1 Abiya kanjiti kukolamlima Yuda mushinja sha lilongu na nani sha ukolamlima wa mfalumi Yeroboamu. 2 Kakolitimlima kwa shaka sha vinja vitatu pakawela Yerusalemu. Mawu gwakuyi kaweliti Maaka mhinga Urieli gwa Gibea.

Shakapanu kulawiriti nkondu pakati pa Abiya na Yerobowamu. 3 Abiya kalitanditi kulikomanga nkondu na lishonta lya wanjagira wagangamala laki msheshi na Yeroboamu kamgendera na lishonta lyakuyi lya wanjagira wagangamala laki nani.

4 Mfalumi Abiya kagolokiti pampindi pa lugongu Semaraimu, lwaluwera pakati pa vigongu vya Efraimu, kambotera Yeroboamu na waisraeli wa makabila ga kushana, "Gumpikanili gwee Yerobowamu na wantu woseri wa Israeli! 5 Hashi, muvimanandiri handa Mtuwa Mlungu, Mlungu gwa Israeli, katuliti lipatanu lya mashaka goseri na Dawudi kuwera wafalumi woseri wa Israeli hawalawi muwiwuka wakuyi? 6 Kumbiti Yeroboamu mwana gwa Nebati ntumintumi gwa Selemani, mwana gwa Dawudi kamgalambukiti mkulu gwakuyi. 7 Shakapanu, kashijojoniriti shipinga sha wangesera na wantu wazigizigi na womberi wamzyangazyanga Rehoboamu mwana gwa Selemani, kutenda galii gawafiliti womberi nayomberi kawezitindiri kuwabelera toziya kaweriti kankuwatira. 8 Vinu mwenga mfira kuubela ufalumi wa Mtuwa Mlungu yawuwera mumawoku ga wantu wa wiwuka wa Dawudi, toziya mwana mashonta wavuwa na shinyagu sha zahabu sha mwana gwa ng'ombi, vyakavinyawiti Yeroboamu viweri wamlungu wenu? 9 Muwawinga watambika wa Mtuwa Mlungu, walii wana wa Aruni, na wana wa Walawi na kulisyagulira maweni watambika wenu ntambu yawatenda wantu wa maisi gamonga. Yoseri yakiza kwamwenga kulilumika na mwana gwa ng'ombi shipalu ama kondolu shipalu, kawera mtambika gwenu kwa vintu vyeni ndo wamlungundiri."

10 "Kumbiti kwa uwega wa twenga, Mtuwa Mlungu, ndo Mlungu gwetu, pota tumlekandiri. Kayi twanawa watambika wa wiwuka wa Aruni weni wankumtendera Mtuwa Mlungu na weni wankutangwa na Walawi. 11 Kila lishaka mandawira na paliwala, watambika wankumlavilira tambiku za kulunguziwa na tambiku za kutumiziwa ubani yawununkira nentu, shakapanu watula mabumunda meza nanagala na mabumunda yagalaviwitwi kulongolu kwa Mlungu na mwankuyakiziya vikoloboyi vyakuyi mushintambi sha zahabu na kuyiyakiziya vikoloboyi vyakuyi kila pashimihi. Twenga twankugafata malagaliru ga Mtuwa Mlungu, Mlungu gwetu, kumbiti mwenga mmuleka. 12 Mlungu kapamuhera na twenga, yomberi katulonguiziya. Wambika wakuyi wakola kala mapenka gawu kutugombera twanji nkondu na mwenga. Mwenga wantu wa makabila ga kushana ga Israeli, moyi kulikomanga nkondu na Mtuwa Mlungu, Mlungu gwa wambuyi wenu. Hapeni mukanki!"

13 Kumbiti shaka ashi, Yeruboamu kaweliti kawatuma wamu wa mashonta wakuyi wawakomangi kwa kumbeli mashonta wa Yuda, agawu wamashonta wakuyi wamonga wawakomangi uwega wa kulongolu. 14 Wamashonta wa Yuda pawaloliti kumbeli, wasindukiti kuwona wakomagwa, su wamliliriti Mtuwa Mlungu na watambika wagombiti mapenka gawu. 15 Su wamashonta wa Yuda wagomba filimbi kulanguziya kuwera kwana nkondu na pawatenditi hangu, Mlungu kamkankiti Yeroboamu na lishonta lyakuyi lya wantu wa makabila ga kushana ga Isreali kulongolu kwa Abiya na wantu wa Yuda. 16 Wantu wa makabila ga kushana ga Israeli wawatiriti wantu wa Yuda na Mlungu kawatula mumawoku mwawu wantu wa Israeli. 17 Abiya na lishonta lyakuyi wawakomangiti nentu wantu wa makabila ga kushana ga Israeli na wawakankiti na kuwalaga wamashonta laki mhanu yawaweliti muwamu mwa wamashonta wagangamala nentu mu Israeli. 18 Hangu, wantu wa Yuda wapatiti ukanka kwa wantu wa Israeli toziya wamtumbiriti Mtuwa Mlungu, Mlungu gwa wambuyi wawu.

19 Abiya kamwingiti Yeroboamu na kampoka miji ya Beteri na Yeshana, Efroni pamuhera na vijiji vyaviweliti pambwega na miji ayi. 20 Yeroboamu kawezitindiri kuwera na makakala, kayi shaka sha ukolamlima wa Abiya. Shakapanu Mtuwa Mlungu kamkomiti nayomberi kahowa.

21 Kumbiti Abiya kendereyiti kuwera na makakala. Kayuga wadala lilongu na msheshi, kapatiti wana wapalu ishilini na wawili na wana wadala lilongu na sita. 22 Matendu gamonga ga ukolamlima wa Abiya, mahengu gakuyi na visoweru vyakuyi, vilembitwi mu shitabu sha maholu yagalembitwi na mbuyi gwa Mlungu Ido