1 Pa vinja vitangala vya ukolamlima wa mfalumi Aritashasta gwa Uajemi, paweriti na muntu yumu wamshemiti Ezra. Ezra kaweriti mwana gwa Seraya na Seraya kaweriti mwana gwa Azaria na Azaria kaweriti mwana gwa Hilikiya, 2 Hilikiya kaweriti mwana gwa Amariya na Amariya kaweriti mwana gwa Azariya na Azariya kaweriti mwana gwa Merayoti, 3 Merayoti kaweriti mwana gwa Zerariya na Zarariya kaweriti mwana wa Azariya na Azariya kaweriti mwana gwa Merayoti, 4 Merayoti kaweriti mwana gwa Zerahiya na Zerahiya kaweriti mwana gwa Uzi na Uzi kaweriti mwana gwa Buki, 5 Buki kaweriti mwana gwa Abishuwa na Abishuwa kaweriti mwana gwa Finehasi na Finehasi kaweriti mwana gwa Eleazari na Eleazari kaweriti mwana gwa Aruni mtambika mkulu.

6 Ezra kawukiti Babeli, yomberi kaweriti mfunda yakana umani uvuwa nentu mulilagilu lyeni Mtuwa Mlungu, Mlungu gwa Israeli, zyakaweriti kampanana Musa. Mfalumi kampananiti Ezra kila shintu shakafiriti toziya Mtuwa Mlungu kaweriti pamuhera na yomberi. 7 Mshinja sha saba shakakolitimlima mfalumi Aritashasta, Ezira kalawiti Babeli kagenda Yerusalemu. Kalilongoziyiti pamuhera na wamu wa wantu wa Israeli na watambika na Walawi na Wayimba na walolera migomi mikulu na watendera wa numba nkulu ya Mlungu. 8 Wasokiti mji gwa Yerusalemu mulishaka lya kwanja lya mwezi gwa mhanu mushinja sha saba sha ukolamulima wa mfalumi Aritashasta. 9 Mtuwa Mlungu kagufaniziya nentu mwanja gwawu yawanjiti mulishaka lya kwanja lya mwezi gwa kwanja. Kamtangiti. 10 Ezra kaweriti kalilaviya kwa moyu goseri kulifunda galiru lya Mtuwa Mlungu, kuyijimira na kuwafunda wantu wa Israeli malagalalira na lagiru zakuyi.

11 Alu ndo luhamba lweni Aritashasita kampananiti Ezra, yakaweriti mtambika na mfunda na yakana umana nentu lagiru na maberiziwu geni Mtuwa Mlungu kawapananiti wantu wa Israeli.

12 Kulawa kwa Aritashasita, mfalumi gwa wafalumi, nikujegera luhamba alu gwenga Ezra, mtambika na mmana gwa lagiru lya Mtuwa Mlungu gwa kumpindi, Gwakashina!

13 Ndagalira handa muukolamlima wa neni, muntu yoseri gwa Israeli, ama watambika wawu ama Mlawi, pakafira kuwuya Yerusalemu, kaweza kugenda pamuhera na gwenga. 14 Neni pamuhera na wagambiziya wa neni saba, tukulagalira gugendi Yuda na Yerusalemu gukatendi ulolalola wa lagiru lya Mlungu gwaku yagupananitwi gwenga handa ikolwa nakaka. 15 Hagutoli vipandi vya madini ga feza na zahabu geni neni na wagambiziya wa neni tumlavilira kwa kufira weni Mlungu gwa Israeli mweni Numba Nkulu yakuyi ya Yerusalemu. 16 Hagutoli viraa vipandi vya madini ga feza na zahabu yoseri yagujojonira muisi yoseri ya Babeli, pamuhera na mafupu ga kufira weni gawalaviyiti Waisraeli na watambika wawu toziya ya Numba Nkulu ya Mlungu gwawu yayiwera Yerusalemu.

17 Mpiya azi haguyitenderi kwa kulola weri kuhemera wang'ombi shipalu, wakondolu shipalu, wanakondolu na tambika ya viboga na divayi na kuvilaviya mushitalawanda munumba nkulu ya Mlungu gwenu yayiwera aku Yerusalemu. 18 Mpiya na zahabu yayisigala guweza kuyitendera pamuhera na wanalushi wayagu ntambu yamufira, handa Mlungu ntambu yakafira. 19 Vintu vyoseri vyawakupananiti toziya ya nguwira ya Mtuwa Mlungu gwaku, hagumlavaliri Mlungu gwa Yerusalemu. 20 Pagufira shintu shimonga shoseri toziya ya Numba ya Mlungu gwaku, guweza kushipata kulawa muluhanja lwa mfalumi.

21 Neni mfalumi Aritashasita, ndagalira kwa watula luhanja woseri mumji gwa kwaguzyeta mshenji ya lushemba Eufrati, handa shoseri shakafira Ezra, mtambiku na mfunda gwa lagiru ya Mlungu gwa kumpindi, gumpanani ntambu yakafira. 22 Upeleru wa kumpanana ndo kilu elufu tatu miya msheshi za vipandi vya madini ga feza, nganu kilu lilongu elufu, divayi lita elufu mbili na lipaki lya mizaituni lita elufu mbili na munu shiyasi shoseri shakafira. 23 Kila shintu shakalagaliriti Mlungu gwa kumpindi toziya ya numba yakuyi, mpaka shitendeki teratera, nakiza kuukalalira ufalumi wa neni ama wa wanawangu. 24 Viraavirii tuwagambirani mbereziwa kutola kodi na ada kwa watambika na Walawi na wayimba na walolera ligomi likulu na watenda lihengu ama wantumintumi wa Numba Nkulu ayi ya Mlungu.

25 Na gwenga Ezra, kwa luhala lwakakupananiti Mlungu gwaku, ayi yaguwera nayi, gusyaguli mahakimu na watoza yawafira kuwalonguziya wantu woseri wa mji gwa kwaguzyeta mshenji mwa lushemba Eufrati weni walikala kwa kukola lagira lya Mlungu gwaku. Na muntu yakayimana ndiri lagiru ayi kafiruwa gumfundi. 26 Muntu yoseri hakajimili ndiri lagiru ya Mlungu gwaku ama ya mfalumi, na katozwi kufuwa ama kahamisiwi ama kapokwi lunda yakuyi ama kutatirwa.

27 Ezra kalonga, kazyumwi Mtuwa Mlungu, Mlungu gwa watati wetu, weni kampanana mfalumi moyu gwa kuyipanana ligoya numba ya Mtuwa Mlungu yayiwera Yerusalemu. 28 Kwa lusungu lwakuyi Mlungu, ntangitwi na mfalumi na wakulu yawana uwezu mkulu. Nilipananiti moyu kwa kuwera Mtuwa Mlungu, Mlungu gwangu, kaweriti pamuhera naneni, mpaka paniwajojoniliti wakulu wa Israeli su wawuyi pamuhera na neni.