1 Walijega Lisandiku lya Mlungu na kulitula mngati muliringu lyakanyawiti Dawudi. Shakapanu walaviya tambiku za kulunguziwa na za ponga kulongolu kwa Mlungu. 2 Dawudi pakamaliliti kala kulaviya tambiku azi, kawatekeleriti wantu mulitawu lya Mtuwa Mlungu, 3 na kuwabagulira Waisraeli woseri, wapalu kwa wadala na kila yumu kapananwa libumunda, shipandi sha shinofu na libumunda lya zabibu.

4 Dawudi kawasyaguliti Walawi wamonga su walitenderi Lisanduku lya Mtuwa Mlungu, wamkwisi na wamgambiri maya ga shii na wamzyumi Mtuwa Mlungu, Mlungu gwa Israeli. 5 Kamsaguliti Asafu kuwera mkulu gwawu pakatangwa na Zekaria na Yeieli na Shemiramoti na Yehieli na Matitia na Eliyabu na Benaya na Obedi Edomu na Yeieli. Kawasyaguliti waweri wagomba vinanda na vinubi. Na Asafu kagombiti matowazi, 6 Watambika Benaniya na Yehazieli, wasyagulitwi pawagomba lipenka magenda kulongolu kwa Lisanduku lya Lipatanu lya Mlungu.

7 Lishaka ali Dawudi shintu sha kwanja shakatenditi ndo kumpanana Asafu na walongu wakuyi Walawi lihengu la kumwimbira Mtuwa Mlungu nyimbu za kumgambira maya gashii.

8 Mlongi maya gashii Mtuwa Mlungu,

mbweri ukulu wakuyi,

muwamaniziyi wantu mirandu yakayitenditi.

9 Mumunemeleri na mumwimbili yomberi ukwisa,

muwatambili matendu gakuyi ga kulikangasha gakatenditi!

10 Mulikwisi litawu lyakuyi linanagala,

yawamumguwira Mtuwa Mlungu na wasekeleri.

11 Mumusakuli Mtuwa Mlungu na makakala gakuyi,

mumuguwiri yomberi mashaka goseri.

12 Muliholi matendu gakuyi makulu,

mawuzawuza gakuyi na toza zyakalaviyiti,

13 Mwee wiwuka wa Israeli ntumintumi gwakuyi,

Mwenga wiwuka wa Yakobu, wasyagulwa wakuyi. 14 Yomberi Mtuwa Mlungu ndo Mtuwa Mlungu gwetu,

toza zakuyi ziwoneka pasipanu poseri.

15 Muliholi lipatanu lyakuyi mashaka goseri mpaka mpeleru,

katenda shakatakuliti kwa viyiwuku elufu. 16 Lipatanu lyakalitenditi na Abrahamu,

na lyakatenditi Isaka. 17 Mtuwa Mlungu katenditi lipatanu na Yakobu,

lipatanu kwa Israeli lyanalilika mashaka goseri mpaka mpeleru. 18 Kalonga, hanikupanani isi ya Kanaani,

Na yeni hayiweri yenu maweni.

19 Walanga yenu iweriti ndidini,

muweriti wadidini na wahenga muisi ya Kanaani,

20 pamuyerayera kulawa isi yimu mpaka isi yimonga,

kulawa ufalumi wumu mpaka ufalumi umonga.

21 Mlungu kajimiriti ndiri muntu yoseri kawawoneri,

kwa kuwalolera kawakalapiriti wafalumi woseri.

22 Pakalonga, namjera kuwashinkula wasyagula waneni,

namuwatenda wambuyi waneni!

23 Mumwimbiri Mtuwa Mlungu, pasipanu poseri.

Mubweri kila lishaka matendu gakuyi ga ulopuziya

24 Mgabweleri maisi uweru wakuyi,

muwagambiri wantu woseri mirandu yakuyi ya kulikangasha.

25 Toziya Mtuwa Mlungu ndo mkulu, kazyumwa nentu

kafiruwa kupananwa ligoya kuliku wamlungu woseri.

26 Toziya wamlungu woseri wa wantu ndo shinyagu hera,

kumbiti Mtuwa Mlungu kanyawiti kumpindi.

27 Uweru na zyuma vimzengeta yomberi,

makakala na nemeru vimemiziya numba nkulu yakuyi.

28 Mmupanani Mtuwa Mlungu, ligoya mwenga wantu woseri wa pasipanu,

yina, muubweri uweru na makakala gakuyi. 29 Mumpanani Mtuwa Mlungu ligoya na uweru wa litawu lyakuyi.

Mjegi tambiku na kwingira Munumba mwakuyi,

Mmuguwiri Mtuwa Mlungu pahala pakuyi pananagala,

30 mwee wantu woseri mlendemeri kulongolu kwakuyi!

Kapatula gangamala pasipanu, hapapawezi kutikinyika.

31 Mnemeleri mwe mpindi na pasipanu

Muwagambiri wantu woseri, Mtuwa Mlungu kakolamlima!

32 Bahari na ivumi, pamuhera na vyoseri vyaviwera amu!

Mnemeleri mwe malambu na vyoseri vyaviwera amu!

33 Mwee mitera yoseri ya muntundu mumzyumi kwa

nemeru kulongolu kwa Mtuwa Mlungu yakiza

yina, yakiza kupatoza pasipanu.

34 Mumgambili mayagashi Mtuwa Mlungu yomberi ndo mheri,

toziya ufiru wakuyi ulikala mashaka goseri.

35 Mmugambiri Mtuwa Mlungu.

Gutulopuziyi, gwee Mlungu mlopuziya gwetu,

gutujojoniri pamuhera na kutulopola kulawa kwa wantu,

su tupati kulikwisa litawa lyaku linanagala,

na tulizyumi mu zyuma zaku.

36 Kakwiswi Mtuwa Mlungu, Mlungu gwa Israeli,

mashaka goseri mpaka mpeleru!

Shakapanu wantu woseri walongi, "Yina haa!" Viraa wamzyuma Mtuwa Mlungu.

37 Mfalumi Dawudi kawaweka Asafu na walongu wakuyi Walawi pahala pawalituliti lisanduku lya Lipatanu lya Mtuwa Mlungu, toziya ya tendera yazifiluwa kulongolu kulisanduku kila lishaka. 38 Obedi Edomu mwana gwa Yedutuni pamuhera na wayaguyi sitini na wanani wawatangi. Obedi Edomu mwana gwa Yedutuni na Hosa waweriti walolera wa magomi. 39 Viraa kawatuliti Sadoki mtambika na watambika wayaguyi kutenda lihengu kulongolu kulilingu lya Mtuwa Mlungu lyaliweriti pahala pa kuguwira aku Gibiyoni. 40 Su kumvilira Mtuwa Mlungu tambiku ya kulunguziwa pampindi pa shitalawanda sha tambiku za kulunguziwa mashaka goseri mandawira na pamihi, kulinganira na goseri yagalembitwi mulagiru ya Mtuwa Mlungu yakawagambiriti Waisraeli. 41 Pamuhera na womberi waweriti Hemani na Yedutuni na woseri walii yawasyagulitwi, su kulonga mayagashi Mtuwa Mlungu kwa ufiru waku ndo wa mashaka goseri. 42 Hemani na Yedutuni waweriti wagolokera wa lipenka na matowazi kwajili ya muziki na vyombu vyose vya muziki kwajili nyimbu nanagala. Lukolu lwa Yedutuni wasyagulitwi kugalolera magomi. 43 Shakapanu, kila muntu kawukiti kugenda ukaya kwakuyi na Dawudi kagenda ukaya na kuyitekelera kaya yakuyi.