1 Wantu woseri wa Israeli wamgendiriti Dawudi aku Hebroni wamgambira, "Twenga twa walongu waku wa mwazi. 2 Shaka shashipititi, Sauli pakaweriti mfalumi gwenga ndo yagulonguziyiti waisraeli munkondu na Mtuwa Mlungu gwaku kakugambiziyiti, haguweri mlonguziya gwa wantu waneni Israeli na haguweri mkulu gwa wantu waneni Israeli. 3 Su wazewi woseri wa Israeli wamgendera mfalumi aku Hebroni na Dawudi katenda lipatanu nawu kulongolu kwa Mtuwa Mlungu, Shakapanu wamwitira lipaki Dawudi kaweri mfalumi gwa Israeli kulinganira na shisoweru sha Mtuwa Mlungu ntambu yakamgambiriti Samueli."

4 Mfalumi Dawudi na wamashonta woseri Israeli wagenditi na kugukomanga mji gwa Yerusalemu yagumanikaniti handa Yebusi na wenikaya wakuyi waweriti Wayebusi yawalikaliti amu. 5 Wenikaya wa Yebusi wamgambira Dawudi, "Hapeni gwingili mji agu." Ata hangu, Dawudi kalilopola liboma lya Siyoni, na shakapanu gushemitwi mji gwa Dawudi. 6 Dawudi kagagambira mashonta gakuyi, "Muntu gwa kwanja yakalonguziya kuwakomanga Wayebusi, hakaweri Mkulu gwa wamashonta." Na Yoabu mwana gwa Seruya kaweriti gwa kwanja kuwakomanga na hangu kawera mkulu gwa mashonta. 7 Dawudi kalikaliti muliboma ali, hangu, mji agu gushemwa mji gwa Dawudi. 8 Kagunyawiti mji agu, pakanjira Milo na kuguzyengeta goseri na Yoabu kamaliriti pahala papasigaliti. 9 Dawudi kendereyiti kuwera na makakala nentu toziya Mtuwa Mlungu yakana makakala kaweriti pamuhera na yomberi.

10 Ayi ndo walanga ya wakulu wa makambaku wa nkondu wa Dawudi, weni pamuhera na wantu wamonga woseri wa Israeli, yawamtankiti su kaweri mfalumi, teratera na shisoweru sha Mtuwa Mlungu shakashilaviyiti kwa Waisreli. 11 Gwa kwanja kaweriti Yashobeyamu gwa lukolu lwa Mhakimoni yakaweriti mkulu gwa wamashonta yomberi katenderiti msali kuwalaga wantu miya tatu, mu likomangu limu. 12 Yakafatiti kaweriti Eleazari mwana gwa Dodo kulawa lukolu lwa Ahohi yumu gwa vikambaku watatu walii. 13 Ayu kaweriti na Dawudi aku Pasi Damimu, shaka Wafiristi pawalijojoneriti aku kwajiri ya nkondu. Kweni aku kuweriti na lilambu limema shayiri, wantu wa Israeli pawanjiti kuwatira Wafiristi. 14 Kumbiti womberi wagolikiti ugangamala pakati pa lilambu lilii su kulilewelera, wawakanka Wafiristi. Mtuwa Mlungu kawalopola kwa kuwapanana ukanka mkulu.

15 Shakapanu makambaku watatu pakati pa wakulu selasini waseleriti mpaka kulitalawu, wamgendera Dawudi kumpanga aku Adulamu. Shaka ashi shonta lya Wafilisti liweriti litula ng'onjeru mululalanda lwa Refaimu. 16 Shaka shirii Dawudi kaweriti muliboma na lishonta lya Wafiristi liweriti kumuji gwa Betilehemu. 17 Dawudi kaweriti na hamu ya mashi ga ukayakwakuyi su kalonga, "Handa muntu mekawezi kumpanana mashi ga kulanda kulawa mulinegu lya Betilehemu lyaliweriti pakwegera na ligomi lya mji!" 18 Makambaku watatu walii walawiti, wapena pakati pa ng'onjeru ya lishonta lya Wafilisti, wagenda na kuteka mashi kulinegu lilii, pakwegera na ligomi lya mji, wamjegera Dawudi. Kumbiti Dawudi kalema kugalanda na yomberi kagita pasi handa tambiku kwa Mtuwa Mlungu 19 pakalonga, "Shitendu handa ashi shipitiziwi kutali na neni, weza ndiri kushitenda kulongolu kwa Mlungu gwangu. Hashi, guweza kulanda mwazi gwa ukomu wa wantu awa? Toziya wahatarishiti ukomu wawu kwa kugajega mashi aga." Hangu Dawudi kagalanda ndiri mashi aga. Ayi ndo mirandu yawayitenditi makambaku watatu walii. 20 Abishai, mlongu gwa Yoabu, kaweriti mkulu gwa makambaku selasini. Kalikomangiti kwa mgowa gwakuyi kwa wantu miya tatu, kawalaga, na kamanikiti ndiri pakati pa makambaku watatu. 21 Shakapanu kamanika nentu muwamu mwa makambaku selasini, ata kawera mkulu gwa lishonta lyawu, kumbiti kamanikaniti ndiri handa walii wagangamala watatu.

