpalu mpusu wamtolandiri.

18 Pagapititi goseri aga, Mtuwa Mlungu kamjegera mfalumi ulweri wa mtima wawuponekandiri. 19 Kendereyiti kulwala na ulweri wakuyi uwera wakongereka lishaka kwa lishaka na ata kusoka upeleru wa shinja sha pili utumbu wakuyi ulawa, shakapanu kahowiti kwa kutama nentu. Wantu wapambitindiri motu kulilira kuhowa kwakuyi ntambu yawatenditi kwa wambuyi wakuyi.

20 Yehoramu kanjiti kukolamlima pakawera na vinja selasini na mbili, kakolamlima kulawa Yerusalemu kwa shaka sha vinja vinani. Pakahowiti kwahera muntu yoseri yakamuhinginiziyiti. Shakapanu kafintiritwi mumji gwa Dawudi, kumbiti mumasembindiri ga wafalumi.