1 Hangu mfalumi Selemani kamaliriti lihengu lyoseri lya Numba Nkulu ya Mlungu. Shakapanu Selemani kajega vintu vyoseri vyeni Dawuda tati gwakuyi kaweriti kavilaviya kwa Mlungu. Vintu avi ndo, feza na zahabu na vyombu vivuwa, kavitula muluhanja lya Numba Nkulu ya Mlungu.

2 Shakapanu mfalumi Selemani kawashema aku Yerusalemu wakulu woseri wa makabira na nkolu za Israeli walijegi lisanduku lya lipatanu lya Mtuwa Mlungu kulawa mulushi lwa Dawudi, lweni lushemwa Siyoni kulijega Kunumba Nkulu ya Mlungu. 3 Wantu woseri wa Israeli waliwoniti kulongolu kwa mfalumi mumsambu gwa mwezi gwa saba. 4 Walonguziya woseri wa Israeli pawasokiti, Walawi wapapiti lisanduku lya lipatanu. 5 Walawi na watambika walihamiziyiti Lisanduku lya Lipatanu na Liringu Linanagali na vyombu Vinanagala vyoseri vyaviweriti mliringu amu. 6 Mfalumi Selemani na shipinga sha Israeli wajonjonikiti kulongolu Kulisanduku lya Lipatanu shakapanu walaviyiti tambiku za wang'ombi na wakondolu yawawalangikandiri. 7 Shakapanu watambika waliyingiziya Lisanduku lya Lipatanu lya Mtuwa Mlungu pahala pakuyi, mshumba sha kati sha numba, pahala Pananagala nentu, walituliti pasi pa mbapatiru za viwumbi virii. 8 Viwumbi walii wana mbapatiru wayalikiti mbapatiru zawu pampindi papatulitwi lisandiku, hangu lisanduku na mipiku ya kujegera iweriti pasi pa mbapatiru. 9 Toziya mipiku ayi iweriti mitali nentu, mpeleru zakuyi ziweziti kuwoneka kulawa Pahala Pananagala kulongolu kwa shumba sha mngati, kumbiti isinditi kuwoneka kulawa uwega wa kunja. Mipiku ayi yakali pahala panu mpaka leru. 10 Kwanitindiri na shintu mngati mwa lisanduku lya lipatanu, ila kuweriti vibawu viwili virii vya mabuwi vyeni Musa kavituliti amu kulii kulugongu Horebu, pahala Mtuwa Mlungu pakatenditi lipatanu na wantu wa Israeli pawalawiti Misri.

11 Shakapanu Watambika walawa Pahala Pananagala palii, toziya watambika woseri yawaweriti palii pota kulishera vipinga vyawu, waweriti walitakasiya, 12 Walawi woseri wawera wakwimba, pakawera Asafu, Hemani na Yedutuni pamuhera na Walawi na wana wawu wapalu na walongu wawu, pawawera wavala nguwu zawu nfufu ziherepa ugawu pawapapa matowazi na vinanda na vinubi, wagolokiti uwega wa kwagulawa mshenji mushitalawanda. Watambika miya ishilini yawaweriti wankugomba lipenga waweriti pamuhera na womberi. 13 Wimba, pawafatwa na maziwu yagalinganira ga mapenga, matowazi na vyombu vimonga vya msambu, wamzyumi Mtuwa Mlungu kwa kwimba,

"Toziya yomberi ndo muheri

na mafiru gakuyi gahera upeleru."

Shaka ashi numba ya Mtuwa Mlungu imemiziwitwi liwundi. 14 Watambika wasinditi kutenda mahengu gawu amu toziya ya liwundu ali na uweru wa Mlungu umemiziwa munumba ya Mlungu.