1 Shetani kafiliti kawajegeri ntabiku wa Israeli, kamzyangazyanga Dawudi kawawalangi wantu. 2 Hangu Dawudi kamlagalira Yoabu na wakulu wa lishonta wamonga, "Mgendi mkawawalangi Waisraeli, kwanjira Beeri Sheba mpaka Dani. Munjegeri visoweru su nivimani walanga yawu." 3 Kumbiti Yoabu kankula, "Mtuwa Mlungu na kawawongeri Waisraeli mala miya kuliku ntambu yawawera vinu! Mtuwa gwangu mfalumi, woseri awa ndo wantumintumi waku ndiri? Hashi su gufira kutenda mlandu agu gweni haguwatendi Waisraeli waweri mulikosa?" 4 Kumbiti shisoweru sha mfalumi shimtenda Yoabu kajimiri, hangu, kagenda muisi yoseri ya Israeli na shakapanu kawuya Yerusalemu. 5 Yoabu kamjegeriti mfalumi Dawudi walanga ya wantu. Muisraeli yoseri, kuweriti wapalu miliyoni yimu na laki yimu yawavimana kutendera ligumba na Mu isi ya Yuda kuweriti wantu laki msheshi na elufu sabini. 6 Kumbiti Yoabu kawawalangiti ndiri Walawi na Wabenjamini, toziya kajimirianiti ndiri na lagira ya mfalumi.

7 Mlungu kafiliziwa ndiri na mlandu agu hangu kayikomangiti Israeli. 8 Shakapanu Dawudi kamgambira Mlungu, "Ntenda vidoda vikulu kwa shitendu ashi shantenditi! Kumbiti nikuluwa gundekiziyi neni ntumintumi gwaku, toziya ntenda mlandu gwa uzigizigi nakamu."

9 Shakapanu Mtuwa Mlungu kazumba na Gadi, mbuyi gwa Dawudi, kamgambira, 10 "Gugendi gwakamgambiri Dawudi handa neni Mtuwa Mlungu nimpanana mirandu mitatu. Kalisyaguliri gumu na neni hanimtenderi." 11 Hangu Gadi kamgendera Dawudi na kumgambira, "Mtuwa Mlungu kalonga hangu. Gulisyaguliri gumu. 12 Guweri na njala ya mivinja mitatu ama miyezi mitatu ya malaguwa kulawirana na wankondu waku na ligumba lya wankondu waku halikukanki ama mashaka matatu geni Mtuwa Mlungu hakawakomangi kwa ligumba lyakuyi, kupitira ntumintumi gwakuyi gwa kumpindi wajegeri malweri gakalipa muisi na ntumintumi gwa kumpindi gwakuyi kapiti kuwagamiziya muisi yoseri ya Israeli. Vinu gwamuwi, ndo lyankulu gaa hanimpanani yomberi yakantumiti."

13 Dawudi kamwankula Gadi, "Moyu guntama na nahera shakutenda! Mbaka nkomangwi na Mtuwa Mlungu toziya yomberi kana lusungu nentu. Ila nakandeka nkomangwi na wantu." 14 Su, Mtuwa kawajegera Waisrali malweri makalipa, geni gajegiti kuhowa kwa Waisraeli sabini elufu. 15 Shakapanu Mlungu kamtumiti ntumintumi gwa kumpindi gwakuyi kagendi kuhalibisiya wantu wa Yerusalemu, Kumbiti pamberi hakenitendi hangu, Mtuwa Mlungu kagalambula nfiru yakuyi na kumgambira ntumintumi gwa kumpindi ayu yakatenditi ulaga awu, "Su, itosheya!" Shaka ashi ntumintumi gwa kumpindi kagolokiti pakwegera na luwaga lwa kukomera viboga lwa Orinani Myebusi.

