1 Manasi kaweriti na vinja lilongu na mbili pakanjiti kukolamlima Yuda, kakolamlima Yerusalemu kwa vinja hamsini na mhanu. 2 Katenditi makontola kulongolu kwa Mtuwa Mlungu kajeriti galii yagatenditwi na wantu wa isi zimonga zyeni Mtuwa Mlungu kaweriti kaziwingiti shaka wantu wa Israeli pawaweriti wankwingira muisi. 3 Toziya kapatenditi pahala pa kuguwira wamlungu wamonga papaweriti pabomolwa na Hezekia Tati gwakuyi, Manasi kanyawa shitalawanda sha kuguwira wamlungu Bahari, kanyawa na shinyagu sha Maashera. Shakapanu, kaviguwira vintu vyoseri vya kumpindi na kuvitendera. 4 Kanyawa vitalawanda avi Munumba Nkulu ya Mtuwa Mlungu pahala peni Mtuwa Mlungu kaweriti kalonga, "Litawu lyangu haliguwirwi mashaka goseri mu Yerusalemu." 5 Kanyawiti shitalawanda sha kuguwira vintu vyoseri vya kumpindi kumageleri mawili ga Numba Nkulu ya Mtuwa Mlungu. 6 Shakapanu kawalunguziya wana wakuyi handa tambiku mu lulalanda lwa Hinomu. Katendera ndumba ata kutenda pamuhera na watunga wa mahoka na wahawi. Katenditi makontola gavuwa kulongolu kwa Mtuwa Mlungu na Mlungu kaniti maya nayu. 7 Shinyagu shakanyawiti, kashitula mu Numba Nkulu ya Mlungu pahala Mungu pakalongiti, kulongolu kwa Dawudi na Selemani mwana gwakuyi. "Munumba ayi na mu Yerusalemu na muwamu mwa makabila liliongu na mawili ga Israeli, hamunguwiri panu mashaka goseri. 8 Na payiwera wantu wa Israeli hawatendi ntambu yaniwagambiriti na pawajimira lagiru zoseri na matakulu na malagalira yagalaviwitwi kwa lihoku lya Musa, su hapeni niwaleki wawingwi kulawa muisi ayi yeni niwapananiti wambuyi wawu." 9 Kumbiti Manasi kawazyanga wantu wa Yuda na wenikaya wa Yerusalemu, watenditi makontola nentu kuliku maisi gamonga geni Mtuwa Mlungu kaweriti kagawinga muisi, wantu wa Israeli pawaweriti wankwingira.

10 Mtuwa Mlungu kamberiziyiti Manasi na wantu wakuyi, kumbiti wampikanirandiri. 11 Hangu, Mtuwa Mlungu kawajegiti wakulu wa mashonta wa mfalumi gwa Ashuru. Wakulu awa wambatiti Manasi na wamkoweka ndoni mumpula na kumtawa nyororu za shaba, wamjegiti mpaka Babeli. 12 Pakaweriti muntabika, kamluwiti Mtuwa Mlungu, Mlungu gwakuyi, kalinanagaziya nentu kulongolu kwa Mlungu gwa wambuyi wakuyi. 13 Kamluwa Mlungu na Mlungu kanka kuluwa kwakuyi na kamwuziya Yerusalemu muufalumi wakuyi. Panu Manasi kavimana handa Mtuwa Mlungu ndo Mlungu gwa nakaka.

14 Pa aga, Manasi kanyawa shibambaza shimonga uwega wa kunja wa mji gwa Dawudi, kwaguzyeta mshenji kwa Gihoni, kulalanda, kendereya mpaka ligomi lya Somba na kashizyengeta mpaka papaweriti na ngereka na kagutenda guweri mtali ng'anji. Pamuhera na aga, kawatula wakulu wa mashonta mumiji yoseri ya Yuda yana boma. 15 Kayiwusiya Munumba Nkulu ya Mtuwa Mlungu wamlungu woseri wa shiyenga na vinyagu pamuhera na vitalawanda vyoseri vyakaweriti kavinyawa kuvigongu vya Numba Nkulu ya Mlungu na mu Yerusalemu, kavyasa kunja kumji. 16 Kawuziya shitalawanda sha kumguwira Mtuwa Mlungu na pampindi pakuyi kalaviya tambiku za ponga na za kulonga mayagashii, kawalagalira wantu wa Yuda wamguwiri Mtuwa Mlungu, Mlungu gwa Israeli. 17 Ata hangu wantu wendereyiti kulaviya tambiku pahala pa pampindi, kumbiti wamlavilira tambiku Mtuwa Mlungu, Mlungu gwawu hera.

18 Mirandu imonga ga Manasi, luwa yakuyi kwa Mlungu na visoweru vya wambuyi wa Mlungu vyawayoweriti nayu kwa litawu lwa Mtuwa Mlungu, Mlungu wa Israeli, goseri aga galembitwi mushitabu sha mirandu ya Shaka sha Wafalumi wa Israeli. 19 Kuluwa kwakuyi na Mlungu ntambu yakamwankuliti na vidoda vyakuyi vyoseri na kuwerandiri na waminika wakuyi na pahala pakanyawiti pa pampindi pa kuguwira wamlungu wamonga na ntambu yakanyawiti vinyagu vya Ashera na vinyagu pamberi pa kulinanagaziya, aga galembwa mumahoru ga wambuyi wa Mlungu. 20 Manasi kahowiti na kufintirwa mu liboma lyakuyi na Amoni mwana gwakuyi, kakolamlima pahala pakuyi.

21 Amoni kaweriti na vinja ishilini na viwili pakanjiti kukolamlima Yuda, kakolitimlima vinja viwili pakawera Yerusalemu. 22 Katenditi makontola kulongolu kwa Mtuwa Mlungu, handa Manasi tati gwakuyi ntambu yakatenditi. Viraa kalaviya tambiku na kuvitendera vinyagu vyeni Manasi tati gwakuyi kavisongoliti. 23 Yomberi kalinanagaziyandiri kulongolu kwa Mtuwa Mlungu, ntambu yakatenditi Manasi, kumbiti mweni kongeriti kutenda makontola nentu.

24 Shakapanu wantumintumi wakuyi watenda upyota na wamlaga muliboma lyakuyi. 25 Kumbiti wantu wa Yuda wawalaga woseri awa yawatenditi upyota kwa Amoni, Shakapanu wamlumika Yosia, mwana gwakuyi kuwera mfalumi pa yomberi.