1 Dawudi pakaweriti mzewi gwa vinja vivuwa, kamtenditi mwana gwakuyi Selemani kawera mfalumi gwa Israeli.

2 Mfalumi Dawudi kawashemeti wakulu woseri wa Israeli na watambika na Walawi. 3 Kawawalangiti Walawi woseri wapalu yawanjira vinja selasini na kwendeleya, Walanga yawu waweriti selasini na nani elufu. 4 "Dawudi kawabaguga hangu. Ishilini na msheshi elufu pakati pawu watendi lihengu mu numba ya Mtuwa Mlungu na elufu sita waweri wakulu na yawatula maholu, 5 elufu msheshi waweri walolera wa magomi ga Mtuwa Mlungu na elufu msheshi pawamzyuma Mtuwa Mlungu kwa vyombu vya msambu vyakanyawiti mfalumi mweni toziya ya hangu." 6 Dawudi kawabagula Walawi muvipinga vitatu kulinganira na nkolu za likabila lya Lawi. Lukolu lwa Gerishoni na lukolu lwa Kohati na lukolu lwa Merari.

7 Wana wa Gerishoni waweriti wawili. Ladani na Shimei. 8 Ladani kaweriti na wana watatu: Yehieli mkulu gwawu na Zetamu na Yoeli. 9 Wana wa Shimei waweriti watatu. Shelomoti, Hazaeli na Harani. Awa waweriti walonguziya wa lukolu lwa Ladani. 10 Wana wa Shimei waweriti walonguziya wamsheshi. Yahati na Ziza na Yeushi na Beria 11 Yahati kaweriti mkulu gwawu, pakafatirwa na Ziza. Kumbiti Yeushi na Beria, toziya waweriti ndiri na wana wavuwa, wawalangitwi na lukolu lumu.

12 Wana wa Kohati waweriti wamsheshi. Amramu na Ishari na Hebroni na Uzieli. 13 Wana wa Amuramu waweriti. Aruni na Musa. Aruni na wiwuka wakuyi wasyagulitwi waweri pawatekelera vyombu vinanagala nentu, mashaka goseri watumiziyi ubani kulongolu kwa Mtuwa Mlungu, pawamtendera na kuwatekelera wantu mulitawu lya Mtuwa Mlungu mashaka goseri. 14 Wana wa Musa, ntumintumi gwa Mlungu, wakantwa muwamu mwa likabila lya Lawi. 15 Wana wa Musa waweriti Gerishomu na Eliyezeri. 16 Yakaweriti mkulu muwamu mwa wana wa Gerishoni ndo Shebueli. 17 Eliezeri kaweriti na mwana yumu hera, Rehabia na yomberi kaweriti mlonguziya. Kumbiti Rehabia kaweriti na wana wavuwa nentu. 18 Ishari kamwuliti Shelomiti, mlonguziya gwa likabila lyoseri. 19 Wana wa Hebroni waweriti wamsheshi. Gwa kwanja kaweriti Yeria, gwa pili Amaria, gwa tatu Yahazieli na gwa msheshi Yekameamu. 20 Wana wa Uzieli waweriti wawili. Mika mkulu gwawu na Ishia gwa pili.

21 Merari kaweriti na wana wawili. Mali na Mushi. Wana wa Mali waweriti wawili. Eleazari na kishi. 22 Eleazari kahowiti pota wana mpalu, ira wahinga hera. Wahinga awa wayugitwi na wipa wawu, wana wa Kishi. 23 Wana wa Mushi waweriti watatu. Mali, Ederi na Yeremoti. 24 Walii yawaweriti wiwuka wa Lawi kulinganira na nkolu zawu na kaya zawu. Kila yumu gwawu yakafikiziyiti vinja ishilini ama nentu, kalembitwi litawu lyakuyi na kutenda mahengu muutenderu wa numba ya Mtuwa Mlungu. 25 Dawudi kalonga, "Mtuwa Mlungu gwa Israeli kawatenda waweri na ponga na yomberi hakalikali Yerusalemu mashaka goseri mpaka upeleru. 26 Hangu, Walawi hapawafiruwi kayi kulihamasiya liringu linanagala ama vyombu vyakuyi vya kuguwira." 27 Kulinganira na malagaliru ga mpeleru gakalaviyiti Dawudi, Walawi woseri yawasokiti vinja ishilini walembitwi kuutenderu wa numba nkulu ya Mlungu. 28 Lihengu lyawu liweriti ndo: Kuwatanga watambika wa lukolu lwa Aruni muutenderu wa numba ya Mtuwa Mlungu, kutula weri ligeleri na vyumba, kuvigulula vyombu vinanagala vyoseri na kutenda mahengu ga utenderu wa numba ya Mtuwa Mlungu. 29 Pamuhera na aga, waweriti wankugolokera lihengu lya kutanda mabumunda mananagala, ubumu unama na tambiku ya viboga, mabumunda yagalekerwa ndiri simika, mabumunda yagayoshiyitwi kwa lipaki la mizeituni. Walawi awa ndo yanawapimi uzotopa na ukulu wa mabumunda aga ga tambiku. 30 Kila lishaka mandawira na pashimii wafiriwitwi kugoloka kulongolu kwa Mlungu na kulonga mayagashi na kumzyuma, 31 viravilii shaka sha mashaka ga koyera, mwezi kulawira na msambu, panu tambiku za kulunguziwa pazilaviwitwi kwa Mtuwa Mlungu. Lagiru zitulitwi kwa walanga ya Walawi yawalagaliritwi kutenda mahengu aga mashaka goseri kulongolu kwa Mtuwa Mlungu. 32 Hangu, liweriti ndo lihengu lyawu kutula weri lilingu linanagala lya kuliwona na pahala pananagala na kuwatanga walongu wawu watambika, wiwuka wa Aruni, kuguwira munumba ya Mtuwa Mlungu.