1 Shaka mfalumi Dawudi pakaweriti kalikala kuliboma, lishaka limu kamshemiti mbuyi gwa Mlungu Natani na kumgambira, "Guloli, neni nilikala kunumba iherepa yayinyawitwi kwa mielezi, kumbiti lisandiku la lipatanu lya Mtuwa Mlungu lilikala kuliringu." 2 Natani kamgambira Dawudi, "Gutendi shoseri shaguholera mumoyu mwaku, toziya Mlungu kapamuhera na gwenga." 3 Kumbiti pashiru palaapalii shisoweru sha Mtuwa Mlungu shimwizira Natani, kulonga, 4 "Gugendi gwakamgambili ntumintumi gwangu Dawudi, Mtuwa Mlungu kalonga hangu. Gwenga hapeni gunyawiri numba ya kulikala. 5 Kwanjira shaka shilii paniwakomboliti wantu wa Israeli kulawa Misri mpaka leru, hanenilikali kunumba. Liweriti lyankuwuka kulawa pahala pamu kugenda pahala pamonga na kulawa makawu mpaka makawu gamonga." 6 Hashi, kila pahala pang'enditi na Waisraeli, nimkosiya mkulu gwawu yoseri yanimgambiriti kawaloleri wantu wa neni, "Kwa shishi munyawira ndiri numba ya mierezi?"

7 "Hangu su, mmugambiri ntumintumi gwangu Dawudi, Mtuwa Mlungu yakana makakala kalonga hangu, nikuwusiyiti kumaliwuziwu paguweriti gwankuwalolera kondolu, Su guweri mkulu gwa wantu waneni Israeli. 8 Kwanjira shaka ashi nweriti pamuhera na gwenga poseri pagugenditi na kuwakanka wankondu waku woseri kulongolu kwaku. Hanikutendi guweri gumaniki handa wakulu wamonga wa pasipanu. 9 Neni haniwasyaguliri wantu wangu wa Israeli pahala pa kulikala niwayoshikeri, su wakali pahala pawu weni, nawatabisiwa kayi. Na wantu wangesera yawatendera makakala hapeni wawatabisiyi kayi handa pakwanja, tabisiwa kayi na wantu wadoda, gambira ntambu yawatenditi makashu, 10 kwanjira mashaka paniwasyaguliti wakulu kwajiri ya wantu waneni Israeli, neni haniwakanki wankondu wawu woseri. Nentu ya goseri, neni Mtuwa Mlungu nikubwelera handa wiwuka waku hawaweri wafalumi. 11 Mashaka ga kulikala kwaku pagapera na paguwera guhowa na gwenga haguweri pamuhera na wambuyi waku yawahowiti. Hanimtendi yumu gwa wana waku, gwenga gamweni kaweri mfalumi na neni haniugangamaziyi ufalumi wakuyi. 12 Yomberi ndo hakanyawiri numba na neni haniwutendi ufalumi wakuyi uweri wa mashaka goseri. 13 Neni haweri tati gwakuyi na yomberi mwana gwa neni, hapeni mbusiyi ufiru wangu ntambu yambusiyiti kwa Sauli yakakulongoleriti. 14 Hanimtuli kakolimlima wantu wa neni Israeli na ufalumi waneni hawulikali mashaka goseri."

15 Natani kamgambiriti Dawudi mirandu yoseri ayi kulinganira na malola goseri gakagubutulitwi na Mlungu.

16 Shakapanu Mfalumi Dawudi kingira Muliringu Linanagala na kulivaga kulongolu kwa Mtuwa Mlungu, shakapanu kaluwa, "Neni na gaa, Gwee Mtuwa Mlungu na numba yangu ndo shishi ata gunkwisi ntambu ayi? 17 Aga hera, guntendera mavuwa nentu ata. Gung'ambiziya hagutendi kwa wiwuka wa neni wawiza gwee Mtuwa Mlungu. 18 Nikugambili shishi nentu, neni Dawudi ntumintumi gwaku, kwa kumkwisa hangu? Gwenga gumana na guntenda nweri na ligoya neni ntumintumi gwaku. 19 Gwee Mtuwa Mlungu, toziya ya ntumintumi gwaku na kwa nfiru yaku gamweni, gutenda shagulongiti shimaniki, su gamaniki matendu makulu goseri aga. 20 Kwahera gwingi handa gwenga, Gwee Mtuwa Mlungu na gatupikinira galanguziya handa kwahera Mlungu gwingi ila gwenga. 21 Kayi ndo wantu gaa pasipanu womberi waweza kulandanaziwa na wantu waku Israeli weni gweka yawu Mlungu gwawu kagenditi kuwalopola su waweri wantu wakuyi? Gwenga gulitenderiti litawu kwa kutenda mirandu mikulu na ya kulikangasha panu paguwawingiti maisi kulongolu kwa wantu waku weni guwakombuliti kulawa Misri. 22 Guwatenditi wantu waku mweni Israeli kuwera wantu waku mashaka Goseri na Gwee Mtuwa Mlungu, guwera Mlungu gwawu."

23 "Vinu su, Gwee Mtuwa Mlungu, gushigangamaziyi mashaka goseri shisoweru shaku shagulongiti kwa neni ntumintumi gwaku na kwa wiwuka wangu. 24 Na litawu lyaku lizyumwi mashaka goseri na wantu hawalongi, Mtuwa Mlungu yakana makakala, ndo Mlungu gwa Israeli. Na kaya yangu, neni Dawudi ntumintumi gwaku, haguugangamaziyi ufalumi wakuyi kulongolu kwaku. 25 Toziya gwee Mlungu gwangu guntenda kuwera ntira ndiri kukuluwa gwenga, gung'ubutulira pagulonga ukulu wa neni hawulikali. 26 Vinu gwee Mtuwa Mlungu, gwenga ndo Mlungu, gung'ambira neni ntumintumi gwaku mlandu agu mheri. 27 Hangu nikuluwa guwutekeleri wiwuka wangu, neni ntumintumi gwaku, su ulonguziya ulikali mashaka goseri kulongolu kwaku, toziya shagutekelera gwenga, shiwera shitekelerwa mashaka goseri."