1 Mashaka aga, wambuyi wawili, Hagayi na Zekariya, mwana gwa Ido, wawalaviliriti umbuyi Wayahudi yawaweriti walikala mji mkulu gwa Yuda na Yerusalemu, kwa litawu lya Mlungu gwa Israeli. 2 Shakapanu Zerubabeli, mwana gwa Shealitieli na Yoshuwa, mwana gwa Yosadaki, pawapikiniriti ulagilagi awu wanjiti kayi kuyinyawa Numba Nkulu ya Mlungu mumji gwa Yerusalemu, pawatangwa na wambuyi wa Mlungu.

3 Shaka shiraashi Tatinayi, mkolamlima gwa mji gwa kwaguzyeta mshenji mwa lushemba Eufrati na Shetari Bozenayi na wayaguyi, wagenditi Yerusalemu na kukosiya, "Gaa yakawagambiziyiti kuyinyawa kayi numba ayi mpaka muyimalira?" 4 Viraa wakosiyiti, Ndo ashina gaa yawanyawa nyumba ayi? Tugafira matawu gawu. 5 Kumbiti Mlungu kaweriti kankuwalolera wakulu wa Shiyahudi, hangu wakulu awa wawaberandiri mpaka pawamlembiriti mfalumi Dariu na kupikanira shakalongiti. 6 Su, Tatenai, mkolamlima gwa mji gwa kwaguzyeta mshenji mwa lushemba Eufrati na Shetari Bozenai na wayaguyi, wamlemberiti luhamba mfalumi Dariu.

7 Luhamba alu luweriti lulonga hangu. Kwa mfalumi Dariu, tukufilira ponga.

8 Tufira kukugambira gwee mfalumi, kuwera tugenditi kumji gwa Yuda payiweriti Numba Nkulu ya Mtuwa Mlungu mkulu, wantu wankuyinyawa numba kwa mabuwi makulumakulu na shibambaza shakuyi pashisoka pampindi shimatikwa mbawu. Lihengu ali litendwa kwa makakala na lyendereya weri.

9 Tuwakosiyiti wakulu wawu, ndo gaa kawapananiti lagira ya kunyawa kayi numba ayi mpaka kuyimalira. 10 Viraavirii tuwakosiyiti matawu ga walii wakulu su tukugambiri gwenga mfalumi walii yawagolokera lihengu ali.

11 Womberi watwankuliti hangu, twenga ndo wantumintumi wa Mlungu gwa kumpindi na pasipanu na twankuyinyawa kayi numba ayi yayinyawitwi na kumalirika vinja vitangala na mfalumi mkulu gwa Israeli. 12 Kumbiti toziya wambuyi wetu wamkalaziyiti Mlungu gwa kumpindi, yomberi kawaleka wakankwi na mfalumi Nebukadineza gwa Babeli, muntu kulawa isi ya Kalidayu, yomberi ndo yakayibomoliti numba ayi na kuwajega wantu muumanda aku Babeli. 13 Kumbiti mushinja sha kwanja sha ukolamlima wakuyi mfalumi Koreshi gwa Babeli kalagaliriti numba nkulu ayi ya Mtuwa Mlungu inyawiwi kayi. 14 Viraavirii kaviwuziya vyombu vya zahabu na feza vyeni mfalumi Nebukadineza kaweriti kavitoliti munumba nkulu ya Mlungu aku Yerusalemu na kuvitula munumba ya wamlungu wakuyi aku Babeli. Vyombu avi Koreshi kaviwusiyiti kunumba ya wamlungu wakuyi na kumpanana Sheshibaza mweni kamsyagulitwi kaweri mfalumi gwa Yuda. 15 Kamlagalira, Gutoli vyombu avi na kuviwuziya Munumba Nkulu ya Mlungu yayiwera Yerusalemu na kuyinyawa kayi Numba Nkulu ya Mlungu pahala pakuyi. 16 Shakapanu Sheshibaza kiziti na kutula lwanjiru lya Numba Nkulu ya Mlungu mumji gwa Yerusalemu na kulawa mashaka aga wantu wenderiyiti kunyawa kumbiti numba imalirika ndiri.’

17 Vinu pagufira gwee mfalumi, guwalagaliri wantu waloliloli mumaholu ga shifalumi mumji gwa Babeli handa mfalumi Koreshi kalagaliriti numba ayi ya Mlungu inyawiwi kayi mumji gwa Yerusalemu. Shakapanu tukuluwa gutugambiziyi shagulonga kwa mlandu agu.