1 Mfalumi Dawudi kaligambiriti lijojoniku lyoseri lilii lyalisokiti, "Mwana gwangu Selemani, mweni gweka yakuyi kasyagulitwi na Mlungu, kankali mntemba na kahera uzowelera uvuwa na lihengu ali ndo likulu. Toziya numba yakayinyawa ya muntu ndiri, ila ndo ya Mtuwa Mlungu. 2 Su, njonjonira vintukamalira nentu kwa uwezu wangu woseri kuyitulira numba ya Mlungu gwangu, Selemani kavifira toziya ya kunyawira numba nkulu ya Mlungu vyeni ndo shibigikiru sha zahabu, feza na shaba na shuma na mitera, mabuhi ga beyi nkulu, mabuhi ga kumemiziya vifungu, mabuhi yagashemwa njumu na langi gwekagweka na kila ntambu na malumalu. 3 Kayi, nentu ya vintu vyoseri vyandaviyiti toziya ya numba nanagala, ndaviya vintu vyangu namweni lya zahabu na feza na toziya niyifira numba ya Mlungu gwangu, ndaviya toziya ya numba ya Mlungu gwangu. 4 Tani miya lilongu na mhanu za zahabu kulawa ofiri, tani miya mbili sitini na mhanu za feza iherepa ya kumeremeriziya vibambaza vya numba nkulu, 5 na toziya ya vyombu vya zahabu na feza vyanavinyawiwi na mafundi. Ntula zahabu kwajili ya vyombu vya zahabu na feza kwajili ya vyombu vya feza. Ndo gaa su hakamlaviliri Mtuwa Mlungu leru?"

6 Shakapanu wakulu wa nkolu na walonguziya wa makabira ga Israeli na wakulu wa mashonta wa maelufu na wa mamiya, viraa na wakulu wagolokera wa mahengu ga mfalumi pawalaviyiti kwa kufira weni. 7 Walaviya toziya ya lihengu lya numba nkulu ya Mlungu. Tani miya yimu tisini za zahabu, tani miya tatu semanini za feza, tani miya sita sabini na mhanu za shaba na tani elufu tatu miya saba na hamsini za shuma. 8 Walii yawaweriti na mabuhi ga beyi nkulu wavilaviyiti vitulwi muluhanja lwa numba nkulu ya Mtuwa Mlungu, pasi pa ulolera wa Yehieli kulawa lukolu lwa Gerishoni. 9 Wantu wanemeleliti toziya walaviyiti kwa nfiru yawu weni na kwa moyu gwawu goseri wamlaviliriti Mtuwa Mlungu na mfalumi Dawudi kanemeleriti nentu.

10 Dawudi ndo kamukwisa Mtuwa Mlungu kulongolu kwa lijojoniru lyoseri, pakalonga, "Gukwiswi mashaka goseri na mashaka goseri, gwee Mtuwa Mlungu, Mlungu gwa mbuyi gwetu Yakobu. 11 Ukulu ndo waku, gwee Mtuwa Mlungu, gwana makakala, ukwisa, ukanka na uherepa. Vyoseri yaviwera kumpindi na pasipanu ndo vyaku. Gwee Mtuwa Mlungu, ufalumi ndo waku na gwenga gukwiswa na gukolamlima panani pa vintu vyoseri. 12 Ulunda na ligoya vilawa kwa gwenga, vyoseri guvikolamlima. Uwezu na makakala vya mumawoku gaku na gwenga guwakulaziya wantu woseri na kuwagangamaziya woseri. 13 Vinu gwee Mlungu gwetu, tulonga mayagashii na kulizyuma litawu lyaku likulu."

