1 Mfalumi Yehoshafati gwa Yuda kawuyiti mkomu kuliboma lyakuyi kumjini Yerusalemu. 2 Kumbiti mbuyi gwa Mlungu Yehu mwana gwa Hanani, kagenditi kumwanka mfalumi, kamkosiya, "Hashi, gulihola ndo iherepa kuwatanga wakontola na kuwafira yawamkalalira Mtuwa Mlungu? Hangu maya ga Mlungu hagakwizili kwa galii gagutenditi. 3 Kumbiti, kwana maheri tunga mngati mwakuyi. Guviwusiyiti kala vinyagu vyoseri vya Ashera na mlungu gwa shidala na gukamalira ng'anji kumsakula Mlungu kwa moyu gwaku goseri."

4 Mfalumi Yehoshafati kakaliti Yerusalemu, kumbiti kankali kankuwatyangira wantu wa Beeri Sheba ya kusika, mpaka kuisi ya vigongu vya Efraimu. Katenditi hangu su kuwapanana moyu wantu wamuwuyiri Mtuwa Mlungu, Mlungu gwa wawambuyi wawu. 5 Kasysaguliti walonguziya mumiji yoseri ya Yuda yayizyengetwa na liboma, 6 kawagambira, "Muloleriweri nentu pamtoza, toziya mtozandiri ntambu yawafira wantu kumbiti mtoza ntambu yakafira Mlungu na yomberi ka pamuhera na mwenga pamtoza. 7 Su, vinu mumtiri Mtuwa Mlungu, pamtoza mliloleriweri toziya ya Mtuwa Mlungu, Mlungu gwetu katoza ntambu yakafira yomberi, kamwonerandiri muntu yoseri pota swinda."

8 Viraavirii aku mjini Yerusalemu, Yehoshafati kasyaguliti Walawi wamu na watambika na wakulu wa nkolu zoseri za Waisraeli waweri watoza, wawatozi wantu yawalema kukola lagiru lya Mtuwa Mlungu na watozi ndewu za wantu weni yawalikaliti aku Yerusalemu. 9 Kawalagalira ntambu ayi, "Mtendi mahengu genu kwa waminika na kwa moyu gwenu goseri agawu pamumutira Mtuwa Mlungu. 10 Kila mala walongu wenu woseri kulawa mumiji yawalikala pawawajegera masitaka gaweri ga kulaga ama kukolandiri lagiru ama kukolandiri amuli ama malagalira, mwenga muwaberi na wamtendera Mtuwa Mlungu vidoda. Pamtendandiri ntambu ayi, maya gakuyi hagawizili mwenga na walongu wenu, kumbiti pamutenda lihengu lyenu weri mwenga hapenimuweri na vidoda. 11 Amaria, mtambika mkulu, yomberi hakalonguziyi mahengu goseri yagawera ga lagiru za Mtuwa Mlungu na Zebadia mwana gwa Ishimaeli, mkulu gwa likabila lya Yuda hakalonguziyi mahengu goseri ga mfalumi na Walawi haweri wakulu wenu. Mtendi kwa moyu goseri na Mtuwa Mlungu hakaweri pamuhera na woseri walii yawatenda maheri."