1 Upeleru, Abiya kahowiti na kufintilwa mumji gwa Dawudi na Asa mwana gwakuyi kawera mfalumi pahala pakuyi. Shaka sha Asa, kuweliti na ponga muisi kwa shaka sha vinja lilongu. 2 Asa katenditi maheri na yagamfiriziya Mtuwa Mlungu, Mlungu gwakuyi. 3 Kavibomuliti vitalawanda vya shihenga na pahala pa kuguwira wamlungu wamonga, kabomoliti vindwalingu vya mabuwi na kuvidumuladumula vinyagu vya mlungu Ashera. 4 Kawalagalira wantu wa Yuda wamsakuli Mtuwa Mlungu, Mlungu gwa wambuyi wawu na kujimira malagalira gawu na lagiru zawu. 5 Viraavirii kawuyisiti pahala poseri pa kuguwira wamlungu wamonga na shitalawanda sha kutumiziya ubani kulawa mumiji yoseri ya Yuda, shakapanu ufalumi wakuyi uweriti na ponga pasi pa ukolamlima wakuyi. 6 Kanyawiti miji yana liboma mumiji yoseri ya Yuda shaka ashi sha ponga. Kwahera muntu yakalikomangiti nayu muvinja avi toziya Mtuwa Mlungu kampananiti ponga. 7 Nayomberi kawagambira wantu wa Yuda, "Tunyawi miji ayi shakapanu tuyizyengetiziyi shibambaza na amu tunyawi vindwalingu na tutuli migomi yana ngwiligiziwu. Isi yankali mumawoku mwetu toziya tugatenda gakafira Mtuwa Mlungu, Mlungu gwetu na vinu tulikala kwa ponga." Su wanyawa na wamalira kunyawa. 8 Mfalumi Asa kaweriti na lishonta lya wanjagira laki tatu kulawa mlikabila lya Yuda, wana ngawu na migoha na wamonga laki mbili na semanini elifu kulawa likabila lya Benjamini, yawawera na ngawu na pindi. Woseri waweriti wamashonta yawaweziti kulikomanga nkondu weri.

9 Zera, muntu gwa Isiopia kayikomangiti isi ya Yuda pakawera na lishonta lya wanjagira milioni yimu na mbutuka za kukwegwa na farasi miya tatu, kagenda mpaka kasoka pahala papashemwa Maresha. 10 Asa kalawa kagenda kulikomanga na yomberi. Mashonta goseri mawili walitanda na wanja kulikomanga mululalanda lya Sefata pakwegera na Maresha. 11 Panu Asa kamlililiti Mtuwa Mlungu, Mlungu gwakuyi, pakalonga, "Gwee Mtuwa Mlungu, kwahera yumonga handa gwenga, Yakaweza kulitanga lishonta lyaliwerandiri na likakala na lishonta lididika. Gututangi, gwee Mtuwa Mlungu, Mlungu gwetu, toziya twenga tukutumbira gwenga na kwa litawu lyaku twinza kulikomanga na lishonta ali likulu. Gwee Mtuwa Mlungu gututangi, gwenga ndo Mlungu gwetu na kwahera muntu yoseri yakaweza kukukanka gwenga."

12 Su, Mtuwa Mlungu kawakanka wamashonta wa Isiyopia kulongolu kwa Asa na lishonta lyakuyi wantu wa Yuda. Shakapanu lishonta lya Isiyopia watuga. 13 Asa pamuhera na wamashonta wakuyi wawafatiti mpaka Gerari, wawalagiti wamashonta wa Isiyopia wavuwa ng'anji na kasigalandiri hata yumu, toziya Mtuwa Mlungu kawaposholiti pamuhera na lishonta lyakuyi. Lishonta lya Yuda lipokiti vintu vivuwa ng'anji. 14 Lihalibisiyiti miji yoseri yayiweriti pakwegera na Gerari, Toziya wantu yawalikaliti mumiji ayi waweriti wankumtira Mtuwa Mlungu. Lishonta litoliti lunda zivuwa kulawa mumiji ayi toziya kuweriti kwana lunda zivuwa nentu. 15 Lishonta liwakomangiti walolera wa wankanyama, litoliti wakondolu wavuwa na ngamiya. Shakapanu liwuyiti Yerusalemu.