1 Rubeni kaweriti mwiwuka gwa kwanja gwa Israeli. Tembera Rubeni kaweriti mwiwuka gwa kwanja kafiruwitwi kupananwa uhala wa wiwuka gwa kwanja kumbiti kapananitwi Yusufu mlongu gwakuyi, toziya Rubeni kagonjiti na mdala gwa kunja gwa tati gwakuyi yakamtenditi kuwera mdala. Hangu yomberi kapananitwi ndiri seemu ya mwiwuka gwa kwanja. 2 Tembera Yuda ndo yakaziti kuwera kana makakala nentu pakati pa walongu wakuyi na mkolamlima kalawiti amu na seemu ya mwiwuka gwa kwanja iweriti ya Yusufu. 3 Wana wa Rubeni mwiwuka gwa kwanja gwa Israeli waweriti, Henoki na Palu na Hesironi na Karimi.

4 Wiwuka wa Yoeli kulawa wiwuka mpaka wiwuka waweriti: Shemaya na Gogi na Shimei, 5 na Mika na Reaya na Baali na Beeri. 6 Na Beera yakaweriti mlonguziya gwa likabila lya Rubeni, ndo yakabatitwi na Tigilati Pileseri mfalumi gwa Ashuru na kumjega kugenda muuhamisiwu.

7 Awa ndo wakulu wa nkolu yawalembitwi muwalanga ya maholu ga likabila lya Rubeni ndo: Yeieli na Zakaria, 8 na Bela mwana gwa Azazi mzukulu gwa Shema, gwa lukolu lwa Yoeli. Lwalulikaliti mumji gwa Aroeri na mulienewu lyoseri lya kushana mpaka Bela na Baali Meoni. 9 Toziya wamifugu wawu yongereka iwera ivuwa nentu, wantu walipalasiyiti uwega wa kwagulawa mshenji mpaka kumayingiliwu ga shiwala yalieneyiti mpaka lushemba Eufrate.

10 Mumashaka ga Mfalumi Sauli, likabila lya Rubeni walikomanga na Wahajiri, wawalagiti munkondu na watoliti isi ya kwagulawa mushenji mwa Gileadi, walikala amu.

11 Likabila lya Gadi lipakaniti na likabila lya Rubeni uwega wa kushana, muisi ya Bashani yayieneyiti kwagulawa mshenji mpaka mumji gwa Saleka. 12 Yoeli ndo yakaweriti mkulu gwa lukolu lwaluweriti na makakala, gwa pili kaweriti Shafamu. Yanai na Shefati waweriti wakulu wa nkolu zimonga aku Bashani. 13 Walongu wawu kulinganira na nkolu waweriti saba. Mikaeli na Meshulamu na Sheba na Yorai na Yakani na Zia na Eberi. 14 Woseri awa waweriti wiwuka wa Abihaili. Huri na Yaroa na Gileadi na Maiku na Yeshishai na Yado na Buzi. 15 Ahi, yakaweriti mwana gwa Abidieli na mzukulu gwa Guni, Ahi ndo yakaweriti mkulu gwa nkolu azi. 16 Walikaliti museemu za Gileyadi, museemu ya Bashani na vijiji vyavizyengeta Sharoni, mpaka mumpaka. 17 Matawu ga wantu awa woseri galembilitwi munkolu, mumashaka ga Yotamu, mfalumi gwa Yuda na Yerobowamu mfalumi gwa pili gwa Israeli.

18 Makabila ga Rubeni, Gadi na nusu ya likabila lya Manasi ga kwagulawa mshenji, gaweriti na mashonta wagagamala elufu arubaini na msheshi miya saba sitini, yawamana kutendera ngawu na ligumba, yawavimana nentu kunika upindi munkondu. 19 Walikomiti nkondu na likabila lya Hagiti na Wayeturi na Wanafishi na Wanodabu. 20 Watuliti litumbiru lyawu kwa Mlungu na wamluwiti kawatangi na Mlungu kawawankuliti shawamluwiti na wawakanka Wahajiri pamuhera na waganja wawu. 21 Walopoliti ngamiya elufu amusini, kondolu laki mbili na amusini elufu punda elufu mbili na walopola wantu laki yimu. 22 Walagiti wankondu wavuwa nentu toziya Mlungu kawatangiti. Na wendereyiti kulikala muisi ayi mpaka pawagenditi muuhamiziwu.

23 Nusu ya wantu wa likabila la Manasi walikaliti muisi ya Bashani. Walanga yawu yongeleketi nentu na walipalasiya wega za kushana mpaka Baali Herimoni, Seniri na lugongu Herimoni. 24 Awa ndo yawaweriti wakulu wa nkolu za kabila ali. Eferi na Ishi na Elieli na Azirieli na Yeremiya na Hodaviya na Yadieli. Woseri waweriti wamashonta wagangamala na walonguziya munkolu azi.

25 Kumbiti wantu walii wamgalambukiti Mlungu gwa wambuyi wawu na kuguwira wamlungu wa wenikaya wa isi azi zyeni Mlungu kazangamiziyiti kulongolu kwawu. 26 Su Mlungu gwa Israeli kamtenda Pulu, mfalumi gwa Ashuru, mweni viraa kamanika handa Tigilati Pileseri, kayikankali isi yawu na kuwalopola Wareubeni, Wagadi na nusu ya likabila la Manase kwagulawa mshenji kawajegera mpaka mkuhamira aku Hala, Habori na Hara, kumpeku kulushemba Gozani, kweni aku walikala mpaka leru.