16 Dawudi kanyasuliti masu gakuyi na kumwona ntumintumi gwa kumpindi kagoloka pakati pa isi na kumpindi agawu katalipisiya ligumba lyakuyi su kuyitenda Yerusalemu. Shakapanu Dawudi na wazewi, yawaweriti wavala nguwu za mafafa waguwa makukama. 17 Dawudi kamgambira Mlungu, "Hashi, ndo neni ndiri yandaviyiti litakulu la kuwawalanga wantu? Neni ndo yantenditi likosa na vidoda vikulu, kumbiti wantu awa handa kondolu yawahera vidoda watenda shishi? Gwee Mtuwa Mlungu, Mlungu gwangu, su liwoku lyaku liweri kwa neni na wantu wangu, kumbiti naguleka malweri aga gendereyi kwa wantu waku." 18 Shakapanu ntumintumi gwa kumpindi kamlagalila Gadi, kamgambiri Dawudi kagendi na kumnyawira Mtuwa Mlungu shitalawanda muluwaga lwa kukomangira viboga lwa Arawuna Myebusi. 19 Shakapanu Dawudi kajimira lilagiru lyakamgambiriti Gadi na kugenda handa Mlungu ntambu yakalagaliriti. 20 Orunani pakagalambukiti na kumlola ntumintumi gwa kumpindi, ndo mweni na wana wakuyi wamsheshi yawawera pamuhera na walififiti. Na Orunani kaweriti kankukomanga nganu. 21 Shakapanu Dawudi kamsegelera Orunani na Orunani pakaloriti na kumwona Dawudi, Orunani kawukiti pa luwaga luliya lwa kukomangira viboga, kamsuntamira Dawudi makukama. 22 Dawudi kamgambira, "Gumpanani luwaga lwaku alu lwa kukomangira viboga su numnyawiri Mtuwa Mlungu Shitalawanda, su malweri makulu nagedereya kwa wantu, Guwuzili kwa beyi yayifiruwa." 23 Na yomberi Orunani kamgambiriti Dawudi, "Gutoli luwaga alu. Mtuwa gwangu mfalumi gutendi shoseri shagushifira. Guloli, handaviyi wang'ombi yawaherepa toziya ya malaviwu ga kulunguziwa, vintu vya kukomangira viweri mbawu, pamuhera na nganu iweri tambiku lya viboga. Nankukupanana vyose avi." 24 Kumbiti mfalumi Dawudi kamwankula Orunani, "Ndala! Ntakula kayi na kayi handipi beyi yayifiruwa. Hapeni ntoli shintu shaku toziya ya Mtuwa Mlungu, sheni haneni shilipili." 25 Su Dawudi kampananiti Orunani vipandi miya sita vya zahabu toziya ya luwaga luliya. 26 Shakapanu Dawudi kamnyawiliti Mtuwa Mlungu shitalawanda paliya na kumlavilira malaviwu ga kulunguziwa na malaviwu ga ponga. Kamluwiti Mtuwa Mlungu na yomberi kamwankuliti maluwa gakuyi kwa kujega motu kulawa kumpindi, pampindi pa malaviwu ga kulunguziwa. 27 Shakapanu Mtuwa Mlungu kayowera na Ntumintumi gwakuyi gwa kumpindi na yomberi kawuziya ligumba pahala pakuyi. 28 Shaka ashi Dawudi pakawoniti handa Mtuwa Mlungu kamwankula kuluwa kwakuyi kuluwaga lwa kukomangira viboga lwa Orunani Myebusi, su kalaviyiti malaviwu panu. 29 Shaka ashi aga pagalawiriti Numba nanagala ya Mtuwa Mlungu yeni Musa yakayinyawiti kushiwala aku pamuhera na shitalawanda sha malaviwu ga kulunguziwa kwa shaka ashi viweriti vyakali vya pahala pa pampindi pa kuguwira aku Gibiyoni. 30 Kumbiti Dawudi kasinditi kugenda aku Gibiyoni kumluwa Mlungu shakutenda, toziya katiriti ligumba lya ntumintumi gwa Mtuwa Mlungu.