1 Yoashi kaweriti na vinja saba pakanjiti kukolamlima. Kakolitimlima kwa vinja arubayini kulawa Yerusalemu. Mawu gwakuyi kashemitwi Sibia kulawa Beeri Sheba. 2 Yowashi katenda yagaweriti maheri palongolu pa Mtuwa Mlungu muvinja vyoseri, shaka mtambika Yehoyada pakaweriti mkomu. 3 Yehoyada kamyugiziya wadala wawili, na weni wamwiwuliriti wana wapalu na wadala.

4 Pagapititi aga Yowashi kaamuwiti kunyawa kayi Numba Nkulu ya Mtuwa Mlungu. 5 Su, Kawashema watambika na Walawi na kawalagalira, "Mgendi kalongola mumiji ya Yuda, mwakajojoniri mpiya yazifiruwa kulipwa kila shinja kulawa kwa Waisraeli woseri su kunyawa kayi Numba Nkulu ya Mlungu gwenu. Mtendi kalongola." Kumbiti Walawi watendandiri kalongola. 6 Hangu mfalumi kamshema mtambika mkulu Yehoyada, kamkosiya, "Ntambu gaa guwagambiziyandiri Walawi wajojoniri kodi kulawa kwa wantu wa Yuda na wantu wa Yerusalemu, ntambu yakalagaliriti Musa ntumintumi gwa Mtuwa Mlungu na wantu walipi toziya ya kulitula weri Liringu Linanagala lya Mtuwa Mlungu?" 7 Wandundami wa Atalia, mdala ulii mkontola waweriti wameganga na kwingira mngati mwa Numba Nkulu ya Mlungu na kuvitola vintu vyoseri yavilumikitwi kwa Mtuwa Mlungu wavitoliti na kuvitendera kwa mlungu Baali.

8 Su, mfalumi kawahimiziya Walawi, wanyawa lisandiku lya kutulira malaviwu na kulitula kunja kuligomi likulu lya Numba Nkulu ya Mtuwa Mlungu. 9 Shakapanu kawabwelera wantu woseri yawaweriti mumiji ya Yuda na Yerusalemu, handa wantu woseri wamjegeri vintu virii Musa ntumintumi gwa Mlungu kawalagaliriti wantu wa Israeli pawaweriti kushiwala. 10 Wakulu woseri na wantu woseri wajega kodi yawu kwa kunemelera wayituliti mlisandiku ali mpaka lisandiku limema. 11 Walawi pawajegiti lisandiku ali kwa wakulu wa mfalumi na womberi pawawoniti kuwera kwana mpiya zivuwa, mlemba gwa mfalumi pamuhera na muntu yakamtanga mtambika mkulu, walaviyiti mpiya yaziweriti mlisandiku, shakapanu waliwuziya kayi pahala pakuyi. Wenderiyiti kutenda hangu kila lishaka na wajojonira mpiya vivuwa.

12 Mfalumi na Yehoyada wawapananiti mpiya azi walii yawagolokeriti lihengu lya kunyawa kayi Numba Nkulu ya Mtuwa Mlungu. Na weni wawashemiti wanyawa na wasongola mbawu na waponda lyuma na wanyawa shaba wizi wayinyawa kayi Numba Nkulu ya Mtuwa Mlungu. 13 Hangu mafundi awa watenditi lihengu weri, wayiwuziya Numba Nkulu ya Mtuwa Mlungu ntambu yayiweriti makashu na wayigangamaziya. 14 Pawamaliliti kunyawa Numba Nkulu ya Mtuwa Mlungu, wamjegeriti mfalumi na Yehoyada zahabu na mpiya yayisigaliti, shakapanu vyombu vya Numba Nkulu ya Mtuwa Mlungu vinyawitwi kwa mpiya azi. Vintu avi vitenderitwi Munumba Nkulu ya Mtuwa Mlungu na mumalaviwu ga tambiku za kulunguziwa na mabakuli ga kutumiziya ubani na viraa vyombu vimonga vya zahabu na vya feza. Mashaka goseri Yehohada pakaweriti mkomu, wantu wendereyiti kulaviya tambiku za kulunguziwa Munumba Nkulu ya Mtuwa Mlungu.

