1 Pagusokiti mwezi gwa saba wantu wa Israeli yawaweriti walikala kala mumiji yawu, woseri wajojonikiti pamuhera aku Yerusalemu. 2 Yoshuwa, mwana gwa Yosadaki, pamuhera na watambika wayaguyi na Zerubaberi, mwana gwa Shealitieli, pamuhera na walongu wakuyi, wanyawiti kayi shitalawanda sha mabuhi sha Mlungu gwa Israeli, su wawezi kumlavilira tambiku za kulunguziya ntambu yayilembitwi mulilagiru lya Musa, muntu gwa Mlungu. 3 Wanyawiti shitalawanda ashi pahala palapalii pashiweriti makashu, toziya wawatiriti wantu yawaweriti wankulikala muisi ayi. Shakapanu waweriti wankumlavilira Mtuwa Mlungu tambiku za kulunguziwa pampindi pakuyi kila mandawira na pamihi. 4 Watenditi msambu gwa visasa ntambu yayilembitwi mulilagiru, kila lishaka walaviyiti tambiku za kulunguziwa zyazifiruwitwi mulishaka ali. 5 Viraa walaviyiti tambiku za ntambu iraayi za kulunguziya nakamu za kila lishaka na tambiku yazilaviwitwi shaka sha msambu gwa mwezi gwa syayi na mumisambu imonga yoseri yakalagaliriti Mtuwa Mlungu. Viraa, walaviyiti tambiku zoseri kwa kufira weni. 6 Tembera lyanjiru lya Numba Nkulu ya Mtuwa Mlungu liweriti lyankali kunyawa, wantu wanjiti kulaviya tambiku za kulunguziwa kwa Mtuwa Mlungu kwanjira lishaka lya kwanja lya mwezi gwa saba.

7 Shakapanu wantu walaviyiti mpiya za kuwalipa wasongola mabuhi na wasongola mbawu na wanyawa, viravilii walaviyiti shiboga, virandu na lipaki lya mizeyituni, su vijegitwi mumiji ya Tiru na Sidoni kupata mitera ya miyerezi kulawa Lebanoni. Mitera ayi ijegitwi kupitira mubahari mpaka Yopa. Goseri aga gatendekiti kwa utanga wa mfalumi Koreshi gwa Uajemi. 8 Su, wantu wanjiti lihengu mumwezi gwa pili gwa shinja sha pili pa kusoka mnumba ya Mlungu kumji gwa Yerusalemu. Zerubaberi, mwana gwa Shelitiyeli, Yoshuwa mwana gwa Yosadaki na walongu wawu wamonga na watambika na Walawi na wantu wamonga woseri yawawuyiti Yerusalemu kulawa muuhamisiwu, waweriti pamuhera mulihengu ali. Walawi woseri yawaweriti wa vinja ishilini ama nentu, wasyagulitwi su kugolokera lihengu lya kuyinyawa kayi numba ya Mlungu. 9 Yoshuwa na wana wakuyi na walongu wakuyi pamuhera na Kadimiyeli na wana wakuyi wa lukolu lwa Yuda waweriti pamuhera kugolokera unyawa wa numba ya Mlungu. Viravilii watangitwi na wiwuka wa Henadadi na walongu wawu Walawi.

10 Wanyawa pawanjiti kunyawa lyanjiru lya Numba Nkulu ya Mlungu, watambika agawu pawawera wavala nguwu zawu, wagolokiti pahala panu na mapenka mumawoku mwawu na Walawi wa lukolu lwa Asafu wagolokiti na magombugombu gawu. Hangu wamkwisiti Mtuwa Mlungu ntambu yawalagaliritwi na mfalumi Dawudi gwa Israeli. 11 Wimbiti kwa kwankana, pawamzyuma na kumkwisa Mtuwa Mlungu.

"Toziya ufiru na uheri wakuyi kwa Israeli ulikala mashaka goseri."

Wantu woseri wamkwisiti Mtuwa Mlungu kwa makakala gawu goseri, toziya liyanjiru lya Numba Nkulu ya Mtuwa Mlungu gwanjitwi kunyawa. 12 Kumbiti watambika wavuwa na Walawi na wakulu wa nkolu yawaweriti wazewi na weni waweriti wawona Numba Nkulu ya Mlungu ya kwanja, waliriti kwa liziwu likulu pawaliwoniti lyanjiru lya numba ya Mlungu lyankunyawa, agawu wantu wamonga wabotiti kwa kunemelera. 13 Wantu wawezitindiri kulinganiziya pakati pa maziwu ga nemeru na ga kulira, toziya wantu watenditi umatu nentu na umatu wawu upikanikiti kutali nentu.