22 Benaya mwana gwa Yehoyada, kulawa Kabizeeli kaweriti lishonta mgangamala mweni katenditi mirandu mivuwa vilavilii kalagiti vikambaku wawili kulawa Mowabu na lishaka limu shaka sha balafu, kasulukiti na kulaga simba kulilindi. 23 Viraa, kamlagiti Mumisiri yumu, muntu mtali nentu, utali wakuyi nentu ya mita mbili na mumawoku mwakuyi kaweriti kajega mgoha mkulu nentu, handa mtera gwa mpota. Kumbiti Benaya kamkomiti na luhonga hera, kampoka mgoha agu na kumlaga Mmisri ayu kwa mgoha gwakuyi mweni. 24 Benaya mwana gwa Yehoyada katenditi mirandu ayi, kamanikaniti nentu pakati pa makambaku selasini walii. 25 Kaweriti kamanika pakati pa makambaku selasini, kumbiti kaweriti ndiri handa vikambaku watatu walii. Shakapanu Dawudi kampanana ulonguziya wa walolera wakuyi mweni.

26 Wamashonta makambaku wa Dawudi waweriti. Asaheli mlongu gwa Yoabu na Elihanani mwana gwa Dodo kulawa Betilehemu na 27 Shamoti na Mharodi na Helesi kulawa Peloni, 28 Ira, mwana gwa Ikeshi kulawa Tekoa na Abiezeri kulawa Anatoti, 29 Sibekai kulawa Hushati na Ilai kulawa Ahohiti, 30 Maharai Kulawa Netofati na Heledi mwana gwa Baana kulawa Netofatite, 31 Itai, mwana gwa Ribai kulawa Gibea, gwa likabira lya Benjamini na Benaya kulawa Piratoni na 32 Hurai kulawa muvishemba vya Gaashi, Abiyeli kulawa Aibati, 33 Azimaweti kulawa Baharumi, Eliyaba kulawa Shaaliboni, 34 wana wa Yasheni Mgiloni na Yonatani, mwana gwa Shagee Mharari, 35 Ahiamu, mwana gwa Sakari kulawa Harari, Elifale, mwana gwa Uri, 36 Heferi Mmekerati na Ahiya Mpeloni, 37 Heziro kulawa Karimeli na Naarai na mwana gwa Ezibayi na 38 Yoweli, mlongu gwa Natani na Mibihari, mwana gwa Hagiri, 39 Zeleki kulawa Amoni na Naharai kulawa Beoruti, yakaweriti mpapa vintu vya kulikomangira gwa Yoabu, mwana gwa Seruya, 40 Ira na Garebu, yawaweriti Waitiri, 41 Uria Mhiti na Zabadi, mwana gwa Ahilai, 42 Adina, mwana gwa Shiza Mrubeni, mkulu gwa Warubeni pakawera pamuhera na wantu selasini, 43 Hanani mwana gwa Maaka na Yoshafati Mmitini, 44 Uzia Mwashiterati na Shama na Yeieli na wana gwa Hotamu na Mwaroeri na 45 Yediali na Yoha mlongu gwakuyi na mwana gwa Shimiri na mlongu gwa Yoha kulawa Tizi na 46 Elieli kulawa Mahawi na Yeribai na Yoshavia wana wa Holinaamu, Itima kulawa Mowabu na 47 Elieli na Obedi na Yaasieli na Mmesobai.