1 Shakapanu, mushinja sha saba, mtambika Yehoyada kalanguziya makakala gakuyi. Katenda lipatanu na wakulu wa mashonta vipinga miya vyeni ndo: Azaria mwana gwa Yehoramu na Ishimaeli mwana gwa Yehohanani na Azaria mwana gwa Obedi na Maaseya mwana gwa Adaya na Elishafati mwana gwa Zikiri. 2 Wazyengeta mumiji yoseri ya Yuda pawajojonila Walawi na Wakulu wa kaya za Israeli, wagenditi mpaka Yerusalemu.

3 Aku shipinga shoseri shitenda lipatanu na mfalumi Munumba Nkulu ya Mlungu. Yehoyada kawagambira, "Mwana ayu mpalu gwa mfalumi! Ndo hakaweri mfalumi ntambu yakalongiti Mtuwa Mlungu kwa wiwuka wa Dawudi. 4 Mwenga hamtendi hangu: selusi imu ya mwenga watambika na Walawi yamwera na lihengu Lishaka lya Kwoyera, hamyiloleri migomi mikulu, 5 selusi imonga hayiloleri liboma na selusi yayisigaliti hamloleri Ligomi lya Lyanjiru. Wantu wamonga woseri hawaweri muluwaga lwa Numba Nkulu ya Mtuwa Mlungu. 6 Nammujimira muntu yoseri kwingira Numba Nkulu ya Mtuwa Mlungu kumbiti wingili watambika hera na Walawi yawawera mulihengu. Awa waweza kuingira toziya womberi ndo wananagala, kumbiti wantu wamonga woseri wajimili shakalagaliriti Mtuwa Mlungu. 7 Walawi hawamzengeti mfalumi, kila muntu na shintu sha kulikomangira mumawoku mwakuyi na muntu yoseri yakajera kwingira Munumba Nkulu ya Mtuwa Mlungu, hakalagwi. Mlikali na mfalumi poseri pakagenda."

8 Walawi na wantu wa Yuda wajimiliti lagiru zoseri zyakalaviyiti mtambika Yehoyada. Kila mkulu kawatora wantu wakuyi woseri, yawaweriti wakwingira mulihengu lyawu mulishaka lya Kwoyera na walii yawaweritindiri mulihengu lishaka lya koyera, toziya Yehoyada kawajimirandiri waleki mahengu gawu. 9 Shakapanu mtambika Yehoyada kawapananiti wakulu wa vipinga vya mashonta miyamiya mikuki na ngawu nkulu na ndidika zyaziweriti lunda za mfalumi Dawudi, yaziweriti zitulwa Munumba Nkulu ya Mtuwa Mlungu. 10 Shakapanu, kawaturiti wantu woseri kwanjira uwega wa kusika mpaka uwega wa kushana mwa Numba Nkulu ya Mlungu na kushizyengeta shitarawanda na kila yumu na shintu sha kulikomangira mumawoku mwakuyi, su kumlolera mfalumi. 11 Shakapanu Yehoyada na wana wakuyi wapalu wamlaviya kunja Yohashi mwana gwa mfalumi, wamvalisiya lijenjeri mumtuyi. Wampanana shitabu sha lagiru ya Mlungu za kulonguziya na wamtenda kaweri mfalumi. Wamumiminira lipaki mfalumi na wanemelera pawalonga, "Kalikali mashaka gavuwa Mfalumi!"

12 Malikiya Atalia pakapikaniriti maziwu ga wantu pawatuga na kumnemelera mfalumi kawagenderiti wantu awa yawaweriti Munumba Nkulu ya Mtuwa Mlungu. 13 Pakasunguliliti kamwoniti mfalumi gwa syayi kagoloka pakwegera na mpanda kuligomi, aku wakulu na wagomba mapenka pawawera pakwegera na mfalumi na wenikaya woseri pawasekerela na kugomba mapenka na wimba waweriti pawagomba ngoma zawu, pawalongoziwa na wantu kwimba nyimbu za zyuma, shakapanu Asalia kadeganga nguwu zakuyi na kubota na kalonga, "Wangalambula! Wangalambula!"

14 Shakapanu mtambika Yehoyada kawalagaliriti wakulu wa vipinga miyamiya vya mashonta pakalonga mumlaviyi kunja mdala ayu pakati pa mashonta na muntu yoseri yakamfata kalaguwi kwa ligumba.Toziya mtambika kaweriti kalonga, "Namumlaga mngati mwa Numba Nkulu ya Mtuwa Mlungu."

15 Su wambata Atalia wamlaviya kunja kupitira kuligomi lya farasi ya liboma, wamlagiti panu.

16 Yehoyada katenditi lipatanu pakati pakuyi mweni na wantu woseri na mfalumi handa hawaweri wantu wa Mtuwa Mlungu. 17 Su wantu woseri wagenditi wayibomola numba ya kumguwira mlungu Baali na kushipantanga shitarawanda pamuhera na vinyagu zakuyi. Shakapanu kamlaga Matani, mtambika gwa mlungu Baali kulongolu mwa shitalawanda. 18 Shakapanu mtambika Yehoyada kawaturiti Watambika na Walawi waweri walolera wa Numba Nkulu ya Mtuwa Mlungu ntambu yakalagaliriti Dawudi na kumlavilira Mtuwa Mlungu tambiku ya kulunguziwa ntambu yawalembiti mulagiru ga Musa na pawanemelera na kwimba kulawirana na malagaliru ga Dawudi. 19 Viraavirii Yehoyada katuliti walolera mumigomi ya Numba Nkulu ya Mtuwa, su muntu yoseri yakawera humba nakingira.

20 Viraavirii kawashemiti wakulu wa mashonta wa wantu miyamiya yawamanika na wakulu wa wantu pamuhera na wenikaya woseri su wamjegi mfalumi kulawa Munumba Nkulu ya Mtuwa Mlungu, wapitiliti muligomi likulu lya uwega wa kumpindi kuliboma. Shakapanu wamtula mfalumi kalivagi mushiti sha shifalumi. 21 Hangu wenikaya woseri wanemeleliti na mji goseri guweriti jii toziya malikiya Atalia kaweriti kalaguwa kwa ligumba.