1 Msambu pagumalirikiti, wantu woseri wa Israeli wagenditi mukila mji gwa Yuda, wamegangameganga mpanda za mabuwi na kudumuladumula vinyagu vya Ashera, mlungu gwa shidala na washiharibisiya viraa shitalawanda na pahala pakuguwira wamlungu wamonga. Watenditi viraa koseri mu Yuda na Benjamini na Efraimu na Manasi, mpaka pawamaliriti kuhalibisiya vyoseri. Shakapanu wawuya kumiji yawu, kila muntu kawuya ukaya kwakuyi.

2 Mfalumi Hezekia kawasyagula kayi watambika na Walawi muvipinga, kampananiti kila yumu gwawu lihengu lyakuyi Munumba Nkulu ya Mlungu, mahengu aga gaweriti kulaviya tambiku za kulunguziya tolosu na tambiku za ponga na tambiku za kulonga mayagashii na tambiku za kuzyuma. 3 Kulawirana na ulunda wakuyi mweni mfalumi kalaviya vintu, toziya ya tambiku za kulunguziya tolosu mandawira na pashimihi, tambiku za Lishaka lya Kwoyela na tambiku za kunemelera kulawa lyezi na tambiku zimonga yazilaviwitwi kulinganira na lagiru lya Mtuwa Mlungu.

4 Nentu ga aga, mfalumi kawagambiriti wenikaya wa Yerusalemu walaviyi vintu vyawafiruwitwi kupananwa watambika na Walawi, su walilaviyi nakaka mumahengu ga lagiru lya Mtuwa Mlungu. 5 Palapalii kalagaliriti hangu, wantu wa Israeli walaviyiti kwa uvuwa, mabenangu ga kwanja ga viboga na divayi na lipaki lya mizeyituni na lwashi na viboga vimongavimonga vya kwanja na kayi walaviya viboga vimonga vya kumalambu na lifungu limu lya lilongu lya kila shintu. 6 Wantu wa Israeli na Yuda yawalikaliti mumiji ya Yuda, viraavirii wajegiti mafungu ga lilongu ga wang'ombi na wakondolu na vintu vimonga, wavitura kulongolu kwa Mtuwa Mlungu. Wavitura vintu avi kwa mafungu. 7 Mumwezi gwa tatu wanjiti kuvipanga mumafungu na wamaliriti mumwezi gwa saba. 8 Mfalumi Hezekia na watanga wakuyi pawawiziti kugalola mafungu aga, wamkwisiti Mtuwa Mlungu na kuwatekelera wantu wakuyi wa Israeli. 9 Mfalumi Hezekia kawakosiyiti watambika na Walawi toziya ya mafungu aga. 10 Azaria mtambika mkulu yakaweriti gwa wiwuka wa Sadoki kamwakula, "Kwanjira wantu wanji kujega malaviwu gawu Munumba ya Mlungu, twana viboga vivuwu na twana shigibikiru shivuwa. Mtuwa Mlungu kawatekelera wantu wakuyi, ndo mana tupatiti vintu vyoseri avi."

11 Shakapanu mfalumi Hezekia kawalagalira wanyawi luhanja Munumba ya Mtuwa Mlungu. Na womberi wanyawa, 12 amu watula malaviwu na lifungu limu mumafungu lilongu na vintu vyoseri vyavilaviwitwi kwa Mlungu. Shakapanu wamtula Konaniya yakalikala isi ya Lawi, kaweri mkulu na mlolera gwa vintu avi na Shimeyi mlongu gwakuyi, kaweriti kankumtanga. 13 Yehieli na Azazia na Nahati na Asaheli na Yeremoti na Yozabadi na Elieli na Isimakiya na Mahati na Benaya awa waweriti wankutenda lihengu lya walolera pasi pa ulonguziya wa Konaniya na Shimeyi mlongu gwakuyi. Woseri awa wasyagulitwi na mfalumi Hezekia na Azaria mkulu gwa numba ya Mtuwa Mlungu. 14 Kore mwana gwa Imna yakaweriti kalawa Lawi, yakaweriti mlolera gwa ligomi lya kwagulawa mshenji gwa Numba Nkulu ya Mlungu, kagolokeriti malaviwu goseri gawalaviyiti kwakufira weni kwa Mlungu na kubagula tambiku yazilaviwitwi toziya ya Mtuwa Mlungu na tambiku yaziwera nanagala nakamu. 15 Edeni na Miniamini na Yeshua na Shemaya na Amaria na Shekania wamtangiti kutenda lihengu ali kwa waminika mumiji yimonga yawakaliti watambika. Wawabaguliriti walongu wawu Walawi viboga teratera kulinganira na vipinga vya wakulu kwa wapusu, 16 pota kulishera nkolu zawu zyawalembitwi. Wawabaguliriti wapalu wana vinja vitatu ama nentu weni matawu gawu gaweriti muwalangwa mwa viyiwuku na woseri walii yawaweziti kwingira Munumba Nkulu ya Mtuwa Mlungu kutenda mahengu gawu ga kila lishaka na mahengu gamonga ntambu yawafiruwitwi. 17 Watambika walembitwi kulinganira na kaya zawu na Walawi yawaweriti na vinja ishilini na nentu walembitwi kulinganira na lihengu lyawu ntambu yawapananitwi kutenda. 18 Walembitwi woseri pamuhera na wana wawu wadidini na wadala wawu na wana wapalu na wana wawu wadala, toziya kwa lihengu lyawu waweriti waminika kulipunga. 19 Viraavirii, muwamu mwa wiwuka wa Aruni, Watambika yawaweriti walikala mumalambu yagazyengeta miji yawu, muweriti wantu yawasyagulitwi su kubagula viboga kwa kila mpalu mukaya za watambika na kila muntu yakaweriti kalembwa muwamu mwa Walawi.

20 Hangu ndo mfalumi Hezekia ntambu yakatenditi maheri yagamfiriziya Mtuwa Mlungu gwa uwaminika kulongolu kwa Mtuwa Mlungu, Mlungu gwakuyi, muisi yoseri ya Yuda. 21 Kaweriti na mpatiru toziya ya lihengu lyakatenditi muuntumintumi wa Numba Nkulu ya Mtuwa Mlungu ama muutenderu wa lagiru na malagaliru ga Mlungu mweni kamsakula Mlungu gwakuyi na kamtendera kwa moyu gwakuyi goseri na yomberi Mlungu kamtekelera.