1 Hezekia kanjiti kukolamlima Yuda pakawera na vinja ishilini na mhanu, kakolitimlima pakawera aku Yerusalemu kwa vinja ishilini na tisa. Mawu gwakuyi kaweriti Abiya mhinga gwa Zekaria. 2 Katenditi maheri kulongolu kwa Mtuwa Mlungu, ntambu yakatenditi Dawudi, mbuyi gwakuyi.

3 Mumwezi gwa kwanja gwa shinja sha kwanja sha ukolamlima wakuyi, mfalumi Hezekia kayivugula kayi migomi ya Numba Nkulu ya Mlungu na kayinyawa kayi. 4 Kawingiziya kunumba ayi watambika na Walawi, Shakapanu kawajojonira muligereli uwega wa kwagulawa mshenji, 5 kawagambira, "Mumpikaniri mwenga Walawi! Mulipungi na muyipungi Numba Nkulu ya Mtuwa Mlungu, Mlungu gwa wambuyi wenu. Muwusiyi vintu vyoseri vidoda vyavijimirwandiri kulongolu kwa Mtuwa Mlungu. 6 Toziya wambuyi wetu waweriti na mtiti na kutenda makontola kulongolu kwa Mtuwa Mlungu, Mlungu gwetu. Wamleka na wagalambuziya kutali vyeni vyawu na kupatulira shisogu pahala pakakala Mtuwa Mlungu. 7 Viravilii watatiti migomi ya ligeleri lya Numba Nkulu ya Mlungu na wazimiyiti lumuliku na watumiziyandiri ubani pota kulaviya tambiku ya kulunguziya torosu mu pahala pananagala pa Mlungu gwa Israeli. 8 Toziya ya aga, Mtuwa Mlungu kayikalaliriti nentu Yuda na Yerusalemu na galii gakawatenderiti gawakangasha na kuwatiliziya wantu woseri. Ntambu yamuliwoneriti maweni kwa masu genu. 9 Toziya ayi watati wetu walagitwi kunkondu na wana wetu wapalu na wahinga wetu na wadala wetu ndo malopola."

10 "Vinu, neni nfira nakamu kutenda lipatanu na Mtuwa Mlungu, Mlungu gwa Israeli, su nakendereya kutukalalira. 11 Wanawangu, mgusheri mlandu agu. Toziya Mtuwa Mlungu kawasyagula mwenga su mumtenderi na muwalongoziyi wantu wakuyi na kumguwira na kumtumiziya ubani."

12 Walawi awa wanjiti lihengu,

Kulawa lukolu la kohati waweriti Mahati mwana gwa Amasayi na Yoeli mwana gwa Azaria,

Lukolu lwa Merari kalawiti Kishi mwana gwa Abudi na Azaria mwana gwa Yehaleli,

Lukolu lwa Gerishoni kalawiti Yowa mwana gwa Zima na Edeni mwana gwa Yowa,

13 Lukolu lwa Elisafani kalawiti Shimori na Yeieli, kulawa kwa wiwuka wa Asafu, Zekaria na Matania

14 Lukolu lwa Hemani kalawiti Zekaria na Matania,

Lukolu lwa Yedutuni kulawiti Shemaya na Uzieli.

15 Awa wawajojonira Walawi wayawu, walipunga. Shakapanu wingira mngati ntambu yakafiriti mfalumi watendi, wanjiti kuyipunga Numba Nkulu ya Mtuwa Mlungu kulinganira na lagiru za Mlungu. 16 Watambika wingira Numba Nkulu ya Mtuwa Mlungu, su kuyipunga na walaviya vintu vyoseri vidoda vyavimfiliriziyandiri Mlungu vyaviweriti amu. Shakapanu wavitula kuligeleri lwa Numba Nkulu ya Mtuwa Mlungu. Walawi watoliti vintu vidoda vyavimfiriziyandiri Mlungu na wavijega ku Lulalanda lya lushemba Kidironi.

17 Wanjiti lihengu lya kuyipunga Numba Nkulu ya Mlungu lishaka lya kwanja lya mwezi gwa kwanja na kusoka lishaka lya nani waweliti kala wamalira lihengu loseri na mpaka kuligeleri lya Numba Nkulu ya Mtuwa Mlungu. Shakapanu, watenditi lihengu kwa shaka sha mashaka manani nentu mpaka lishaka lya lilongu na sita lya mwezi agu, kila shintu shimalilikiti.

18 Shakapanu Walawi wamgenderiti mfalumi Hezekia wamgambira, "Tuvitula kala vintu vya vijimilwa na Mlungu Munumba Nkulu ya Mlungu pamuhela na shitalawanda sha tambiku za kulunguziya torosu na vyombu vyakuyi vyoseri na meza ya kutulira mabumunda mananagala na vyombu vyakuyi vyoseri. 19 Viraavirii vyombu vyoseri vyeni mfalumi Ahazi kaviwusiya shaka pakaweriti mkolamlima, palii pakamlekiti Mlungu, tuviwuziya na kuvitenda viweri vya Mtuwa Mlungu na vinu vya kulongolu ku shitalawanda sha Mtuwa Mlungu."

