1 Rohu gwa Mlungu kamwizira Azariya mwana gwa Odedi, 2 nayomberi kalawa kugenda kumwanka mfalumi Asa, kamgambira, "Gumpikanili, gwee mfalumi Asa na wantu woseri wa Yuda na Benjamini! Mtuwa Mlungu kapamuhera na mwenga payiwera hamuweri pamuhera na yomberi. Pammusakula, Hamumwoni, kumbiti pamumleka nayomberi hakawaleki. 3 Kwa shaka shitali vinu, Waisraeli wakaliti pota ya Mlungu gwa nakaka na pota watambika wa kuwafunda na pota lagiru. 4 Kumbiti pawapatiti ntabiku, wamwuyira Mtuwa Mlungu, Mlungu gwa Israeli, wamsakula, shapanu wampata. 5 Mumashaka aga, kwahera muntu yakaweza kwingira ama kulawa kwa ponga toziya paweritindiri na ponga, ntabiku zivuwa ziwagaziyiti muisi zoseri. 6 Watabikiti nentu, isi yimu ilikomangiti na isi imonga na mji gumu gulikomanga na mji gumonga, toziya Mlungu kawatenditi waweri ntabiku za kila ntambu. 7 Kumbiti mwenga mligangamaziyi, pota namleweleka toziya hampati lifupu kwa lihengu lyamulitenda."

8 Asa pakapikaniliti visoweru avi, vya umbuyi wa Azariya mwana gwa Odedi, kapatiti makakala. Kavibomoliti vinyagu vyoseri vya kukalaziya muisi yoseri ya Yuda na Benjamini na kulawa mumiji yoseri yakayilopoliti muisi ya vigongu vya Efraimu. Viraa, kanyawiti kayi shitarawanda sha Mtuwa Mlungu shashiweriti muligeleri lya numba nkulu ya Mtuwa Mlungu.

9 Wantu wavuwa kulawa Efraimu na manasi na Simeoni wiziti kulikala mu ufalumi wakuyi, toziya wamwoniti Mlungu ka pamuhera na yomberi, Asa kawashema wantu woseri awa pamuhera na wantu wa Yuda na Benjamini, 10 na woseri walijojoniriti Yerusalemu mumwezi gwa tatu gwa shinja sha lilongu na mhanu sha ukolamlima wakuyi Asa. 11 Lishaka ali, wamlavilira Mtuwa Mlungu tambiku za wang'ombi miya saba na wakondolu elufu saba kulawa mulopola zilii zyawalopoliti. 12 Shakapanu watenditi lipatanu lya kuwera hawamjimili Mtuwa Mlungu, Mlungu gwa Wambuyi wawu, kwa moyu gwawu goseri na kwa rohu yawu yoseri, 13 na muntu yoseri yakamjimirandiri Mtuwa Mlungu, Mlungu gwa Israeli kalaguwi, kaweri mndemba, ama mzewi, mwana mpalu ama mwana mdala. 14 Walilapiriti kwa Mtuwa Mlungu kwa kubotanga, pawagomba lipenga na miluli. 15 Wantu woseri wa Yuda waweriti na nemeleru nentu toziya walilapiti kwa moyu goseri. Wamsakula Mtuwa Mlungu kwa moyu gwawu goseri shakapanu wampata. Na Mtuwa Mlungu kawapanana ponga kulawa wega zoseri.

16 Mfalumi Asa viraavirii kamwusiyiti Maaka bibi gwakuyi muukulu wakuyi wa mawu malikiya, toziya kanyawiti shinyagu sha kukaliziya sha mlungu mdala Ashera. Asa kashikatanga na kushiposholaposhola na kushilunguziya shinyagu ashi, aku kululalanda lwa lushemba Kidironi. 17 Kumbiti ata hangu kawusiyitindiri pahala pakutambikira wamlungu wamonga mu Israeli pahalibisiwandiri, kumbiti mweni kaweriti na moyu mwaminika kwa Mlungu muukomu wakuyi woseri. 18 Kaviwuziyiti vintu vya zahabu na feza Munumba Nkulu ya Mlungu vyeni mweni na tati gwakuyi wavilumikiti. 19 Paweritindiri na nkondu kayi muisi mpaka shinja sha selasini na mhanu sha ukolamlima wa wakuyi Asa.