14 "Kumbiti neni na gaa na wantu wangu ndo wagaa, ata tuwezi kukupanana vintu avi? Toziya Vintu vyoseri vilawa kwa gwenga, twenga tukulavilira vyaviwera vyaku gamweni. 15 Twenga twa wahenga kulongolu kwaku na wamwanja ntambu yawaweriti wambuyi wetu woseri. Mashaka getu pasipanu ndo handa shiviniru shashipita, panu kwahera litumbiru lya kulikala. 16 Gwee Mtuwa Mlungu, Mlungu gwetu, uvuwa woseri awu watulaviyiti su kukunyawira numba toziya ya uweru wa litawu lyaku linanagala, ulawa mliwoku lyaku na goseri ndo gaku. 17 Nivimana Mlungu gwangu, handa gwenga guyijera miyoyu ya wantu na gufiriziwa na uaminika wawu. Na neni, kwa waminika wangu ntaviya vintu avi vyoseri kwa kufira namweni na vinu mona wantu waku yawawera panu, pawakulavilira kwa kufira weni na nemeru. 18 Gwee Mtuwa Mlungu, Mlungu gwa Abrahamu, Isaka na Yakobu, wambuyi wetu, gwendeleyi kuwatenda su wendereyi kulilaviya kwa gwenga na gutuli nfiru ya miyoyu yawu iweri na waminika kwaku. 19 Gumpanani mwana gwangu Selemani su kakoli lagiru zaku kwa moyu goseri na matakulu na malagalira gaku, katendi goseri su kawezi kumalira kuyinyawa numba nkulu ya Mlungu ayi yaniyitendiriti matandiru."

20 Shakapanu, mfalumi Dawudi kawagambiriti woseri yawajojonikiti, "Mmuzyumi Mtuwa Mlungu, Mlungu gwenu." Na woseri yawajojonikiti wamkwisa Mtuwa Mlungu, Mlungu gwa wambuyi wawu, wamsundamalira na kumguwira Mtuwa Mlungu na kumlavilira mfalumi Dawudi ligoya. 21 Lishaka lya pili wamlavilira Mtuwa Mlungu tambiku za kulunguziwa. Ng'ombi shipalu elufu yimu, kondolu shipalu elufu yimu na kondolu wadikadika elufu yimu, pamuhera na tambiku zawu za kulanda na tambiku zivuwa kwajili ya Waisraeli woseri. 22 Lishaka ali su waliya na walanda kwa nemeleru nkulu kulongolu kwa Mtuwa Mlungu.

Wamlumika Selemani mwana gwa Dawudi, mala ya pili. Wamwitira lipaki kaweri mkolamlima kwa litawu lya Mtuwa Mlungu na Sadoki kaweri mtambika. 23 Hangu Selemani kalivaga mu shiti sha ufalumi sha Mtuwa Mlungu kuweri mfalumi, pa Dawudi tati gwakuyi. Na yomberi katenditi weri muulonguziya wakuyi na isi yoseri ya Israeli imjimiriti. 24 Wakulu woseri na wamashonta na wana wapalu woseri wa Dawudi wajimiriti kuwera pasi pa mfalumi Selemani. 25 Mtuwa Mlungu kamtenditi Selemani kazyumwi kulongolu kwa Waisraeli woseri, kampanana ukulu wa shifalumi yawupita ukulu wa mfalumi yoseri yakakolitimlima Israeli pamberi pakuyi.

26 Dawudi, mwana gwa Yese, kaweriti mfalumi gwa Israeli yoseri. 27 Kakolitimlima Israeli vinja alubayini, vinja saba kakolitimlima pakawera Hebroni na vinja selasini na mitatu kakolitimlima pakawera Yerusalemu. 28 Kahowiti pakawera mzewi nentu, kalikala vinja vivuwa na lunda na ligoya. Na yomberi Selemani mwana gwakuyi, kakolamlima pa yomberi. 29 Visoweru vya mfalumi Dawudi kulawa kwanja mpaka upeleru, vilembitwi mumaholu ga mbuyi Samueli, mumaholu ga mbuyi Natani na mumaholu ga mbuyi Gadi. 30 Pamuhera na kukolamlima kwakuyi koseri na makakala gakuyi na mirandu yayimpatiti yomberi na isi ya Israeli na falumi zoseri za isi zapakwegera.