1 Pa aga, mfalumi Dawudi kawakankiti Wafiristi na kugutola muji gwa Gati pamuhera na vijiji vyakuyi vyaviweriti vya Wafilisti. 2 Viraa Dawudi kawakankiti Wamowabu, wanja kukolwamlima na yomberi na wawera wankumlipa kodi. 3 Shakapanu Dawudi kamkankiti Hadadezeri mfalumi gwa Soba, isi iweriti pakwegera na mbaka ya Hamati, katenditi hangu shaka pakagenditi kuligolusilira lupanda lwa kulihola pahala pa lushemba Eufrati. 4 Dawudi kalopoliti mbutuka za kukwegwa na farasi elufu yimu, mashonta wakwena farasi elufu saba na mashonta yawagenda kwa magulu elufu ishilini. Shakapanu Dawudi kadumula mishipa ya magulu ga kumbeli ga farasi woseri wa mbutuka za kukwega na farasi, ila kawasigaziya miya yimu. 5 Waaramu wa Dameski, pawagenditi kumtanga mfalumi Hadadezeri gwa Soba, Dawudi kawakomangiti na kuwalaga wantu elufu ishilini na mbili. 6 Shakapanu Dawudi kawatula mung'onjeru za wamashonta mumji gwa Shamu ya Dameski. Na Waaramu wanja kukolwamlima na wawera wankulipa kodi. Mtuwa Mlungu kampanana Dawudi ukanka koseri kwakagenditi. 7 Dawudi katoliti shinga za zahabu zyawajegiti wamashonta wakulu wa Hadadezeri na kazijega Yerusalemu. 8 Katoliti viraa shaba ivuwa nentu kulawa mji gwa Tibati na mji gwa Kuni, yayiweriti miji ya Hadadezeri. Shakapanu Selemani kayitenderiti shaba ayi kunyawira beseni na mpanda na vyombu vya shaba.

9 Shaka Towu, mfalumi gwa Hamati pakapikaniriti handa Dawudi kalikanka shonta lyoseri lya Hadadezeri mfalumi gwa Soba, 10 kamtumiti mwana gwakuyi Hadoramu kwa mfalumi Dawudi, su kumlamsiya na kumzyuma toziya kaweriti kalikomanga na Hadadezeri na kumkanka. Toziya Hadadizeri kalikomangiti na Towu mala zivuwa. Hadoramu kamjegeriti Dawudi lifupu lwa vyombu vya feza, zahabu na shaba. 11 Mafupu aga, mfalumi Dawudi kagalaviyi toziya mahengu gwekagweka kwa Mtuwa Mlungu pamuhera na feza na zahabu vyakavilopoliti kulawa maisi goseri. Edomu na Mowabu na Amoni na Wafiristi na Amaleki.

12 Abishai mwana gwa Seruya, kawalagiti wantu wa Edomu elufu lilongu na msheshi mululalanda lwa Munu. 13 Kanyawiti ngonjeru za mashonta aku Edomu. Na Wantu wa Edomu woseri wakolitimlima na Dawudi. Mtuwa Mlungu kampananiti Dawudi ukanka koseri kwakagenditi.

14 Dawudi kakolitimlima mu Israeli yoseri pakatenda kuwera na nakaka handa wantu wakuyi woseri hawatenderwi shilii shashiwera shiheri na teratera. 15 Yoabu mwana gwa Seruya kaweriti mkulu gwa mashonta, Yehoshafati mwana gwa Ahiludi kaweriti mtula maholu, 16 Sadoki, mwana gwa Ahitubu na Ahimeleki, mwana gwa Abiyatali waweriti watambika, Shawusha kaweriti mlemba yagalawira, 17 Benaya mwana gwa Yehoyada kagolokeriti walolera wakuyi mweni Dawudi Wakereti na Wapeleti, wana gwa Dawudi waweriti walonguziya wakulu muukolamlima wakuyi.