1 Mfalumi Yosia katenditi msambu gwa pasaka kwa kumpana ligoya Mtuwa Mlungu aku Yerusalemu, walikitula wakondolu wa pasaka lishaka lya lilongu na msheshi lya mwezi gwa kwanja. 2 Kawasyagula watambika kwa lihengu lyawu lyawafiliwitwi kutenda Munumba Nkulu ya Mlungu na kuwapana moyu walitendi kwa waminika. 3 Shakapanu kawalagaliriti Walawi yawaweriti wankuwafunda wantu wa Israeli yawaweriti walumikwa kwajili ya Mtuwa Mlungu, kawagambira. "Mulituli Lisanduku Linanagala Munumba Nkulu ya Mlungu yakanyawiti Selemani mwana gwa Dawudi na mfalumi gwa Israeli, mfiruwandiri kayi kulipapa mmawega. Vinu mumtenderi Mtuwa Mlungu, Mlungu gwenu na wantu wakuyi woseri wa Israeli. 4 Mlitendi lihengu lyenu kulinganira na nkolu zyenu, kugenderana na malagaliru ga Dawudi, mfalumi gwa Israeli na ga Selemani mwana gwakuyi. 5 Viraa mgoloki pahala pananagala handa wagolokera wa walongu wa nkolu zyenu na kila yumu katangi kaya ya wantu wa Israeli. 6 Muwalikituli wana kondolu wa Pasaka na mlipungi, shakapanu myitandi toziya ya walongu wenu, su wawezi kutenda lilagaliru lya Mtuwa Mlungu lyalitakulitwi na Musa."

7 Shakapanu mfalumi Yosia kawapananiti wantu, kondolu na wanambuzi yawaweriti elufu selasini na wang'ombi elufu tatu, woseri awa walaviyitwi muvigongolu vyakuyi mfalumi. 8 Na wakulu kwa nfilu zawu, walaviya mshangu gwawu wawapanana wantu na watambika na Walawi. Hilikia na Zakaria na Yehieli na wakulu wa Numba Nkulu ya Mtuwa Mlungu, wawapananiti kondolu na wambuzi elufu mbili na miya sita na ng'ombi shipalu miya tatu toziya ya tambiku za Pasaka. 9 Konaniya na walongu wakuyi wawili, Shemaya na Netaneli, pamuhera na Hashabia na Yeliyeli na Yozabadi yawawera wakulu wa Walawi, naweni viraa wawapananiti Walawi wanakondolu na wanambuzi elufu mhanu na ng'ombi shipalu miya mhanu, toziya ya tambiku za Pasaka.

10 Pawamaliriti matandiru goseri ga Pasaka, watambika wagolokiti pahala pawu na Walawi muvipinga vyawu, ntambu yakalagaliriti mfalumi. 11 Wawalikituliti kondolu wa Pasaka na watambika wamishira mwazi kushitalanda, yawagwankiti kulawa kwawu na Walawi wawambula likuli wankanyama awa. 12 Shakapanu watuliti gweka tambiku za kulunguziya tolosu su wavibagula kwa wantu kulinganira na kaya zawu wantu yawaweriti watambika su wamlaviliri Mtuwa Mlungu ntambu yayilembitwi mushitabu sha lagiru lya Musa. Watenditi ntambu iraaayi kwa wang'ombi. 13 Wawabanikiti wanakondolu wa Pasaka pa motu ntambu yayilagaliritwi na viraa wapwasiyiti tambiku nanagala muviwiga vikulu na masufuliya makulu na muvikalangiru shakapanu wawabagulira kalongola wantu woseri. 14 Shakapanu Walawi walitandiriti pahala pawu na pa watambika, toziya watambika wa wiwuka wa Aruni waweriti na lihengu lya kulaviya tambiku za kulunguziya tolosu na vinofu vyana lipaki mpaka pashiru, hangu Walawi watandiri toziya yawu weni na toziya ya watambika wa wiwuka wa Aruni. 15 Wimba wiwuka wa Asafu wagolokiti pahala pawu ntambu ya kalagalira mfalumi Dawudi na Asafu na Hemani na Yedutuni, mbuyi gwa mfalumi. Na walolera yawaweriti kumigomi wafiluwitwindiri kuleka mahengu toziya walongu wawu Walawi wawatandiriti Pasaka. 16 Hangu lihengu lyoseri za Mtuwa Mlungu litanditwi lishaka ali, su kuyipunga Pasaka na kulaviya tambiku za kulunguziya tolosu kushitalawanda sha Mtuwa Mlungu ntambu yakatakuliti mfalumi Yosia. 17 Mushaka ashi wantu woseri wa Israeli yawasokiti wagutenditi msambu agu gwa Pasaka na msambu gwa mabumunda yagalekerwandiri simika kwa mashaka saba. 18 Pasaka handa ayi hayenitendwi mu Israeli yoseri kwanjira mashaka ga mbuyi Samueli. Hakeni lawiri mfalumi ata yumu gwa Israeli yakatenditi Pasaka handa ayi yayitenditwi na mfalumi Yosia pamuhera na watambika na Walawi na wantu woseri wa Yuda na wantu wa Israeli na wenikaya wa Yerusalemu. 19 Pasaka ayi itenditwi mushinja sha kumi na nani sha ulokamlima wa mfalumi Yosia.

20 Pa goseri aga gakatenditi mfalumi Yosia toziya ya Numba Nkulu ya Mtuwa Mlungu, Neko mfalumi gwa Misri, kalongoziyiti lishonta lyakuyi kugenda kukomanga aku Karkemishi kulushemba Eufrati. Mfalumi Yosia kalawiti kulikomanga nayu, 21 Kumbiti mfalumi Neko kamjegera ulagilagi yawulonga. "Nkondu azi zyagwengandiri gwee mfalumi gwa Yuda. Nizandiri kulikomanga na gwenga ila kulikoma na wankondu wangu na Mtuwa Mlungu kandagalira ntendi kalongola. Su goyi kumbera Mtuwa Mlungu, yakawera uwega waneni, hera hangu hakakulagi." 22 Kumbiti Yosia kajimirandiri kumlekeziya. Kalemiti kuvipikinira vyakatakuliti Mlungu kwa njira ya Neko, hangu kalimpikanirandiri su nakamanika, shakapanu kingira kunkondu mululalanda lya Megidu.

23 Nawaguma misali, wamgumiti msali mfalumi Yosia, panu mfalumi Yosia kawagambira wantumintumi wakuyi, "Mumbusiyi panu! Ntenduwa ng'anji." 24 Wantumintumi wakuyi wamwusiyiti mumbutuka yakuyi ya kukwengwa na farasi, wamjega na mbutuka yakuyi ya pili mpaka Yerusalemu. Panu kahowa na kufintirwa mumasembi ga shifalumi. Wantu woseri wa Yuda na Yerusalemu wamdayililiti Yosia.

25 Mbuyi gwa Mlungu Yeremia viraa katungiti lwimbu lwa kumdayilira Yosia na wimba woseri wapalu kwa wadala, wamkanta Yosia mumadaya gawu mpaka leru. Iwera shitiba kutenda madaya aga mu Israeli. Aga galembwa mushitabu sha Madaya.

26 Mirandu imonga ga Yosia na matendu gakuyi maheri ntambu yagalembitwi mumalagiru ga Mtuwa Mlungu, 27 na matendu gakuyi kwanjira kwanja mpaka upeleru, aga galembwa mushitabu sha lagiru lya wafalumi gwa Israeli na Yuda.