1 Yosia kaweriti na vinja vinani pakanjiti kukolamlima, kakolitimlima vinja selasini na shimu pakawera Yerusalemu. 2 Katenditi maheri kulongolu kwa Mtuwa Mlungu. Kafatiti njira za Dawudi mbuyi gwakuyi na kukola lagiru za Mtuwa Mlungu kwa waminika.

3 Mu shinja sha nani sha ukolamlima wakuyi, mfalumi Yosia, pakawera kankali mntemba, kanjiti kumguwira Mlungu gwa Dawudi tati gwakuyi, shakapanu pakaweriti na vinja lilongu na viwili kanjiti kuyipunga Yuda na Yerusalemu kwa kuhalibisiya pahala pa pampindi pa kuguwira wamlungu wamonga na vinyagu vya Ashera na vinyagu vimonga vya kupondanda na za kuguwirwa. 4 Kalagaliriti wavibomoli vitalawanda vya kuguwira mlungu Baali na kuvidumulanga vitalawanda vya kutumiziya ubani yavinyasulitwi pampindi pa vitalawanda avi na wavipocholanga vinyagu vya mlungu Ashera na vimonga vya kusongola na vya kuguwirwa, kazitenditi kuwera madikudiku na madikudiku aga kagitanga pampindi pa masembi ga wantu walii yawalaviliriti tambiku kwa vinyagu avi. 5 Viraavirii, kalunguziyiti mihonju ya watambika wa wamlungu awa kuvitalawanda vyawu, hangu kayipunga Yuda na Yerusalemu. 6 Katenditi ntambu iraaayi mumiji ya Manasi na Efraimu na Simeoni mpaka Nafutali na mumahami yagaweriti kumbwega mwa miji ayi. 7 Kavibomoliti vitalawanda na kuwapocholanga wamlungu wa Ashera na vinyagu vya kusongolwa ziwera madikudiku. Viraa kavidumulanga vitalawanda vya kutumiziya ubani muisi yoseri ya Israeli. Shakapanu kawuya Yerusalemu.

8 Mu shinja sha lilongu na nani sha ukolamlima wakuyi, shaka pakaweriti kayipungakala isi na numba, katumiti wantu watatu: Shafani mwana gwa Azalia na Maaseya mlonguziya gwa mji na Yowa mwana gwa Yoahazi, yakaweriti mlemba su wagendi kuyinyawa kayi Numba Nkulu ya Mlungu, Mlungu gwakuyi. 9 Wamgenderiti Hilikia, mtambika mkulu, wampananiti mpiya yaziweriti zijegwa munumba nkulu ya Mlungu zeni zijojonilitwi na Walawi wayaweriti walolera ligomi kulawa Manasi na Efraimu na kulawa wega zoseri za Israeli, isi yoseri ya Yuda na Benjamini na viraa kulawa kwa mwenikaya wa Yerusalemu. 10 Mpiya azi wapananitwi wanyawa walii yawagolokeriti manyawa ga numba nkulu ya Mtuwa Mlungu na wanyawa yawatenditi lihengu Munumba Nkulu ya Mlungu su kunyawa kayi numba. 11 Shakapanu wapanananitwi mpiya wasongola mbawu na wanyawa toziya ya kuhemelera mabuwi yagasongolitwi na mbawu za kutendera kwa kunyawira numba zyeni wafalumi wa Yuda wazibomoliti. 12 Wantu awa watenditi lihengu ali kwa waminika, pawawera pasi pa ulonguziya wa Walawi Yonatani na Obadia, hawa waweriti Walawi wa lukolu lwa Merari na Zakaria na Meshulamu yawalawiti mlukolu lwa Kohati. Walawi woseri waweriti na umani nentu mukugomba vyombu vya kwimbira, 13 wagolokeliti watola wa visanka na kuwalongolera woseri yawatenda mahengu gamonga. Walawi wamonga waweriti walemba na wakulu na ata walolera ligomi.

14 Pawaweriti wankuzilaviya kunja mpiya yaziweriti zilaviwitwi Munumba Nkulu ya Mtuwa Mlungu, mtambika Hilikia kashiwoniti shitabu sha lagiru lya Mtuwa Mlungu yashilaviwitwi kupitira Musa. 15 Shakapanu Hilikiya kamgambira Shafani mlemba, "Nishipata shitabu sha Lagiru munumba ya Mtuwa Mlungu." Shakapanu Hilikiya kampanana shitabu ashi Shafani. 16 Yomberi Shafani kamjegera mfalumi shakapanu kamgambira, "Wantumintumi waku woseri watenda kila shintu ntambu yawagambilitwi kutenda. 17 Walaviya mpiya yaziweriti munumba nkulu ya Mtuwa Mlungu, shakapanu wawapanana wagolokera na wanyawa." 18 Shakapanu mlemba Shafani kamgambira mfalumi, "Mtambika Hilakia kampananiti shitabu ashi." Na Shafani kashigubuliti shitabu ashi kulongolu kwa mfalumi.

