1 Mfalumi Selemani kaamuwiti kunyawa Numba Nkulu ya Mtuwa Mlungu yeni hakaguwirwi amu na viraa kalinyawira mweni liboma. 2 Selemani kawatuliti wapalu elufu sabini wapapi visanka na wapalu elufu semanini waweri wasongoli mabuwi kulugongu na wamonga elufu tatu na miya sita waweri wagolokera wawu.

3 Shakapanu, Selemani katumiti ulagilagi awu kwa mfalumi Hiramu gwa Tiru, kamgambira, "Guntenderi na neni ntambu yagumtendiriti tati gwangu Dawudi, pagumjegiriti vipingiri vya miyerezi vya kunyawira liboma lyakuyi. 4 Vinu, sambira nanji kunyawa numba ya kumguwira Mtuwa Mlungu, Mlungu gwangu. Haniyilaviyi kwa Mtuwa, nayeni hayiweri pahala pa kutumiziya ubani wa kununkira nentu kulongolu kwakuyi, shakapanu hapaweri pahala pa mabumunda gagalaviwitwi kulongolu kwakuyi mashaka goseri na tambiku za kulunguziwa mandawira na pashimihi na viraa mumashaka ga kwoyela na mulyezi kulawa na misambu imonga ya Mtuwa Mlungu, Mlungu gwetu, ntambu yakawalagaliriti Waisraeli mashaka goseri. 5 Numba yanfira kunyawa hayiweri nkulu ng'anji, toziya Mlungu gwetu ndo mkulu nentu kuliku wamlungu wamonga woseri. 6 Kumbiti kwahera muntu yakaweza kumnyawira numba payiwera mpindi zyeni zimtosheyandiri, pota mpindi za kumpindi nentu. Naneni ndo gaa, ata nimnyawiri numba? Ira hera pahala pa kutumiziya ubani kulongolu kwakuyi. 7 Su, Vinu gunjegeri muntu yakadaha kunyawa vyombu vya zahabu na vya madini ga feza, shaba na shuma na nguwu za rangi ya zambalawu na za rangi nsheri na za buluwu, viraavirii yakamana, kuherepiziya su yomberi hakatendi lihengu pamuhera na wanyawa yawawera muisi ya Yuda na Yerusalemu, weni tati gwangu Dawudi kawasyaguliti. 8 Viravilii gunjegeri mbawu za miyerezi na miberoshi na misandali kulawa Lebanoni, toziya nivimana handa wantumintumi waku ndo wagangamala nentu wa kusalanga mbawu aku Lebanoni. Na wantumintumi wa neni hawalitangi pamuhera na wantumintumi waku, 9 su wansalangiri mbawu zivuwa, toziya numba nkulu yanfira kunyawa ndo nkulu na yakulikangasha. 10 Toziya wantumintumi waku, awa maselemara hawasalangi mbawu, handaviyi tani elufu mbili za nganu yaziponditwi na tani elufu mbili za shayili na lita laki msheshi za divayi na lita laki msheshi za lipaki lya mizeyituni."

11 Mfalumi Hiramu gwa Tiru, kamwankula Selemani kwa luhamba, pakalonga,

"Toziya Mtuwa Mlungu kawafira wantu wakuyi, kakutenda gwenga guweri mfalumi gwawu. 12 Kakwiswi Mtuwa Mlungu, Mlungu gwa Israeli, yakanyawiti kumpindi na pasi panu! Kampanana mfalumi Dawudi, mwana mpalu yakana luhala na umani, ayu hakamnyawiri Mtuwa Mlungu Numba Nkulu na kulinyawira liboma lyakuyi. 13 Vinu nikulagalilira muntu kana umani nentu na mahala, litawu lyakuyi Huramu Abi, 14 yomberi mawu gwakuyi kalawa likabila lya Dani na tati gwakuyi kaweriti mwenikaya gwa Tiru. Yomberi kana umani uvuwa wa kutendera zahabu na feza na shaba na shuma na mabuwi na mitera na rangi ya zambalawu na buluwu, nsheri na nguwu nfufu ziherepa. Kayi ndo mgangamala na yakaweza kuherepiziya na kushora kulawa mukila shintu shoseri shakapananwa. Yomberi hakalitangi pamuhera na wantu na mafundi walii wa mkulu gwangu Dawudi, tati gwaku. 15 Vinu, mtuwa gwangu avi ndo vintu vyagulongiti; nganu na shayili na lipaki lya mizeyituni na divayi, nikuluwa guvijegi kwa wantumintumi waku, 16 na twenga hatusalangi mbawu ntambu yagufira kulawa aku Lebanoni, shakapanu hatuzitawi pamuhera ziyeruki mmashi mpaka Yopa. Kulawa aku haguzijegi Yerusalemu."

17 Shakapanu Mfalumi Selemani kalagaliriti wahenga woseri yawalikaliti muisi ya Israeli wawalangwi handa Dawudi, tati gwakuyi ntambu yakawawalangiti. Kuweriti na wahenga laki yimu na hamsini na tatu elufu na miya sita. 18 Muwahenga awa Selemani kawasyaguliti wantu elufu sabini kawapananiti lihengu lya kupapa vintu na wantu semanini elufu kwa lihengu lya kusongola mabuwi kulugongu na wantu elufu tatu miya sita waweri wagolokera.