1 Mushinja sha kwanja sha ukolamlima wa Koreshi, mfalumi gwa Uajemi, Su shisoweru sha Mtuwa Mlungu shakatakuliti kwa kupitira mbuyi Yeremiya shitimiyi. Mtuwa Mlungu kamtenditi Koreshi mfalumi gwa Uajemi, kalaviyi lagiru ayi muufalumi wakuyi na lagiru ali lilaviyitwi kwa kulembwa.

2 Hangu ndo ntambu yakalonga Koreshi, mfalumi gwa Uajemi. Mtuwa Mlungu, Mlungu gwa kumpindi, kampanana falumi zoseri za pasipanu na kandagalira nimunyawiri Numba Nkulu aku Yerusalemu, muisi ya Yuda. 3 Hangu, kila muntu muwamu mwenu woseri mwenga yamuwera wantu wakuyi,Mtuwa Mlungu gwakuyi kaweri pamuhera nayu na kagendi Yerusalemu aku Yuda na kuyinyawa kayi numba ya Mtuwa Mlungu, Mlungu gwa Israeli, Mlungu yakaguwirwa aku Yerusalemu. 4 Kila yumu yakasigaliti mkomu muumanda pakafira kuwuya, wantu wapakwegera na yomberi wamtangi kwa kumpanana madini ga feza, zahabu, pamuhera na vintu na vigongolu, pamuhera na malaviwu ga kufira weni toziya ya Numba Nkulu ya Mlungu aku Yerusalemu.

5 Hangu, wawuka walongoziya wa nkolu za makabila ga Yuda na Benjamini na watambika na Walawi na kila muntu mweni Mlungu kampanana moyu gwa kugenda kunyawa kayi Numba Nkulu ya Mtuwa Mlungu, yayiwera aku Yerusalemu. 6 Wapakwegera na womberi wawatangiti walonguziya awa kwa kuwapanana vyombu vya madini ga feza, zahabu na lunda, vigongolu na vintu vimonga vya beyi nkulu, na virii yavilaviwitwi kwa kufira weni toziya ya Numba Nkulu ya Mlungu.

7 Mfalumi Koreshi kawawuziliriti vyombu vyeni mfalumi Nebukadineza kaweriti kavitola munumba ya Mtuwa Mlungu na kuvitula mnumba ya wamlungu wakuyi. 8 Kampananiti Mitiredati, yakaweriti mtula vyombu avi na yomberi kaviwalanga kulongolu kwa Sheshibaza, mkolamlima gwa Yuda. 9 Avi ndo vintu vyaviwalangitwi: Bakuli selasini za zahabu, Bakuli elufu yimu za madini ga feza, visahani vidikadika ishilini na tisa vya madini ga feza, 10 Bakuli ndidini za zahabu selasini, Bakuli ndidini za madini ga feza miya msheshi na lilongu, Vyombu vimonga elufu yimu.

11 Vyombu vyoseri vya zahabu na feza, pamuhera na vintu vimonga viweriti elufu mhanu miya msheshi. Vyoseri avi, Sheshibaza kavitoliti mpaka Yerusalemu shaka yomberi pamuhera na wantu wamonga pawalawiti muuhamisiwu Babeli kugenda Yerusalemu.