1 Awa ndo wakulu wa nkolu za wantu yawawuyiti pamuhera na neni Ezra kulawa Babeli, shaka sha ukolamlima wa mfalumi Aritashasita: 2 Mlonguziya gwa lukolu lwa Finehasi, kaweriti Gerishomu, na mlonguziya gwa Itamari kaweriti Danieli, mlonguziya gwa lukolu lwa Dawudi kaweriti Hatushi, 3 Mlonguziya gwa lukolu lwa Paroshi, kaweriti Zekaria mwana gwa Shekania, kawuyiti pamuhera na wapalu miya yimu amsini wa lukolu lwakuyi, yawalembitwi pamuhera. 4 Mlonguziya gwa lukolu lwa Pahati Moabu, kaweriti Eliehoenai mwana gwa Zerahia, kawuyiti pamuhera na wapalu miya mbili. 5 Mlonguziya gwa lukolu lwa Zatu, kaweriti Shekania mwana gwa Yahazieli, kawuyiti pamuhera na wapalu miya tatu. 6 Mlonguziya gwa lukolu lwa Adini kaweriti Ebedi, mwana gwa Yonatani, kawuyiti pamuhera na wapalu amsini. 7 Mlonguziya gwa lukolu Eramu, kaweriti Yeshaya, mwana gwa Atalia, kawuyiti pamuhera na wapalu sabini. 8 Mlonguziya gwa lukolu lwa Shefatiya, kaweriti Zebadia mwana gwa Mikaeli, kawuyiti pamuhera na wapalu semanini. 9 Mlonguziya gwa lukolu lwa Yoabu, kaweriti Obadiya mwana gwa Yehieli, kawuyiti pamuhera na wapalu miya mbili kumi na nani. 10 Mlonguziya gwa lukolu lwa Bani, kaweriti, Shelomiti mwana gwa Yosifia, kawuyiti pamuhera na wapalu miya yimu na sitini. 11 Mlonguziya gwa lukolu lwa Bebayi kaweriti, Zekaria mwana gwa Bebai, kawuyiti pamuhera na wapalu ishilini na nani. 12 Mlonguziya gwa lukolu lwa Azigadi, kaweriti Yohanani mwana gwa Hakatani, kawuyiti pamuhera na wantu miya yimu na lilongu. 13 Mlonguziya gwa lukolu lwa Adonikamu, kaweriti Elifeleti, Yeueli na Shemaya, kawuyiti pamuhera na wapalu sitini, awa wawuyiti shakapanu. 14 Mlonguziya gwa lukolu lwa Bigwayi, kaweriti Utayi na Zakuri, kawuyiti pamuhera na wapalu sabini.

15 Niwajojonira wantu woseri mbwega ya lushemba lwalugenda mji gwa Ahava. Aku, tugolosiyiti ng'onjeru kwa mashaka matatu. Nuwakaguliti wantu woseri pamuhera na watambika, kumbiti nimwonitindiri hata Mlawi yumu. 16 Hangu niwashemiti wakulu tisa wizi kwa neni: Eliezeri na Arieli na Shemaya na Yaribu na Elinatani na Natani na Zekariya na Meshulamu, pamuhera na wafunda wawili, Yoyaribu na Elinatani. 17 Nuwalagaliriti kwa Ido, mkulu gwa Wantu wa Kasifia, nimluwiti yomberi pamuhera na wayaguyi yawatenda lihengu Munumba Nkulu ya Mlungu, watujegeri wantu yanawatendi lihengu Munumba Nkulu ya Mlungu. 18 Kwa uheri lwakuyi Mlungu, watujegeriti Sherebia, muntu yakana luhala yakalawira mulukolu lwa Mahili, mwana gwa Lawi na mzukulu gwa Israeli, yomberi kiziti na wana wakuyi wapalu na wazukulu wakuyi kumi na nani. 19 Viravirii watujegeriti Hashabiya na Yeshaya, woseri wa lukolu lwa Merari, pamuhera na walongu wawu ishilini. 20 Vilaa, kuweriti na watendera wa Numba Nkulu ya Mlungu miya mbili ishilini weni wambuyi wawu waweriti wasyagulitwi na mfalumi Dawudi na wakulu wakuyi kuwatanga Walawi. Matawu ga wantu woseri awa galembitwi.

