1 Shakapanu, Rehoboamu kagenditi Shekemu, aku Waisreili woseri waweliti wajojonika su kumtenda yomberi kaweli mfalumi. 2 Na Yerubowamu mwana gwa Nebati pakapatiti visoweru vya mlandu agu kaweriti kankali kankulikala Misri kweni katugiliti kumtira Selemani, hangu kawuya kulawa Misri. 3 Kumbiti makabila ga kushana watumiti wantu kugenda kwa Rehoboamu kumshema. Woseri waweriti pamuhela wamgendera Rehoboamu na kumgambira, 4 "Tati gwaku katupananiti visanka vizotopa su gutupungulili visanka avi aga, natwenga hatukutenderi gwenga."

5 Rehoboamu kawawankula, "Mgendi huti pashaka panu mashaka matatu muwuyi kayi." Hangu wantu awa wawukiti.

6 Shakapanu, mfalumi Rehoboamu kafiliti wazewi wamgambi weni waweriti wamgambiziya Selemani tati gwakuyi, pakaweliti kankali mkomu, kawakosiya, "Su mng'ambiziyi niwapanani lyankulu gaa wantu awa?"

7 Wazewi awa wamwakula, "Paguwawonera lusungu wantu awa na pagufira kuwanemiziya na kutakula nawa visoweru vihelepa, panu hawaweri wantumintumi waku mashaka goseri."

8 Kumbiti Rehoboamu kalemiti shakagambilitwi na wazewi na kagenda kuyowera na wantemba wayaguwi weni waweliti watakuziya wakuyi. 9 Shakapanu kawakosiya, "Mwenga mwankulaviya litakulu gaa su tuwezi kuwawankula wantu awa yawang'ambiriti, gupunguli visanka vyeni tati gwaku katupananiti?"

10 Wantemba walii yawaweriti pamuhera nayu wamwakula, "Wantu yawakugambiriti Tati gwaku katupapiziya visanka vizotopa, gutupungulili shisanka ashi, gwenga guwagambili hangu, shala shangu sha upeleru ndo shinenepa kuliku shunu sha tati gwangu. 11 Tati gwangu kawapapiziya visanka vizotopa, kumbiti neni haniwapapiziyi shisanka shizotopa kuliku avi. Tati gwangu kawakomiti kwa ntomontu, kumbiti neni haniwakomi kwa ntomontu zyana misontu."

12 Mulishaka lya tatu Yerobowamu pamuhela na wantu walii wa makabila ga kushana wawuyiti kwa Rehoboamu ntambu yakawalagaliliti. 13 Rehoboamu kabeziya litakulu lyakapananitwi na wazewi na kawankula kwa kukalipa, 14 kulinganira na shilii shawamgambiriti wantemba wayaguyi kalonga, "Tati gwangu kawapapiziyiti visanka vizotopa, kumbiti neni haniwapapiziyi shisanka shizotopa kuliku ashi. Tati gwangu kawakomiti kwa ntomontu, kumbiti neni haniwakomi kwa ntomontu zyana misontu." 15 Su mfalumi kawapikinirandiri wantu awa toziya mlandu agu gulawa kwa Mlungu su Mtuwa Mlungu kashitendi shisoweru shakuyi shakamgambiliti Yerebowamu, mwana gwa Nebati kwa kupitira Ahiya muntu kulawa mji gwa Shilu.

16 Kumbiti wantu wa makabila ga kushana pawawoniti handa mfalumi kalema kuwapikinira wamwankula hangu, "Twapamu ndiri na Dawudi? Twenga twahera uhala kwa mwana gwa Yese? Kila yumu kawuyi kuliringu lyakuyi, mwenga makabila ga kushana. Gwee Dawudi guyiloleri weri numba yaku gamweni."

Hangu wantu woseri wa Israeli wawuyiti kumalingu gawu. 17 Kumbiti Rehoboamu kakolitimlima wantu wa Israeli yawakaliti pahala pa mji gwa Yuda.

18 Shakapanu mfalumi Rehoboamu kamtumiti Hadoramu yakaweriti mgolokera gwa lihengu lya kukakanika, kumbiti wantu wa makabila ga kushana wamgumiti kwa mabuwi, wamlaga. Panu Rehebowamu pakakweniti mbutuka yakuyi katugira Yerusalemu. 19 Su wantu wa makabila ga kushana walemiti kukolwamlima na lukolu lwa Dawudi mpaka leru.