1 Shakapanu wankondu wa wantu wa Yuda na Benjamini pawapikiniriti handa wantu yawawuyiti kulawa muuhamisiwu wankunyawa kayi Numba Nkulu ya Mtuwa Mlungu, Mlungu gwa Israeli, 2 Zerubabeli na wakulu wa nkolu wamgendiriti na kumgambira, "Shondi gututangi kunyawa kayi Numba Nkulu ya Mlungu. Twenga handa mwenga tumguwira Mlungu gwenu na tuwera twankumlavilira tambiku kwanjira makashu ga Esari Hadoni, mfalumi gwa Ashuru yakatujegiti panu."

3 Kumbiti Zerubabeli na Yoshuwa na wakulu wamonga wa nkolu za Israeli wamgambira, "Twenga tufirandiri mwenga mtutangi kunyawa Numba Nkulu ya Mlungu gwetu. Twaweni twenga hatumnyawiri Mtuwa Mlungu, Mlungu gwa Israeli, handa mfalumi Koreshi gwa Uajemi ntambu yakatugambiziyiti."

4 Shakapanu, wantu yawaweriti wankulikala pahala panu wafiriti kuwatweziya na wawatenditi Wayuda watiri. Su nawendereya kunyawa. 5 Viraavirii wawapananiti swinda wakulu wa isi ya Uajemi wawadiwili shawafira kutenda Wayuda. Wendereyiti kutenda hangu shaka shoseri sha ukolamlima wa Koreshi, mpaka shaka sha ukolamlima wa Dario.

6 Mfalumi Ahasuero pakanjiti kukolamlima, wankondu wa wantu yawalikaliti Yuda na Yerusalemu wawalemberiti hamba za kusitaka kwa mfalumi.

7 Shakapanu pakakolitimlima Aritashasta, mfalumi gwa Uajemi, Bishilamu na Mitiredati na Tabeeli na waganja wakuyi, wamlemberiti luhamba mfalumi Aritashasta. Luhamba alu lulembitwi kwa malembu ga Kiaramu na kutafisiliwa kwa luga mfalumi kayimana.

8 Viraavirii mkolamlima Rehumu na Shimshai mlemba, kamlemberiti Aritashasta luhamba alu toziya ya wantu wa Yerusalemu.

9 "Baruwa ayi ilawa kwa neni Rehumu, mkolamlima na Shimshai mlemba, pamuhera na wayetu na watoza na wakulu na woseri yawalawa mumji gwa Ereki na Babeli na Susa muisi ya Eramu, 10 pamuhera na wantu wa maisi gamonga yawatolitwi na Asuri Banipali, muntu mkulu na yakana makakala na kuwahamisiya na kuwajegera kumji gwa Samariya na pahala pamonga wa kwaguzyeta mshenji mwa Eufrati."

11 Luhamba lweni lulongiti hangu.

"Kwa mfalumi Aritashasta, twenga wantumintumi waku kulawa muisi ya kwaguzyeta mshenji mwa Eufrati, tukulamsiya.

12 Gwee mfalumi tufira guvimani, handa Wayahudi wiziti panu kulawa pahala pamonga pa ufalumi waku wagenda Yerusalemu na wankunyawa kayi mji gwana wantu wagalambuka na wakontola. Wankumalilira kunyawa vibambaza vyakuyi na kunyawa miyanjiru. 13 Gwee mfalumi, tufira guvimani handa mji agu pagunyawiwa kayi na vibambaza vyakuyi pavipera, wantu hapeni walipi kodi, ushulu pota ada na luhanja lwaku halupunguwi. 14 Toziya twenga tukujimira gwenga mfalumi, tufirandiri kukuwona gwenga mfalumi gwetu gusoniziwi, hangu tuwona iherepa tukugambiri. 15 Su ulolalola utendeki mumaholu ga wambuyi waku, amu haguyambuli handa kwanjira makashu, wantu wa mji agu waweriti wagalambuka na kuwagaziya nentu wafalumi na wakolamlima wa isi. Mirandu ayi igutenditi mji agu guhalibisiwi. 16 Hangu tukugambira handa payiwera mji agu hagunyawiwi kayi na vibambaza vyakuyi pavipera, hapeni guwezi kukolamlima isi ya kwaguzyeta mshenji mwa lushemba lwa Eufrati."

17 Shakapanu mfalumi kawankuliti hangu.

"Kwa mkolamlima Rehumu na kwa Shishai mlemba, pamuhera na wayenu woseri yawalikala Samaliya na yawalikala pahala pamonga muisi ya kwaguzyeta mshenji mwa lushemba lwa Eufrati.

18 Luhamba lwamnjegeriti lubetulwa kulongolu kwangu na neni nilumana. 19 Ndagaliriti ulolalola utendeki na imanikana kuwera kwanjira makashu mji agu gwa Yerusalemu guweriti guwalera wafalumi na gumema wantu wagalambuka na wakontola. 20 Wafalumi wana makakala wagukolitimlima mji agu na isi ya kwaguzyetera mshenji mulushemba Eufrati agawu pawawera wankutola kodi na ushuru. 21 Hangu, muwalagaliri wantu awa waleki kugunyawa kayi mji agu mpaka pandagalira kayi. 22 Mtendi mlandu agu kalongola, naniza kupata asala."

23 Pawamaliriti kubetula luhamba alu kulawa kwa Aritashasita, Rehumu na Shimshai yakaweriti mlemba na wayaguyi walopokera kugenda Yerusalemu na kuwakakanika Wayahudi waleki kugunyawa mji.

24 Hangu lihengu lya kunyawa kayi Numba Nkulu ya Mlungu kumji gwa Yerusalemu ligolokiti mpaka shinja sha pili sha ukolamlima wa Dario, mfalumi gwa Uajemi.