1 Mfalumi Dariu kalagaliriti, wantu waloliloli mumaholu yagawera munumba ya shifalumi aku Babeli. 2 Kumbiti shitabu shiwonikiti mji gwa Ekibatana mumji gwa Mediya na sheni shiweriti na malagalalira aga:

3 Mfalumi Koreshi pakakolitimlima mushinja sha kwanja kalagaliriti Numba ya Mlungu inyawiwi kayi kumji gwa Yerusalemu, panu paweri pahala pa kulaviwa tambiku na malaviwu ga kulunguziwa. Kugenda kumpindi kuweritin mita ishilini na saba upana wakuyi mita ishilini na saba. 4 Vibambaza vyakuyi vinyawiwi kwa msitali mitatu ya mabuhi makulu na pampindi pakuyi patulwi mbawu. Malipu gakuyi galawi munumba ya mfalumi. 5 Viravirii, Vyombu vyoseri vya zahabu na feza vyakavitoliti mfalumi Nebukadineza kulawa kunumumba nkulu ya Mlungu aku Yerusalemu na kuvijegera Babeli, vifiruwa viwuziwi na kila shintu shilikali pahala pakuyi munumba nkulu ya Mlungu.

6 Ndo mfalumi Dariu kajega ulagilagi awu:

Kwa Tatenai, mkolamlima gwa mji gwa kwaguzyeta mshenji mwa lushemba lwa Eufrati na Shetari Bozenai na wakulu wayagu.

Mlikali kutali na Numba nkulu ya Mlungu, 7 mleki lihengu lya unyawa wa Numba Nkulu ayi ya Mlungu lyendereyi. Mumuleki mkolamlima gwa isi ya Yuda na wakulu wa Wayahudi wayinyawa Numba ya Mlungu pahala pakuyi. 8 Nentu ya aga, ndagalira handa mwenga hamuwatangi mulihengu ali. Malipu gawu goseri gankulawa mumji gwa kwaguzyetera mshenji mulushemba Eufrati, su lihengu naligoloka. 9 Kila lishaka pota kuleka, hamuwapanani watambika wa Yerusalemu kila shintu shawafira, iweri ng'ombi shipalu mdidini, kondolu shipalu ama mwana kondolu gwa tambiku za kulunguziya kwa Mlungu gwa kumpindi, ama nganu ama munu ama divayi ama lipaki lya mizeyituni. 10 Goseri aga hagatendeki su wawezi kumlavilira Mlungu gwa kumpindi tambiku yazimfiriziya na wanduwiri neni na wana wangu. 11 Viraavirii ndagalira muntu yoseri yakajimira ndiri lagiru ali, mpandakati itupulwi munumba yakuyi isongolwi uwega wumu na katumbulirwi. Shakapanu numba yakuyi itendeki kuwera lifunkusi. 12 Mlungu yakasyaguliti mji gwa Yerusalemu kuwera pahala pakuyi su wantu wamguwiri yomberi na kamgusiyi mfalumi ama muntu yoseri yakalema kukola lagiru ali ama yakafira kuyihalibisiya numba ayi ya Mlungu yayiweriti kumji Yerusalemu. Neni Dariu ndagalira kila muntu kajimiri lagiru ali.

13 Kwa lagiru lyakalagaliriti mfalumi Dariu na Tatenayi, mkolamlima gwa mkowa gwa kwaguzyeta mshenji mwa lushemba Eufrati na Shetari Bozenayi na wakulu wayawu, wajimiriti malagaliru ga mfalumi kwa makakala gawu goseri. 14 Wakulu wa Wayahudi wendereyiti weri nentu na lihengu lya unyawa wa numba nkulu ya Mlungu, pawapananwa moyu na mbuyi Hagai na Zekaria, mwana gwa Ido. Wamaliliti kunyawa numba nkulu ya Mlungu ntambu yawagambilitwi na Mlungu gwa Israeli na ntambu yawalagaliritwi na mfalumi Koreshi na mfalumi Dariu na mfalumi Aritashasita, gwa Uajemi. 15 Lihengu lya kunyawa numba ayi liperiti mlishaka lya tatu lya mwezi gwagushemwa Adari, mushinja sha sita sha ukolamlima wa mfalumi Dariu. 16 Su, wantu wa Israeli na watambika na Walawi na wantu wamonga yawawuyiti kulawa muuhamisiwu, wayipungiti numba nkulu ayi ya Mtuwa Mlungu kwa nemeru nkulu. 17 Pawayipungiti numba nkulu ya Mlungu, walaviyiti ng'ombi shipalu miya yimu, kondolu shipalu miya mbili, wanakondolu miya msheshi na mbuzi shipalu kumi na mbili toziya ya tambiku ya kuwusiya vidoda, mbuzi yumu kwa kila likabila lya israeli. 18 Viravirii, wawapanga, watambika na Walawi mulihengu lya Mlungu ntambu yayilagaliritwi mushitabu sha Musa.

19 Mlishaka limu lya kumi na msheshi lya mwezi gwa kwanja, wantu yawawuyiti kulawa muuhamisiwa wanemeleliti msambu gwa Pasaka. 20 Watambika na Walawi waweriti wankulipunga, woseri waweriti waherepa nentu. Walikituliti mwanakondolu gwa Pasaka toziya ya wantu woseri yawawuyiti kulawa muuhamisiwa na toziya ya walongu wawu watambika na toziya yaweni. 21 Yawaliyiti mwanakondolu gwa Pasaka waweriti Waisraeli woseri yawawuyiti kulawa muuhamisiwu pamuhera na wantu wamonga woseri yawaweriti waleka njira za wantu yawawerandiri Wayahudi su wamguwira Mtuwa Mlungu, Mlungu gwa Israeli. 22 Kwa mashaka saba wantu wanemeleliti kwa sheleku msambu gwa mabumunda yagalekeruwa ndiri simika, toziya Mtuwa Mlungu kawapanananiti nemeru na kamtenda mfalumi gwa Ashuru kawafiri womberi na kawatangiti kunyawa Numba Nkulu ya Mlungu, Mlungu gwa Israeli.