1 Su ukolamlima wa Rehoboamu pawuweliti uligangamaziya na kuwera na makakala, yombeli pamuhela na Waisraeli woseli woyiti kufata lagiru za Mtuwa Mlungu. 2 Toziya wamjimirandiri Mtuwa Mlungu, mfalumi gwa Misri yawamshemiti Shishaki kagukomangiti mji gwa Yerusalemu mushinja sha mhanu wa ufalumi wa Rehoboamu, 3 kiziti na mbutuka za kukwengwa na farasi elufu yimu na miya mbili, wakwena farasi sitini elufu na wamashonta wavuwa nentu yawawalangikandiri wa, Libiya na Sukii na Isiopia waweriti pamuhera na yomberi kulawa Misri. 4 Mfalumi Shishaki Kayilopoliti miji ya Yuda yayizyengetiziya liboma na kasoka mpaka Yerusalemu.

5 Shakapanu mbuyi gwa Mlungu Shemaya kamgenderiti mfalumi Rehoboamu na wakulu wa Yuda, yawatugiriti Yerusalemu kwa kumtira Shishaki, kawagambira, "Mtuwa Mlunga kalonga hangu, mwenga mundeka neni na neni niwaleka mwenga mkolwimlima na Shishaki."

6 Wakulu wa Israeli na wafalumi wawoniti shidoda shawatenditi, walonga, "Shakatenda Mtuwa Mlungu ndo teratera."

7 Mtuwa Mlungu pakawoniti kuwela wavimana shawatenditi, katakuliti kayi na mbuyi Shemaya, kamgambira, "Toziya wamana shawatenditi, hapeni niwagamaziyi, ila haniwalopoli ula vinu. Hapeninigusulusilili mji gwa Yerusalemu maya yangu nkulu kupitira Shishaki, 8 Kumbiti hawaweri wamanda wa Shishaki na weni hawavimani handa ndo iherepa kuntendera neni kuliku kuwatendera wafalumi wa pasipanu."

9 Su, mfalumi Shishaki gwa Misri kagukomangiti mji gwa Yerusalemu, kayitoliti vintu vyoseri vyaviweriti Munumba Nkulu ya Mlungu na vintu vyoseri vyaviweriti muliboma. Katoliti kila shintu pamuhera na ngawu za zahabu zyakanyawiti mfalumi Selemani. 10 Hangu mfalumi Rehoboamu kanyawiti ngawu zimonga za shaba pahala palii ngawu za zahabu pazitolitwi na kawatula walolera waliloleri ligomi lya liboma. 11 Kila shaka mfalumi pakagenditi Munumba Nkulu ya Mtuwa Mlungu walolera wazikoliti ngawu azi na shakapanu waziwuziya mushumba sha walolera. 12 Mfalumi Rehoboamu pakalinanagaziyiti, Mtuwa Mlungu kaleka kumkalalira na kamwagamiziyandiri. Nentu ya aga, isi ya Yuda iweriti na ponga.

13 Hangu mfalumi Rehoboamu kagangamaziyiti ufalumi wakuyi aku Yerusalemu. Kanjiti kayikolamlima isi ya Yuda pakaweliti na vinja arubayini na yimu na kakolitimlima kwa shaka sha mashaka lilongu na saba kumji gwa Yerusalemu, mji gweni Mtuwa Mlungu kagusyagula muwamu mwa makabila goseri ga Israeli guweri pahala pakumguwira yomberi. Mawu gwakuyi Rehoboamu wamshemiti Naama, kulawa isi ya Amoni. 14 Rehoboamu katenditi makontola, toziya kafilitindiri kumsakula Mtuwa Mlungu kwa moyu.

15 Matendu goseri ga mfalumi Rehoboamu kwanjira kwanja mpaka upeleru galembitwi mushitabu sha mbuyi Shemaya na mlola Ido, galembitwi kulinganira na nkolu. Rehoboamu na Yeroboamu waweriti wankulikomanga nkondu kila shaka. 16 Shakapanu Rehoboamu kahowiti na kufintirwa kumji gwa Dawudi na Abiya mwana gwakuyi, kakolitimlima pahala pakuyi.