20 Mandawira shilawu yakuyi, mfalumi Hezekia kawajojonira wakulu wa mji, shakapanu kagenda nawa Kunumba Nkulu ya Mtuwa Mlungu. 21 Wawajega wang'ombi shipalu saba na wakondowu shipalu saba na mbuzi pongu saba, waweri litambiku lya kuwusiya vidoda kwa wantu wa lukolu lwa mfalumi na kwa pahala pananagala na kwa wantu wa Yuda. Panu mfalumi kawalagalira watambika wa wiwuka wa Aruni wawalunguziyi wankanyama awa handa tambiku pampindi pa shitalawanda sha Mtuwa Mlungu. 22 Watambika wawalikituliti kwanja wang'ombi shipalu awa na watoliti mwazi gulii na kugumushira kushitalawanda, shakapanu walikitula wakondowu wapalu walii na watoliti mwazi gulii na kugumushira kushitalawanda na walikituliti wanakondowu walii na watoliti mwazi gulii na kugumushira kushitalawanda. 23 Upeleru wakuyi, wawajegiti wambuzi pongu walii wa litambiku lya kuwusiya vidoda kulongolu kwa mfalumi na wantu woseri yawaweriti panu na womberi watula mawoku gawu pampindi pa mbuzi pongu awa. 24 Shakapanu watambika walii wawalikitula mbuzi pongu awa na watoliti mwazi gulii na kugumishira kushitalawanda, su iweli tambiku ya kuwawusilira vidoda toziya ya ukolaniziya kwa wantu wa Israeli woseri, toziya mfalumi Hezekia kaweriti kawalagalira walaviyi tambiku za kulunguziya torosu na tambiku ya kulekiziya vidoda.

25 Mfalumi Hezekia kawatula Walawi mu Numba Nkulu ya Mtuwa Mlungu, agawu pawawera na kayamba na wamonga pawawera na vinanda na wamonga pawawera na vinubi na zezi, ntambu yayilagaliritwi na Dawudi na Gadi mbuyi gwa mfalumi pamuhera na mbuyi Natani toziya Mtuwa Mlungu kalagaliriti ali kupitira wambuyi wakuyi. 26 Walawi wagolokiti na wakoliti vyombu vyawu vya kwimbira vyeni Dawudi kavitenderiti na viraavirii watambika wakoliti mapenka gawu. 27 Shakapanu Hezekia kalagaliriti tambiku ya kulunguziya torosu ilaviwi pa shitalawanda. Pawanjiti kulaviya tambiku ayi, wantu wanjiti kumwimbira Mtuwa Mlungu na wantu awa wanjiti kugomba mapenka na vyombu vya kwimbira vya Dawudi mfalumi gwa Israeli. 28 Wantu woseri wamguwira Mtuwa Mlungu, agawu wantu pawendeleya kwimba na wana mapenka pawagomba mapenka gawu. Mirandu ayi yendereyiti mpaka pawamaliriti kulaviya tambiku za kulunguziya torosu. 29 Pawamaliriti kulaviya tambiku, mfalumi Hezekia pamuhera na wantu woseri yawaweriti amu wasuntamala na wamguwira Mtuwa Mlungu. 30 Shakapanu mfalumi Hezekia na wakulu wawagambira Walawi wamwimbiri Mtuwa Mlungu kwa nyimbu za zaburi zyazilembitwi na mfalumi Dawudi na za mbuyi gwa Mlungu Asafu. Hangu wantu woseri wamkwisa Mtuwa Mlungu kwa nemeleru na kumsuntamalira na kumguwira.

31 Shakapanu Hezekia kawagambira wantu, "Vinu mlipunga kala kwa Mtuwa Mlungu. Msegeleri, mjegi litambiku na malaviwu ga kulonga mayagashii mu Numba Nkulu ya Mtuwa Mlungu." Hangu, wantu wajega tambiku zawu na malaviwu ga kulonga mayagashi na wantu woseri yawaweriti na moyu gwa kufiraweni wajegiti tambiku za kulunguziya tolosu. 32 Litambiku za kulunguziya tolosu yazijegitwi na wantu woseri ziweliti wang'ombi shipalu sabini na kondowu shipalu miya moja na wana wa kondowu miya mbili. Zoseri azi ziweliti tambiku zakulunguziya tolosu kwa Mtuwa Mlungu. 33 Wankanyama yawalumikitwi kwa tambiku ya kulunguziwa tolosi waweriti wang'ombi shipalu miya sita na kondolu na mbuzi shipalu elfu tatu. 34 Toziya watambika waweriti wadidini, wasinditi kuwawambula wankanyama woseri awa, hangu walongu wawu Walawi wawatangiti mpaka pawamaliliti lihengu ali na mpaka watambika wamonga pawamaliliti kulipunga, Walawi walipungiti nentu kuliku watambika. 35 Kuweriti na tambiku zivuwa za kulunguziya tolosi na pamuhera na lipaki lya wankanyama lya tambiku ya ponga na tambiku za kulanda zilaviwa pamuhera na tambiku za kulunguziya torosu. Hangu,

Lihengu lya kuguwira Munumba Nkulu ya Mtuwa Mlungu yanja kayi. 36 Mfalumi Hezekia na wantu woseri wanemeleliti nentu kwa goseri galii Mtuwa Mlungu gakawatenderiti wantu wakuyi, toziya mirandu ayi itendikiti kwa shaka shifupi.