1 Yotamu kaweriti na vinja ishilini na mhanu pakanjiti kukolamlima, kakolitimlima Yerusalemu kwa vinja lilongu na sita. Mawu gwakuyi kashemitwi Yerusha mhinga gwa Sadoki. 2 Katenditi maheri kulongolu kwa Mtuwa Mlungu ntambu yakatenditi Uzia tati gwakuyi, ila yomberi kingirandiri Munumba Nkulu ya Mtuwa Mlungu, kumbiti wantu wendereyiti kutenda makontola.

3 Yotamu kanyawiti kayi ligomi lya kushana lya Numba Nkulu ya Mtuwa Mlungu na katenditi lihengu likulu lya kunyawa shibambaza yashiwera pakwegera na shigongu sha Ofeli. 4 Shakapanu kanyawiti kayi miji kuisi ya kushigongu sha Yuda na viraa mumadowi kanyawiti maboma na vindwalingu. 5 Yotamu kalikomangiti nkondu na mfalumi gwa Amoni na kamkankiti. Mushinja ashi Waamoni wamlavilira ushulu wa kilu elifu tatu na miya msheshi za madini ga feza na handa tani elufu yimu za nganu na handa kilu elufu lilongu za shayiri. Waamoni wendereyiti kutenda hangu mushinja sha pili na sha tatu. 6 Mfalumi Yotamu kendereyiti kuwera na makakala, toziya kakaliti kwa kumjimira Mtuwa Mlungu, Mlungu gwakuyi. 7 Mirandu imonga yakatenditi Yotamu muwukolamlima wakuyi na nkondu zyakalikomangiti na kila shintu shakatenditi, vyoseri vilembwa mushitabu sha Visoweru vya Wafalumi wa Israeli na Yuda. 8 Yotamu kaweriti na vinja ishilini na mhanu pakanjiti kukolamlima, kakolitimlima Yerusalemu kwa vinja lilongu na sita. 9 Shakapanu Yotamu kahowiti na kufintirwa mumji gwa Dawudi kwawafintiritwi wambuyi wakuyi. Na Ahazia mwana gwakuyi kakolitimlima pahala pakuyi.