15 Yehoyada kawera mzewi na pakaweriti na vinja miya na selasini, kahowiti. 16 Shakapanu wamfintira mumji gwa Dawudi, kumasembi ga wafalumi su kulanguziya ligoya lyawu kwakuyi kwa maheri gakatenditi mu Israeli toziya ya Mlungu na Numba Nkulu yakuyi.

17 Yehoyada pakahowiti kala, wakulu wa Yuda wamwiziliti mfalumi Yowashi, wamzyangazyanga kafati shawamgambira nayomberi kawapikinira. 18 Toziya ya aga wantu waleka kuguwira Munumba Nkulu ya Mtuwa Mlungu, Mlungu gwa wambuyi wawu, wanja kuguwira maashera na vinyagu. Mlungu kanitimaya na wantu wa Yuda na Yerusalemu toziya ya shidoda ashi. 19 Ata hangu, Mlungu kawatumiti wambuyi kuwaberiziya su wamwuyiri Mtuwa Mlungu, kumbiti womberi wawapikinirandiri. 20 Panu Rohu gwa Mlungu kamwiziriti Zekaria mwana gwa mtambika Yehoyada nayomberi kagoloka kulongolu kwa wantu, kawagambira, "Mtuwa Mlungu kawakosiya ntambugaa mleka kujimira lagiru zakuyi? Vinu hapamuweri na mpatiru! Toziya mmuleka Mtuwa Mlungu nayomberi viraa kawaleka mwenga!" 21 Kumbiti wantu wafiriti kumlaga na kwa lagalira ya mfalumi wamgumanga mabuhi kuligeleri lya Numba Nkulu ya Mtuwa Mlungu mpaka wamlaga. 22 Mfalumi Yowashi kagalyaluwa maheri goseri gakatenderitwi na Yehoyada na tati gwakuyi Zekaria su kamulaga mwana gwakuyi. Pakaweriti pakwegera na kuhowa, kalonga, "Mtuwa Mlungu na kayiloli mirandu ayi na kawuziliri."

23 Upeleru wa shinja, lishonta lya Wasiria lilikomangiti na Yowashi na kukanka Yuda na Yerusalemu. Wawalagiti wakulu woseri, walopola lopola zivuwa na kumjegera mfalumi gwa Damasiko. 24 Tembera lishonta lya Sria liweriti lididika, Mtuwa Mlungu kawatenditi walikanki lishonta likulu lya wantu wa Yuda, toziya wantu wa Yuda awa wamleka Mtuwa Mlungu, Mlungu gwa wambuyi wawu. Hangu, Mlungu kamtoziti Yoashi kupitira Wasiria. 25 Wasiria pawawukiti, wamlekiti Yoashi kakomangwa nentu, wakulu wakuyi wapangiti wamlagiri pashitanda shakuyi su kuwuzilira ntambu yakamlagiti mwana gwa mtambika Yehoyada. Shakapanu kafintiritwi mumji gwa Dawudi, kumbiti kumasembindiri ga wafalumi. 26 Wantu yawamtenderiti upyota waweriti Zabadi mwana gwa mdala mwenikaya gwa wantu wa Amoni litawu lyakuyi Shimeati na Yehozabadi mwana gwa mdala mwenikaya gwa wantu wa Mowabu litawu lyakuyi Shimriti. 27 Visoweru vya wana wakuyi wapalu Yoashi za kunyawa kayi Numba Nkulu ya Mtuwa Mlungu na umbuyi woseri yawulawirana na yomberi vilembitwi mushitabu sha wafalumi. Amazia mwana gwakuyi kakolitimlima pahala pa tati gwakuyi.