19 Mfalumi pakapikaniriti visoweru vya shitabu ashi sha lagiru kapapuliti nguwu zakuyi. 20 Panu kawalagalira Hilakia na Ahikamu mwana gwa Shafani na Abudoni mwana gwa Mika, mlemba Shafani na Asaya ntumintumi gwa mfalumi, kawagambira, 21 "Mgendi mwakakosiyi kwa Mtuwa Mlungu kwajili yaneni na kwajili ya wantu yawasigaliti Israeli na Yuda na virii yaviwera mushitabu shashiwonikaniti. Toziya maya ga Mtuwa Mlungu gatutulukira, toziya wambuyi wetu wakolitindiri shisoweru sha Mtuwa Mlungu, pota kutenda galii yagalembitwi amu."

22 Su, Hilikia pamuhera na wantumintumi wamonga walii yakawatumiti wamgendera mbuyi gwa Mlungu Hulida, mdala gwa Shalumu na mwana gwa Tokati, mwana gwa Hasra, mtula nguwu yazitumikiti Munumba Nkulu ya Mlungu. Yomberi kaweriti kankulikala Yerusalemu pahala papanyawitwi kayi, naweni wayoweriti nayu galii yagalawiliti. 23 Su Hulida kawagambira, "Hangu ndo ntambu yakatakula Mtuwa Mlungu, Mlungu gwa Israeli. Mumgambiri ayu yakawatumiti kwaneni, 24 Mtuwa Mlungu kalonga hangu, hanjegi ntabiku mu Yerusalemu na kwa wantu wakuyi na viraavirii hanjegi pangira zoseri yazilembitwi mushitabu yashigubutulitwi kulongolu kwa mfalumi gwa Yuda. 25 Toziya wandeka neni na kutumiziya ubani wamlungu wamonga su wantendi nkalali nentu kwa wamlungu yawanyawiti kwa mawoku gawu, vinu mayagangu hagitwirwi pahala panu pota kunyamaziwa. 26 Kumbiti mfalumi gwa Yuda kawalagaliliti mwenga kusakula litakulu lya Mtuwa Mlungu, gumgambiri hangu ndo Mtuwa Mlungu, Mlungu gwa Israeli ntambu yakalonga, kwa visoweru vyagupikiniriti. 27 Toziya guleka vidoda na gulinanagaziya kulongolu kwaneni, mpaka gupapula nguwu zaku na kulira pagupikaniriti visoweru vyangu kwajili ya pahala panu na kwajili ya wenikaya wakuyi na gulinanagaziya kulongolu kwangu na neni viraa nikupikanira. 28 Hangu hanikutendi guliwoni na wambuyi waku na gwenga hagufintirwi kwa ponga." Masu gaku hapeniguwoni ntabiku zyanizijega pahala panu na kwa wenikaya yawalikala panu.

Wantu walii wawuka na kumgambira Yosiya shilii shakatakuliti Hulida

29 Shakapanu mfalumi Yosia kawashemiti pamuhera wakulu woseri wa Yuda na Yerusalemu. 30 Mfalumi kagenda Munumba Nkulu ya Mtuwa Mlungu pamuhera na wapalu woseri wa Yuda na wenikaya wa Yerusalemu pawalilongoziya na watambika na Walawi na wantu wamonga woseri kulawa kwa wakulu mpaka kwa wadidini. Panu kawagubutuliliti shisoweru sha shitabu sha lipatanu shashiwonikiti Munumba Nkulu ya Mtuwa Mlungu. 31 Shakapanu mfalumi kagolokiti pa lupanda lwa shifalumi na katenda lipatanu na kugoloka kulongolu kwa Mtuwa Mlungu handa, hakamfati Mtuwa Mlungu na kukola lagiru na toza na mafundu gakuyi kwa moyu gwakuyi goseri na kwa rohu yakuyi yoseri na kujimira visoweru vya lipatanu vyavilembitwi mushitabu ashi. 32 Shakapanu kawatenditi wantu woseri yawaweriti mu Yerusalemu na Benjamini kufata lipatanu. Na wenikaya wa Yerusalemu walikaliti kwa kufuta lipatanu lya Mlungu, Mlungu gwa wambuyi wawu. 33 Shakapanu Yosia kawusiya vinyagu vyoseri vya kukaliziya vyaviweriti kila pahala mu Israeli na kuwahimiziya wantu woseri wa Israeli kumtendera Mtuwa Mlungu, Mlungu gwawu. Muukolamlima wakuyi woseri yawusigaliti kamlekitindiri Mtuwa Mlungu, Mlungu gwa wambuyi wawu.