1 Pa mirandu yoseri ayi ya waminika wa mfalumi Hezekia, mfalumi Senekeribu gwa Ashuru kuyikangaliti Yuda. Kiziti kuyitula ng'onjeru kumiji yana liboma agawu pakalitumbira hakayitoli iweri yakuyi. 2 Mfalumi Hezekia pakawoniti handa mfalumi Senekeribu kiza kwa nfiru ya kuyikomanga Yerusalemu, 3 kayowera na watanga wakuyi na wamakambaku wa mashonta kudiwiti bwiru za mashi yaziweriti kunja kumiji na womberi wamjimira na wamtanga. 4 "Wawajojonira wantu wavuwa pamuhera wazidiwa bwiru zoseri pamuhera na lushemba lwalupititi pahala panu, pawalonga, ntambu gaa kuwalekiziya wafalumi wa Ashuru pawawiza wawoni mashi gaweri nduu?" 5 Su kugulolera mji, mfalumi Hezekia kalipanana moyu, kanyawa kayi shibambaza shoseri shashibomokiti na pampindi pakuyi kanyawa visasa vya ulolera. Uwega wa kunja kanyawa shibambaza shimonga sha pili na kagangamaziya ngereka mumji gwa Dawudi. Nentu ya aga kanyawiti vintu vya kulikomangira na ngawu zivuwa. 6 Kawaturiti wantu woseri mjini walonguziwi na wakulu wa mashonta, shakapanu kawalagalira walijojoniri paluwaga pakwegera na Ligomi likulu lya mji. Panu kawapanana wantu moyu, kawagambira, 7 "Muweri wagangamala. Namtira pota kwinginika kulongolu kwa mfalumi gwa Ashuru ama wamashonta wakuyi toziya yatuwera nayu ndo mkulu kuliku yakawera nayu Senakeribu. 8 Yomberi kana makakala ga shimuntu hera, ila twenga twana Mtuwa Mlungu, Mlungu gwetu, katutanga na kutumkomangira nkondu zyetu." Visoweru avi vya mfalumi Hezekia viwapananiti moyu nentu wantu awa.

9 Pa aga Senakeribu mfalumi gwa Ashuru, yakaweriti kaguzyengeta mji gwa Lakishi pakawera na lishonta lyakuyi lyoseri, kawatumiti wantumintumi wakuyi Yerusalemu kwa Hezekia mfalumi gwa Yuda na kwa wantu woseri wa Yuda yawaweriti Yerusalemu, kalonga, 10 "Hangu ndo ntambu yakalongiti Senakeribu mfalumi gwa Ashuru. Hashi, mlitumbira shishi ata mlikala Yerusalemu, kumji yaguzyengetwa? 11 Hashi Hezekia kawapayira su kawatendi mhowi kwa njala ama kuyumiluwa pakawagambira, Mtuwa Mlungu, Mlungu gwenu hakawalopoli mumawoku mwa mfalumi gwa Ashuru? 12 Hashi ndo Hezekia ndiri yakapahalibisiti pahala pakuyi pa kuguwira wamlungu pamuhera na shitalawanda na kuwalagalira wantu woseri wa Yuda na Yerusalemu palii pakalongiti, hamguwili palongolu pa shitalawanda shimu na pampindi pakuyi hamlunguziyi tolosu tambiku zyenu? 13 Hashi, mvimanandiri goseri galii geni neni na wambuyi wangu gatuwatenderiti wantu woseri wa maisi gamonga? Hashi wamlungu wa isi azi zimonga ziweziti kuzikombola isi zawu kulawa mumawoku mwaneni? 14 Ndo mlungu gaa pakati pa wamlungu wa maisi aga yayihalibisiwa nakamu na wambuyi waneni yakaweza kuwakombola wantu wakuyi kulawa mumawoku mwaneni? Hashi namwenga mulitumbira kuwera Mlungu gwenu hakawakomboli kulawa mumawoku mwaneni? 15 Hezekia nakawapayira pota namgatumbira aga. Namumjimira muntu ayu, toziya kwahera mlungu gwa isi ama mfalumi yoseri yakaweziti kuwakombola wantu wakuyi mumawoku mwa mfalumi gwa Ashuru, vinu ayu Mlungu gwenu hakawezi!"

