1 Dawudi kayowiriti na wakulu wa mashonta wa vipinga vya maelufu na vipinga vya mamiya, pamuhera na wakulu woseri. 2 Shakapanu kawagambira Waisraeli woseri yawajojonikiti, "Payiwera hamjimirani na neni na payiwera ndo mafiru gakuyi Mtuwa Mlungu, Mlungu gwetu na tutendi hangu. Tulagaliri walagilagi wagendi wakawashemi walongu wetu yawasigaliti muisi ya Israeli, pamuhera na watambika na Walawi yawawera kumiji yawu na maliwuziwu gawu wizi waweri pamuhera na twenga. 3 Shakapanu tugendi twakalitoli lisandiku lya lipatanu lya Mlungu gwetu, toziya tuliloleritindiri shaka sha ukolamlima wa mfalumi Sauli." 4 Wantu woseri wajimiraniti na shawatakuliti ashi toziya wawoniti kuwera shitwatira shiheri.

5 Hangu Dawudi kawajojonira Waisraeli woseri muisi, kwanjira lushemba lwa Shihori mpaka kusika mwa Israeli mpaka mayingiliru ga Hamati su kulijega Lisandiku lya Mlungu kulawa Kiriyati Yearimu kugenda Yerusalemu. 6 Dawudi pakawera na Waisraeli woseri, wagenda mpaka mjini Baala, gweni ndo Kiriyati Yearimu, muisi ya Yudea, su kulitola kulawa aku Lisandiku lya Mlungu lyalipapwa kwa litawu lya Mtuwa Mlungu yakalikala mushiti shakuyi sha ufalumi pampindi pa viwumbi vyana mpapatiru. 7 Su, walitoliti lisanduku lya Mlungu kulawa kunumba ya Aminadabu mumbutuka ya Syayi. Uza na Ahio wayiyendeshiti mbutuka ayi yayikwegitwi na ng'ombi. 8 Dawudi pamuhera na Waisraeli woseri waweriti wankuvina kwa makakala gawu goseri, kulongolu kwa Mlungu. Wimbiti ugawu pawagomba zezi na vinubi na vinanda na matali na kayamba na matowazi. 9 Pawasokiti paluwaga lwa kukomera viboga lwa Kidoni, Uza katalipisiyiti liwoku lyakuyi kulikolera Lisandiku lya lipatanu toziya ng'ombi kaweriti kalikwala. 10 Katepu Mtuwa Mlungu kamkalalira Uza toziya kakola lisandiku su kamlaga. Uza kahowa palapalii kulongolu kwa Mlungu. 11 Dawudi kakalaliti toziya maya ga Mtuwa Mlungu gaweriti kwa Uza. Toziya ayi, pahala panu pashemitwi Peresi Uza, toziya Mlungu kamkomangiti Uza. 12 Lishaka lilii Dawudi kamtiriti Mlungu, kalonga, "Vinu, hanilitoli hashi Lisandiku la Mlungu ukaya kwaneni?" 13 Hangu Dawudi kalitoliti ndiri Lisandiku mpaka Yerusalemu, ila kalijegiti ukaya kwa Obedi Edomu yakalikala mji gwa Gati. 14 Lisandiku lya Mlungu lisigaliti kwa Obedi Edomu, kwa shaka sha miyezi mitatu na Mtuwa Mlungu kayitekeleriti numba ya Obed Edomu na vintu vyakuyi vyoseri.