1 Shakapanu mfalumi Selemani kanjiti kunyawa Numba Nkulu ya Mlungu aku Yerusalemu palugongu Moria kweni Mtuwa Mlungu kamlawiriti Dawudi, tati gwakuyi, pahala peni Dawudi kaweriti kapasyagula, kuluwaga lwa kukomera viboga lwa Orinani muntu gwa likabila lya Yebusi. 2 Mfalumi Selemani kanjiti kunyawa Numba Nkulu ya Mlungu mwezi gwa pili mushinja sha msheshi sha ukolamlima wakuyi. 3 Numba Nkulu yakanyawiti Selemani, iweriti na utali wa mita ishilini na saba na upana mita tisa. 4 Shumba sha pahala pa kwingilira shiweriti na utali wa mita tisa, teratera na upana wa numba ayi, kugenda kumpindi kuweriti mita hamsini na msheshi. Vibambaza vyakuyi vigibikitwi kwa zahabu iherepa uwega wa mngati. 5 Ligeleri ligibikitwi kwa mbawu za mitera ya miberoshi na kumatika kwa zahabu iherepa na isongolitwi mumitera ya mitendi na minyororu. 6 Mfalumi Selemani kayiherepeziyiti Numba Nkulu ya Mlungu kwa mabuwi gaherepa ga beyi nkulu. Zahabu yakatendiriti ilawiti muisi ya Parivaimu. 7 Kamatika Numba Nkulu ya Mtuwa Mlungu yoseri kwa zahabu. Boriti zakuyi na vizingiti vyakuyi na vibambaza vyakuyi na migomi yakuyi. Muvibambaza musongolitwi viwumbi vyana mbapatiru vyavilifana na makerubi. 8 Kayi kapanyawiti Pahala Pananagala Nentu. Utali wakuyi uweriti mita tisa, teratera na upana wakuyi weni viraa uweriti na mita tisa. Yomberi katenderiti nentu ya tani ishilini ya zahabu iherepa kushimatika shumba ashi. 9 Misumari ya zahabu yawayitendiriti iweriti handa nusu kilu. Viraavirii kavimatika vyumba vyoseri vya kumpindi kwa zahabu.

10 Mfalumi Selemani kanyawiti vinyagu viwili za viwumbi vyana mbapatiru vyavilifana na makerubi kwa mbawu, kavimatika kwa zahabu na kuvitula Pahala Pananagala nentu. 11 Kila shiwumbi shiweriti na mbapatiru mbili zyaziweriti handa mita msheshi na nusu na mita mbili na robu kila lupapatiru. Lupapatiru lumu lushinkuliti shibambaza sha uwega umu wa shumba sha pili lushinkulana na shiwumbi gwa pili. 12 Ntambu iraaayi lupapatiru lumu lwa shiwumbi gwa pili lushinkuliti shibambaza uwega umonga wa shumba na lupapatiru lya pili lushinkula shiwumbi sha kwanja pakati pa shumba. 13 Utali wa mbapatiru mbili za viwumbi wawili awa uweriti handa mita msheshi na nusu. Wagolokiti pawalola kulijeleri likulu. 14 Kanyawiti lipaziya lya nguwu nfufu iherepa yawasoniti kwa ubunda wa buluwu na zambalawu na njeri. Lipaziya ali lilembeziwitwi weli kwa viwumbi vyana mbapatiru kwa ubunda ulaauli.

15 Mfalumi Selemani kanyawiti mpanda mbili za shaba, kila yimu iweriti na mita lilongu limu na mhanu na nusu, kazituliti kulongolu kwa Numba Nkulu ya Mlungu. Kila lupanda lumu luweriti na lijenjeri pampindi pakuyi lwana utali wa handa mita mbili na nusu. 16 Kanyawiti mikufu na kuyitula pampindi pa mpanda azi. Shakapanu kasongola mabwajubwaju ga makomamanga miya na kagatula pampindi pamikufu ayi. 17 Kazigolosiyiti mpanda azi palongolu pa Numba Nkulu ya Mlungu, yimu uwega wa kusika na imonga uwega wa kushana. Mpanda ilii ya uwega wa kusika kayishemiti Yakini na ilii ya uwega wa kushana kayishemiti Bowazi.