1 Ahazi kanjiti kukolamlima pakaweriti na vinja ishilini, kakolitimlima kwa shaka sha vinja kumi na sita aku Yerusalemu. Yomberi, katenditindiri maheri ntambu yakatenditi Dawudi mbuyi gwakuyi, kumbiti katenditi makontola kulongolu kwa Mtuwa Mlungu. 2 Katenditi galagalii gawatenditi wafalumi wa Israeli. Viraavirii kanyawiti vinyagu vya wamlungu Baali na kuviguwira. 3 Katumiziya ubani kululalanda lwa Hinomu na kuwalunguziya nakamu wana wakuyi handa tambiku, pakajera shitiba sha kukalaziya sha wantu yawawingitwi na Mtuwa Mlungu shaka Waisraeli pawaweriti wakwingira muisi. 4 Kalaviya tambiku na kutumiziya ubani pahala pampindi pa kuguwira wamlungu wamonga, pamigongu na pasi pa kila mtera gwana shivuniru.

5 Mtuwa Mlungu, Mlungu gwakuyi, kamlekiti mfalumi Ahazia kakomangwi na mfalumi gwa Sria. Wasiria wamkomiti na wawabata wantu wakuyi na kuwuya nawa Damasiku. Viraa kamtenditi kasindwi na mfalumi gwa Israeli, yakawalagiti wantu wakuyi wavuwa. 6 Peka mwana gwa Remalia kawalagiti wamashonta makambaku wa Yuda laki yimu na elufu ishilini mulishaka limu. Ilawiliti hangu toziya wantu wa isi ya Yuda wamlekiti Mtuwa Mlungu, Mlungu gwa Wambuyi wawu. 7 Lishonta yumu gwa Israeli yawamshemiti Zikiri shikambaku gwa Israeli, kamlagiti Maaseya, mwana gwa mfalumi Ahazi, viraavirii kawalagiti Azirikamu mkulu gwa lishonta gwa liboma na Elikana yakaweriti muntu gwa pili kwa ukulu pasi pa mfalumi. 8 Wamashonta wa Israeli wawatoliti lopola walongu wawu wantu wa Yuda, wantu laki mbili pawawera wadala na wana. Viraavirii wapokiti lunda zawu zivuwa na kuwuya nazi Samaria.

9 Kumbiti kuweriti na muntu yumu litawu lakuyi Odedi, mbuyi gwa Mtuwa Mlungu, kaweriti kalikala Samaria. Mweni kalawiti kuwanka wamashonta wa Israeli na lopola kulawa Yuda yawaweriti wankuwuya Samaria, kawagambira, "Mtuwa Mlungu, Mlungu gwa wambuyi wenu, kawakalaliriti wantu wa Yuda, hangu kawaleka wabatwi na mwenga kumbiti mwenga muwalaga nakamu kwa maya, shitendu ashi shimfikila Mlungu kumpindi. 10 Vinu mfira kuwatenda wapalu na wadala wa Yuda na Yerusalemu waweri wamanda wenu. Kumbiti maweni mwenga mvimanandiri kuwera mmutendera madoda Mtuwa Mlungu, Mlungu gwenu? 11 Vinu mpikaniri galii ganiwagambiziya! Muwawuziyi walongu wenu na wadada wenu yamuwabatiti, toziya maya ikalipa nentu ya Mtuwa Mlungu hayiwizili."

12 Wakulu wa Efraimu, ashina Azaria mwana gwa Yohanani na Berekia mwana gwa Meshilemoti na Yehizikia mwana gwa Shalumi na Amasa mwana gwa Hadilai viraa wawalongiti awa yawalawiti kunkondu 13 Wawagambira, "Namuwajega panu walopola awa! Tutenda kala makontola kulongolu kwa Mtuwa Mlungu viraa tumkalaziya nentu su katukomanga. Toziya gaa mfira makontola getu gongereki?." 14 Hangu, wamashonta wawalekiziya wantu wawu yawawalopoliti na vintu vyawawapokiti kulongolu kwa wakulu na wantu woseri. 15 Wakulu walii yawakanditwi matawu gawu wawavalisiya nguwu walopola walii yawalikaliti shivula, shakapanu wawapananiti vilwatu na shiboga na virandu na kuwaswaga lipaki lya mizeituni muvilonda vyawu. Walii yawahela makaka, wawakweniziya mupunda, wawajegiti lopola woseri mpaka Yeriku, mji gwa mitendi, kwa walongu wawu, shakapanu womberi wawuya Samaria.

16 Shaka ashi mfalumi Ahazi kawatumiti walagilagi kwa mfalumi gwa Ashuru kamtangi, 17 toziya wantu wa Edomu waweriti wankwiza kayi, wayikanka isi ya Yuda, wawabatiti na kuwuka nawa. 18 Mushaka shiraa ashi Wafilisti wiziti kuyikomanga miji yayiweriti pasi pavigongu vya Yuda na Negebu. Wayilopola Beti Shemeshi na Ayaloni na Gederoti na Soko na Timina na Gimzu pamuhera na vijiji vyakuyi na kulikala amu. 19 Mtuwa Mlungu kayisulusiya isi ya Yuda toziya ya Ahazi mfalumi gwa Israeli, hangu kongera ukontola mu Yuda na kamlekiti Mtuwa Mlungu. 20 Tigilati Pileseri, mfalumi gwa Ashuru kiziti kumgaziya pa kumtanga. 21 Ahazi katoliti zahabu kulawa Munumba Nkulu ya Mlungu na kuliboma na mnumba za wakulu, kampanana mfalumi gwa Ashuru handa kodi su kamtangi, kumbiti mlandu agu viraa gumtangandiri shintu.

22 Pakaweriti mumashaka gakuyi ga ntabiku, mfalumi Ahazi kendereyiti kumleka Mtuwa Mlungu. 23 Kawalavilira litambiku wamlungu wa Damasiku yawaweriti wamkomanga kunkondu, pakalonga, "Toziya wamlungu wa Sria wawatangiti wafalumi wa wawu, haniwalavaliri tambiku pamonga hawantangi." Kumbiti wamlungu awa wamgusiyiti Ahazi na isi yoseri Israeli yagamiriti. 24 Viraavirii, kavitoliti vintu vyoseri vya Numba Nkulu ya Mlungu na kavipandangapandanga, shakapanu kayitata migomi ya numba ya Mtuwa Mlungu na kulinyawira shitalawanda mukila pembi ya Yerusalemu. 25 Mukila mji gwa Yuda, kanyawiti pahala pa mbindi pakulavilila tambiku kwa wamlungu wamonga. Kwa kutenda hangu, kamkaliziya Mtuwa Mlungu, Mlungu gwa Wambuyi wakuyi.

26 Mirandu yakuyi imonga na njira zakuyi zoseri, kulawa mwanjiru mpaka upeleru, galembitwi mu shitabu sha Wafalumi wa Yuda na Israeli. 27 Shakapanu mfalumi Ahazi kahowiti, kafintirwa kumji gwa Yerusalemu, kumbiti kafintirwandiri mumasembi ga wafalumi wa Israeli. Hezekia mwana gwakuyi, kakolitimlima pahala pakuyi.