16 Wantumintumi wa mfalumi gwa Ashuru wamlongiti vidoda nentu Mtuwa Mlungu na Hezekia ntumintumi gwakuyi. 17 Mfalumi mweni kalembiti luhamba kumwigira Mtuwa Mlungu, Mlungu wa Israeli, kalonga, "Handa virii wamlungu wa maisi gamonga ntambu yagasinda kuwakombola wantu wawu kulawa mumawoku mwaneni, viraavirii Mlungu gwa Hezekia hapenikawezi kuwakombola wantu wakuyi." 18 Wakulu awa wawagambiriti kwa kubotanga kwa luga ya Shiebrania wantu wa Yerusalemu yawaweriti mushibambaza, wafiriti kuwatula lyoga su wagutoli mji pota makakala. 19 Wamlongi Mlungu gwa Yerusalemu handa wamlonga mlungu gwa isi zimonga ama handa vinyagu hera yavinyawitwi kwa mawoku ga wantu!

20 Shakapanu mfalumi Hezekia na mbuyi Isaya, mwana gwa Amozi, wamluwiti na kumlilila Mlungu yakawera kumpindi kawatangi toziya ya mirandu ayi. 21 Mtuwa Mlungu katumiti ntumintumi gwa kumpindi, kagenda na kuwalaga makambaku na wamashonta na wakulu wa mashonta na wakulu mulugonjelu lwa mfalumi gwa Ashuru. Su, mfalumi gwa Ashuru kawuyiti muisi mwakuyi pakawera na soni. Palapalii pakingiriti munumba ya mlungu gwakuyi, wana wakuyi mweni wamlagiti palaapanu kwa ligumba.

22 Kwa njira ayi, Mtuwa Mlungu kamlopola mfalumi Hezekia na wenikaya wa Yerusalemu kulawa mliwoku lya Senakeribu mfalumi gwa Ashuru na kulawa mumawoku ga wankondu wakuyi woseri. Mlungu kawatenda walikali kwa ponga na wantu yawapakwegera wakuyi woseri. 23 Wantu wavuwa nentu wawiziti pawamjegera Mtuwa Mlungu tambiku aku Yerusalemu, viraa wamjegera Hezekia, mfalumi gwa Yuda lifupu lwa beyi nkulu. Hangu kulawa shaka shilii, Hezekia kazyumwa nentu na isi zimonga zoseli.

24 Mashaka aga, Hezekia kalwaliti nentu, kaweriti sambira na kuhowa. Kamluwa Mtuwa Mlungu na yomberi Mlungu kamwakula na kumpanana langiru. 25 Kumbiti Hezekia kalidumba kaleka kulonga mayagashi kwa Mtuwa Mlungu kwa galii maheri gakamtenderiti hangu Mtuwa Mlungu kaweriti na maya na yomberi na wantu wa Yuda na wa Yerusalemu. 26 Upeleru Hezekia kamwuyira Mtuwa Mlungu na kaleka kulitumba na wenikaya wa Yerusalemu walinanagaziya, hangu maya ga Mtuwa Mlungu gawizilandiri shaka Hezekia pakaweriti mkomu.

27 Mfalumi Hezekia kaweliti mlunda nentu na kapanananitwi ligoya na wantu. Kalinyawilira luhanja lwa feza na zahabu na mabuhi ga beyi nkulu na vintu vya kununkira na ngawu na vyombu vyoseri vya beyi nkulu. 28 Shakapanu kalinyawiriti hanja nkulu za kutulira viboga na divayi na lipaki lya mizeyituni na visasa vya kutulira wang'ombi na vya wakondolu. 29 Viraavirii kalinyawiriti miji ivuwa toziya yakuyi mweni na wang'ombi na wakondolu toziya Mtuwa Mlungu kampananiti ulunda uvuwa ng'anji. 30 Mfalumi Hezekia ndo yakagadiwiti mashi ga bwiru ya Gihoni, kabawa mifereji ya pasipasi mpaka uwega wa kwaguzyeta mshenji mwa mji gwa Dawudi. Hezekia katekelelitwi mu kila mlandu gwakatenditi, 31 kumbiti walagilagi wa Babuloni pawatumitwi kwakuyi kumkosiya visoweru vya makangashu yagalawiliti amu, Mlungu kamlekiti kaliamulili mweni, su kamjeri na kuvimana goseri yagawela mumoyu mwakuyi.

32 Mirandu imonga ya mfalumi Hezekia na maheri gakatenditi, galembitwi mumalola ga mbuyi Isaya mwana gwa Amozi na mushitabu sha wafalumi wa Yuda na Israeli. 33 Shakapanu Hezekia kahowiti na kufintirwa mulugongu pahala pa masembi ga wiwuka wa Dawudi gaweriti. Wantu woseri wa Yuda na wenikaya wa Yerusalemu wamfindiriti kwa ligoya. Nayomberi Manasi mwana gwakuyi, kakolamlima pahala pakuyi.