1 Pa mirandu yoseri ayi kutendeka, "Wakulu waniziliti na kung'ambira hangu, wantu wa Israeli, watambika na Walawi haweni lituli gweka na wantu wa isi zimonga weni wankutenda nkalaliru, handa walii Waamoni na Wamowabu na Wamisri na Wakanaani na Wahiti na Waperizi na Wayebusi na Waamoni. 2 Wayahudi wankuwayuga wadala yawawerandiri wayahudi na viraavirii wawayugiziya wantemba wawu. Hangu wantu wa Mlungu walihanganika na wantu wa maisi gamonga. Walonguziya na wakulu wawu ndo yawanjiti kutenda makontola aga." 3 Panigapikiniriti aga, mpapuliti nguwu zyangu na lihabiti lyangu, nizitupula viri zyangu na ndevu zyangu kwa hinginika nkulu na nilivagiti pasi agawu pawera na lyoga. 4 Shakapanu wantu woseri yawaweriti na lyoga toziya ya visoweru vyakalongiti Mlungu gwa Israeli kwa vidoda vya walii yawawuyiti kulawa muuhamisiwu pawanjiti kujojonika pakwegera na neni agawu pantira mpaka pamihi shaka sha kulaviya tambiku.

5 Pamihi, shaka sha kulaviya tambiku pashisokiti, ng'olokiti kwa hinginiku palii paweriti nilikala agawu nguwu zyangu na lihabiti paliwera lidegeka, nsuntamala na kunyasula mawoku gangu kwa Mtuwa Mlungu, Mlungu gwanga panduwa, 6 Gwee Mlungu gwangu, monasoni nkulu nentu kunyasula sheni shangu kulongolu kwaku. "Vidoda vyetu vilimamatira kupita mituwi yetu, kulii kuliwona kwetu twana makosa kusoka ata kumpindi kwa Mlungu. 7 Kwanjira mashaka ga wambuyi wetu mpaka vinu, twenga tutenda vidoda nentu. Toziya ya vidoda vyetu twenga na vidoda vya wafalumi wetu na vidoda vya watambika wetu tukankwa na isi zimonga, tulaguwa, tutolwa lopola na kupokwa lunda zyetu. Na mpaka vinu, tulekerwa soni nentu. 8 Kumbiti vinu, gwee Mtuwa Mlungu, Mlungu gwetu, kwa shaka shididini gutulanguziya lusungu lwaku na kuwatenda wamu wetu kulipota kulawa muuhamisiwu na kulikala kwa uponera pahala panu pananagala, pa muuhamisiwu gutupanana lusekeru na makaliru ga syayi. 9 Tembera twenga tuweriti wamanda kumbiti Mlungu gwetu gutulekandiri. Guwatenditi wafalumi wa Uajemi watutenderi maheri na kutuleka wakomu na kuyinyawa numba yaku yayibomukiti, na gwenga gututenda tulikali ponera panu Yuda na Yerusalemu."

10 "Kumbuti vinu, gwee Mlungu gwetu, tulongi shishi kwa goseri aga yagalawiliti? Pamuhera na goseri gagututenderiti, tuzijimirandiri lagiru zaku, 11 zyagutupanananiti kupitira wantumintumi waku wambuyi wa Mlungu, pagulonga, isi yamuyigendera na yeni hayiweri yenu ndo isi humba yana uhakata wa wanalushi kulawa isi gwekagweka, kwa makalaziwu gawu, wayimemiziya humba nduu kila pahala. 12 Hangu, namuwaleka wahinga wenu wayugwi na wana wawu, vilavilii namuwaleka wantemba wenu wawayugi na wahinga wawu. Viraa, namuwatanga walikali poneka pota nawawera na mbatiru, pamtenda hangu hamuweri na likakala na kulinoma mirandu miheri ya isi ayi na isi hayiweri ya wana wenu mashaka goseri. 13 Goseri yagatupatiti gatupata toziya tutenditi makontola na madoda gavuwa. Kumbiti gwenga Mlungu gwetu, gututoza padidini kuliku vidoda vyetu vyatutenditi, na gwenga guwaleka wamu wetu wakomu. 14 Hashi, hatuzimegi lagiru zaku kayi na kuliyuga na wantu awa yawatenda makontola aga? Aga gakutenda gwenga gukalali Hashi, hapeni gutukalaliri na kutwagamiziya, nakasigala ata yumu gwetu mkomu pota yoseri gwa kuponeka? 15 Gwee Mtuwa Mlungu, Mlungu gwa Israeli, gwee gutenda ntambu yayifiruwa na gutuleka wakomu ntambu yatuwera leru. Tulonga vidoda vyetu kulongolu kwaku, patuvimana kuwera kwahera muntu yakaweza kwiza kulongolu kwaku pakawera yakana vidoda."