1 Pa aga, Nahashi mfalumi gwa Waamoni kahowiti na Hanuni mwana gwakuyi kawera mfalumi pa yomberi. 2 Su, Dawudi kalonga, "Hanimtenderi maheri Hanuni mwana gwa Nahashi, toziya tati gwakuyi kantendiriti maheri viraa." Hangu Dawudi katumiti walagilagi kumjegera visoweru vya kumkolamawoku kwajili ya kuhowa kwa tati gwakuyi. Na womberi wagenda kwa Hanuni su kumkolamawoku aku muisi ya Waamoni. 3 Kumbiti wakulu wa Waamoni wamgambira mfalumi Hanuni, "Hashi! Gulihola ndo toziya ya ligoya lya tati gwaku Dawudi kawalagalira walagilagi awa wizi kukukolamawoku? Wantu awa wankondu ndiri yawalagaliritwi kwiza kuyilolalola isi na kuyagamiziya?"

4 Hangu Hanuni kawatola walagilagi awa wa Dawudi, kawamoga ndevu na kuzipapula nguwu zawu pakati mpaka pasi pakukalira, shakapanu kawalaviya wagendi zawu. 5 Womberi wawuka kuwuya ukaya. Dawudi pakagambiritwi visoweru ntambu yawatenderitwi walagilagi wakuyi, kalagalira wantu kuwawanka toziya walagilagi awa wawoniti soni nentu. Na mfalumi kawagambiriti, "Mlikali kumji Yeriku, mpaka pamumera ndevu, Shakapanu muwuyi."

6 Waamoni pawawoniti walitenda wakalaziwi na Dawudi, Hanuni na Waamoni walagaliriti wantu wajegi mabuwi ga kilu elufu selasini na msheshi za feza kukodi mbutuka za wakwena farasi kulawa Misopotamiya na Aramaaka na Soba. 7 Wakodishiti mbutuka za kukwega na farasi elufu selasini na mbili na mfalumi gwa Maaka na mashonta wakuyi, kiza na kunyawa ngonjeru pakwegera na Medeba. Waamoni walijojonira kulawa kumiji yawu yoseri, walitanda kala kwa nkondu.

8 Na Dawudi pakapikaniriti visoweru avi, kamlagaliriti Yoabu na lishonta lyoseri lya makambaku. 9 Waamoni walawa na kulitula kala kuligomi lyawu lya mji, viraa wafalumi yawiziti waweriti gwekayawu kululalanda.

10 Yoabu pakawoniti handa nkondu ndo ikalipa kwa yomberi, kulongolu na kumbeli, kasyagula wamu wa mashonta wagangamala nentu wa Waisraeli, su walikomangi na Waaramu. 11 Wamashonta wamonga wali yawasigaliti, kawatula muulolera wa ulongoziya wa Abishai mlongu gwakuyi, na yomberi kawatula su walikomangi na Waamoni. 12 Yoabu kamgambira Abishai, "Payiwera Waaramu wana makakala nentu, haguntangi, kumbiti handa Waamoni wana makakala nentu, hanizi kukutanga. 13 Guweri mgangamala! Tulikomangi shipalu toziya ya wantu wetu na miji ya Mlungu gwetu na Mtuwa Mlungu katutenderi lyakaliwona liheri kwakuyi."

14 Shakapanu Yoabu na wantu wakuyi wendereya kulikomanga na Waaramu na womberi watiriti. 15 Waamoni pawawoniti Waaramu watuga na womberi wamtiriti Abishai, mlongu gwa Yoabu na kwingira kumji. Shakapanu Yoabu kawuya Yerusalemu.

16 Na Waaramu pawaliwoniti handa wasinda na Waisraeli, walagalira walagilagi wagendi kuwajega Waaramu wamonga yawaweriti kumwambu kulushemba Eufrati, pawalongoziwa na Shofaki, mkulu gwa lishonta lya Hadadezeri. 17 Dawudi pakagambiritwi aga, kawajojoneriti pamuhera wantu wa Israeli woseri na kaloka lushemba Yoridani, kawagendera na kupanga vipinga vyakuyi kwa womberi. Dawudi pakapangiti nkondu kwa Waaramu su na womberi walikomangiti na yomberi. 18 Kumbiti Waaramu wawatiriti Waisraeli na Dawudi kawalagiti Waalamu elufu saba yawendesha mbutuka za kukwegwa na farasi na wanjagira wa magulu elufu alubayini. Viraa kamlagiti Shofaki mkulu gwa lishonta lyawu. 19 Shakapanu wafalumi wa Hadadezeri pawawoniti kuwera wantu wa Israeli wawakanka, watenditi lipatanu lya ponga na Dawudi na womberi wawera wantumintumi wa Dawudi. Hangu Waaramu wajimiriti ndiri kuwatanga Waamoni kayi.