21 Shakapanu, ndagaliriti kuwera wantu woseri tusoki pakwegera na lushemba Ahava su toyi kuliya na kulinanagaziya kulongolu kwa Mlungu gwetu na kumluwa katuloleri na kutulonguziya mumwanja gwetu pamuhera na wana wetu na lunda zyetu zoseri. 22 Meyiweri soni neni kumluwa mfalumi kampanani wamashonta na wakwenafarasi wa kutulolera na wankondu munjira toziya weriti niwagambira kala kuwera Mlungu gwetu kawatekelera woseri yawamsakula, kumbiti kawakalalira na kuwazibu woseri yawamleka. 23 Hangu twoyiti kuliya na kumluwa Mlungu katuloleri, na yomberi kankula galii gatumluwiti.

24 Shakapanu nsyaguliti pakati pa wakulu wa watambika kumi na mbili, Sherebiya na Hashabiya pamuhera na wayaguyi kumi. 25 Awa niwapimiliti vipandi vya madini ga feza na zahabu na vyombu. Vintu avi vyeni mfalumi na watakula wakuyi na wakulu pamuhera na wantu wa Israeli vyawaweriti wavilaviya kwa tambiku ya Numba Nkulu ya Mlungu gwetu. 26 Avi ndo vintu vyaniwapimiliti: tani ishilini na mbil vya vipandi vya madini ga feza, Vyombu vyavinyawitwi kwa madini ga feza viweriti miya na utopa wakuyi kilu sabini na Zahabu kilu elufu tatu miya msheshi, 27 Mabakuli ishilini gaganyawitwi kwa zahabu, utopa wakuyi kilu nani, Vyombu viwili vyavinyawitwi kwa shaba iherepa vyana beyi nkulu handa vya zahabu.

28 Shakapanu niwagambira, "Mwenga ndo wantu wa Mtuwa Mlungu, vilaa na vyombu avi. Vipandi vya madini ga feza na zahabu vilaviwa kwa kufira weni kwa Mtuwa Mlungu, Mlungu gwa wambuyi wetu vyeni ndo vilaa vya Mlungu." 29 Mviloleri na mvituli weri mpaka pamuvipima muvyumba vya numba ya Mtuwa Mlungu yayiwera aku Yerusalemu kulongolu kwa watambika na wakulu, Walawi na wakulu wa nkolu za Israeli. 30 Su, watambika na Walawi wankiti na kuvitula weri, vipandi vya madini ga feza na zahabu na vintu vyoseri vyawapimiti na kuvijegera Yerusalemu munumba ya Mlungu gwetu.

31 Mulishaka lya kumi na mbili lya mwezi gwa kwanja, tulawiti mulushemba Ahava, kugenditi Yerusalamu. Mlungu gwetu kaweriti pamuhera na twenga, katulolera na wankondu na wapoka mnjira. 32 Patusokiti Yerusalemu, toyeriti kwa mashaka matatu. 33 Mlishaka lya msheshi, patuwera mngati mwa numba ya Mlungu gwetu, tupimiti vipandi vya madini ga feza ilii, zahabu na vyombu virii, shakapanu tumpanana mtambika Meremoti, mwana gwa Uria. Meremoti kaweriti pamuhera na Eleyazari, mwana gwa Finehasi kaweriti na Walawi wawili, Yozabali, mwana gwa Yeshuya na Nowadiya, mwana gwa Binuyi. 34 Kila shintu shiwalagitwi na kupimirwa na utopa wa kila shintu ulembitwi.

35 Shakapanu, wantu woseri yawawuyiti kulawa muuhamisiwu wamlaviliriti Mlungu gwa Israeli tambiku zawu za kulunguziwa. Walaviyiti wang'ombi shipalu kumi na mbili toziya ya Waisraeli woseri, wakondolu shipalu tisini na sita na mwanakondolu sabini na saba, viraa walaviyiti mbuzi kumi na mbili handa tambiku ya kuwusiya vidoda. Vigongolu woseri awa walaviwitwi kuwera tambiku ya kulunguziwa kwa Mtuwa Mlungu. 36 Viraavirii, wawapananiti watanga wa mfalumi na wakolamlima wa mji gwa kwaguzyetera mshenji mwa lushemba Eufrati, malagalira gawapananitwi na Mfalumi na womberi wawatangiti wantu na numba nkulu ya Mlungu.